ខេត្តរតនគិរី ៖ យុវជន ២ នាក់ត្រូវមន្ត្រីអភិរក្សពន្ធនាគារឃាត់ខ្លួន ខណៈជនទាំងពីរនាក់បានបង្កប់រណាអារដែក នៅក្នុងស្បែកជើងពេលចូលជួបអ្នកទោស ហើយប្តូរស្បែកជើងអោយអ្នកទោស ដែលចេញមកសាកសួរសុខទុក្ខនៅខាងក្រៅរបងពន្ធនាគារ។
ជនសង្ស័យទាំងពីរត្រូវមន្ត្រីពន្ធធនាគារបានចាប់បញ្ជូនកសាងសំណុំរឿងភ្លាមៗ ក្រោយពីគេបានសារភាពដោយត្រង់ នៅថ្ងៃទី៤ ខែមិនា ម្សិលមិញនេះ។ យុវជនទាំងពីរនាក់ត្រូវគេចាប់ខ្លួននៅវេលាម៉ោង២និង៥១នាទីថ្ងៃទី៤ ខែមិនាដដែលនោះ ។ ពួកគេមានឈ្មោះសូម ណាក់ ភេទប្រុស អាយុ២១ឆ្នាំនិងម្នាក់ទៀតឈ្មោះ ដុំ ផុន អាយុ២១ឆ្នាំដូចគ្នា គេទាំងពីរជាជនជាតិទំពួន និងមានទីកំណើតនៅជាមួយគ្នាក្នុងភូមិកាចូន ឃុំកាចូន ស្រុកវ៉ើនសៃ ខេត្តរតនគិរី ។
ក្រោយពីមន្ត្រីពន្ធនាគារឆែកឃើញលាក់ផ្លែរណាអារដែកនៅក្នុងទ្រនាប់ជើងផ្ទាត់ពណ៌ស គេបានសារភាពថាៈ បងស្រីរបស់គេឈ្មោះ ពន់ ត្រូវជាប្រពន្ធជនជាប់ចោទឈ្មោះ សូម លូន (ជាពិរុទ្ធជន ជាប់ពាក់ព័ន្ធក្នុងបទល្មើសគ្រឿងញៀន) បានពឹងអោយគេយកផ្លែរណាអារដែកនោះអោយទៅឈ្មោះ សូម លូន ហើយមន្ត្រីពន្ធនាគារមានការសង្ស័យ រួចចាប់ឃាត់ឆែករកឃើញតែម្តង នៅប៉ុស្ដិ៍ឆែកឆេរអីវ៉ាន់ ។
សូមបញ្ជាក់ថាៈ ពន្ធនាគារភ្នំស្វាយនៅក្នុងខេត្តរតនគិរីនេះ គឺធ្លាប់មានអ្នកជាប់ឃុំរត់គេចខ្លួនរួចប៉ុន្មាននាក់កន្លងមកហើយ ដោយសារតែចំរឹងបង្អួចត្រូវគេលួចកាត់អោយមានប្រហោង ។ មកដល់នឹងពេលនេះ អ្នកដែលបានគេចខ្លួនចេញពីពន្ធនាគារនោះ នៅមិនទាន់ដឹងថា ត្រូវគេចាប់បញ្ជូលមកក្នុងពន្ធនាគារវិញហើយឬនៅនោះទេ។
គេកំពុងឆ្ងល់ថាៈ តើស្ត្រីដែលត្រូវជាប្រពន្ធពិរុទ្ធជន ដែលកំពុងជាប់ក្នុងពន្ធធនាគារ នឹងត្រូវគេចាប់ខ្លួនដែរឬទេ ពីព្រោះថាតាមចម្លើយសារភាពរបស់យុវជនដែលបានឃាត់ខ្លួន គឺស្ត្រីនោះបានពឹងអោយយុវជននោះយកផ្លែរណាអារដែកអោយជនជាប់ចោទ។
ប្រធានពន្ធនាគារភ្នំស្វាយ លោក ទីន សុវណ្ណណី មិនអាចស្វែងរកការផ្តល់ព័ត៌មានបន្ថែមបានទេ ដោយសារប្រព័ន្ធទូរស័ព្ទរបស់លោកត្រូវបានបិទ នៅរសៀលថ្ងៃទី០៥ ខែមិនានេះ៕
ដោយៈ យឹម សារិទ្ធ