ខេត្តរតនគិរី ៖ បុរស២នាក់ត្រូវកងរាជអាវុធហត្ថក្រុងបានលុង ចាប់ខ្លួនបញ្ជូនមកបញ្ជាការដ្ឋានជាមួយនិងសារធាតុញៀន រួមនិងមធ្យោបាយបំរើអោយការប្រើប្រាស់ និងសំភារៈសេពសារធាតុញៀនមួយចំនួនទៀត។
ប្រតិបត្តិការរបស់អាវុធហត្ថក្រុងនាពេលនេះគឺដឹកនាំដោយវរៈសេនីយ៍ត្រី ហៃ វណ្ណរ៉ា មេបញ្ជាការមូលដ្ឋានអាវុធហត្ថក្រុងបានលុងដែលធ្វើឡើងក្រោមការសម្របសម្រួលដោយលោក រ៉ា ប៉ូរ៉ាន់ឌី ព្រះរាជអាជ្ញារងអមសាលាដំបូងខេត្តរតនគិរី និងការចង្អុលបង្ហាញពីឧត្តមសេនីយ៍ត្រី គឹម រស្មី មេបញ្ជាការកងរាជអាវុធហត្ថខេត្តផងនោះ។
របាយការណ៍អោយដឹងថាៈ ជនទាក់ទិននិងគ្រឿងញៀន២នាក់នោះ ត្រូវអាវុធហត្ថចាប់បង្ក្រាបក្នុងករណីចែកចាយគ្រឿងញៀនខុសច្បាប់ នៅវេលាម៉ោង៣និង៣០នាទីថ្ងៃទី៤ មិនា ត្រង់ចំណុចភូមិអូរកន្តិល សង្កាត់បឹងកន្សែង ក្រុងបានលុង។
ជនជាប់ទាក់ទិនគ្រឿងញៀនទាំងពីរនាក់នេះមានឈ្មោះ កែវ វ៉ាន់ណូ ភេទប្រុស អាយុ២៧ឆ្នាំ មុខរបរកាន់ភាស៊ីឡានក្រុង រស់នៅភូមិអូររមៀត សង្កាត់ឡាបានសៀក និងម្នាក់ទៀតឈ្មោះ ច្រើម ចម ភេទប្រុស អាយុ៣៥ឆ្នាំ មុខរបរធ្វើចំការ នៅភូមិអូរកន្ទិល សង្កាត់បឹងកន្សែង។
វត្ថុតាងដកហូតរួមមាន ម្សៅក្រាមពណ៌សចំនួន០៥កញ្ចប់ ថវិកា៥ម៉ឺនរៀល ទូរស័ព្ទដៃ២គ្រឿង សំភារៈសេពគ្រឿងញៀនមួយចំនួន និងម៉ូតូ៤គ្រឿងផងទៀត។
អាវុធហត្ថក្រុងបានលុងនាពេលថ្មីៗនេះ ត្រូវគេឃើញថា បានបើកយុទ្ធនាការបង្ក្រាបនិងស្រាវជ្រាវយ៉ាងយកចិត្តទុកដាក់លើបញ្ហាគ្រឿងញៀននេះ គឺក្រោយបន្ទាប់ពីមានការផ្សព្វផ្សាយយ៉ាងទូលំទូលាយស្តីពីការត្រួតពិនិត្យ និងផលប៉ះពាល់នៃការប្រើប្រាស់គ្រឿងញៀនតាមផែនការរបស់រាជរដ្ឋាភិបាលកម្ពុជា ហើយសកម្មភាពផ្សព្វផ្សាយនេះ គឺត្រូវគេឃើញថាបានធ្វើឡើងយ៉ាងផុសផុល ដែលបច្ចុប្បន្នគឺកំពុងតែនៅបន្តធ្វើការផ្សព្វផ្សាយនេះនៅឡើយ ៕
ដោយៈ យឹម សារិទ្ធ
