ឯកឧត្តម នាយឧត្តមសេនីយ៍ សុខ ផល អគ្គនាយកនៃអគ្គនាយកដ្ឋានអន្តោប្រវេស្សន្តន៍ និងជាប្រធានក្រុមការងារគណបក្ស ប្រជាជនកម្ពុជា ចុះជួយស្រុកបាណន់ បាន រួបរួមសាមគ្គីដង្ហែអង្គកឋិនទានសាមគ្គី វេរប្រគេនព្រះសង្ឃគង់ចាំព្រះវស្សា អស់ត្រីមាស ក្នុងពុទ្ធសីមាវត្តពុទ្ធជ័យមង្គល ហៅវត្តបត់សាលា ឃុំឈើទាល ស្រុកបាណន់ ខេត្តបាត់ដំបង កាលពីថ្ងៃទី២៦ ខែតុលា ឆ្នាំ២០១៤។
ឯកឧត្តមនាយឧត្តមសេនីយ៍ សុខ ផល បានបញ្ជាក់ថា បុណ្យកឋិនទានសាមគ្គីនាពេលនេះ គឺជាផ្នែកមួយដែលចែកចេញ ពីបុណ្យកឋិនទានមហាសាមគ្គី របស់ឯកឧត្តម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃជាតិ ជាតំណាងរាស្ត្រមណ្ឌល បាត់ដំបង និងជាប្រធានក្រុមកការងាររបស់គណបក្សប្រជាជនកម្ពុជា ចុះជួយខេត្តបាត់ដំបង ដែលបានផ្តួចផ្តើមឡើងដង្ហែរយកទៅ វេរប្រគេនដល់ព្រះសង្ឃ គង់ចាំព្រះវស្សាអស់ត្រីមាស ក្នុងពទ្ធសីមាវត្តចំនួន ១១ ក្នុងនោះ ៦វត្តនៅខេត្តព្រៃវែង ៥វត្តទៀត នៅ ខេត្តបាត់ដបង ក្នុងនោះនៅក្នុងក្រុងបាត់ដំបង ដឹកនាំដោយឯកឧត្តមផ្ទាល់ វត្តទី២ វត្តពុទ្ធជ័យមង្គល បត់សាលា ដឹកនាំដោយ ឯកឧត្តម នាយឧត្តមសេនីយ៍ សុខ ផល ទី៣ វត្តតាគ្រាមដឹកនាំដោយ លោក ងួន រតនៈ អភិបាលរងខេត្តបាត់ដំបង វត្តទី៤ ស្រុករតនៈមណ្ឌល និងទី៥ វត្តនៅស្រុកកំរៀង ដែលដឹកនាំតំណាងរបស់ឯកឧត្តម។
នាយឧត្តមសេនីយ៍ សុខ ផល បានបញ្ជាក់លើការខិតខំ អភិវឌ្ឍន៍លើគ្រប់វិស័យក្នុងមូលដ្ឋានលេចចេញ នូវសមិទផ្ធិល ជាច្រើន របស់គណបក្សប្រជាជនកម្ពុជាតាមមូលដ្ឋាន រួមជាមួយរាជរដ្ឋាភិបាលមានដូចជា សាលារៀន មណ្ឌលសុខភាព ផ្លូវ ថ្នល់ ប្រព័ន្ធធារាសាស្ត្រ និងសមិទ្ធិផលជាច្រើនទៀត។
ឯកឧត្តមបានបញ្ជាក់ទៀតថា ជាងនេះទៀត ក្រោមកិច្ចផ្សះផ្សារួបរួមជាតិ រវាង គណបក្សធំៗទាំង២ បានផ្តល់នូវផលប្រយោជន៍ជាច្រើនចំពោះប្រទេសជាតិ ពិសេសវិស័យព្រះពុទ្ធសាសនា នៅទូទាំងប្រទេសមាន ការអភិវឌ្ឍន៍រីកចំរើន តាំងពីទីក្រុងរហូតដល់តំបន់ដាច់ស្រយាល ព្រោះព្រះពុទ្ធសាសនា វត្តអារាម មិនត្រឹមតែបានរួមចំណែក ក្នុងការថែរក្សាទំនៀមទំលាប់ វប្បធម៌ ប្រពៃណី ដ៏ផូរផង់របស់ជាតិប៉ុណ្ណោះទេ ថែមទាំងបានចូលរួម ក្នុងការអប់រំបណ្តុះបណ្តាល ធនធានមនុស្ស សម្រាប់ប្រទេសជាតិទៀតផង ។
គួរបញ្ជាក់ផងដែរថា បច្ច័យដែលបានទទួលពីការបែងចែក កឋិនរបស់ឯកឧត្តម ស ខេង ចំពោះវត្តពុទ្ធជ័យមង្គល ហៅវត្តបត់សាលា នាពេលនេះ មានចំនួន ១៤០លានរៀលរួមជាមួយបច្ច័យចូលរួម ក្រុមការងារ របស់ឯកឧត្តម សុខ ផល មានចំនួន ១,៦០០,០០០ រៀល និង ១,០២០ ដុល្លារ សម្រាប់កសាងវត្តទៀតផង ។ ឯកឧត្តម សុខ ផល ឆ្លើយតបទៅ និងសំណូមពរ របស់ប្រជាពលរដ្ឋ និងជួយកសាង ផ្លូវក្រាលក្រួសក្រហម ១ ខ្សែ ដែលមានប្រវែង ១៦០០ម ក្នុងភូមិ បត់សាលាទៀតផង ៕
