មណ្ឌលគីរី ៖ នៅក្នុងខេត្តមណ្ឌលគិរី មានសេចក្តីរាយការណ៍ពីឈ្មួញឈើឲ្យដឹងថាក្នុងរយៈជិតពេញមួយខែកុម្ភៈនេះមានសមត្តកិច្ចពាក់ព័ន្ធជាច្រើនកំពុងទទួលបានផលប្រយោជន៍ពីបទល្មើសព្រៃឈើ យ៉ាងតិចណាស់ចាប់ពីពីរម៉ឺន ទៅ១០ម៉ឺនដុល្លារចំណែកឯអ្នកខ្លះទៀតអាចទទួលពី២០ម៉ឺនទៅ៣០ម៉ឺនដុល្លារ ។
ព័ត៌មានបែកធ្លាយស្តីពីទង្វើពុករលួយរបស់សមត្ថកិច្ចនេះ គឺបានកើតឡើងក្រោយពីការចុះបង្ក្រាបរបស់កម្លាំងអាវុធហត្ថលើផ្ទៃប្រទេស ចាប់បានជនជាតិវៀតណាម ប្រាំពីរនាក់ រួមទាំងរថយន្ដបង្កុងចំនួនប្រាំបីគ្រឿងដែលលួចចូលមកកាប់ឈើ ទើបធ្វើឲ្យបែកធ្លាយថា៖សមត្តកិច្ចមូលដ្ឋាននៅខេត្តមណ្ឌលគីរីភាគច្រើនសុទ្ធតែជាប់ពាក់ព័ន្ធនឹងបទល្មើសនេះ។
ប្រភពពីមន្ត្រី ដែលបានចូលរួមប្រតិបត្តិការដែលសុំលាក់ឈ្មោះបានឲ្យដឹងថា៖ ក្រោយពីចាប់ខ្លួនរួចមកមន្ត្រីរាជអាវុធហត្ថបានត្រួតពិនិត្យរកឃើញឯកសារមួយចំនួន នៅជាប់នឹងខ្លួនជនជាតិវៀតណាម ដូចជាឯកសារកត់ត្រា រថយន្ដចេញចូលឆ្លងព្រំដែនប្រទេសទាំងពីរ រួមទាំងឯកសារចំណាយក្នុង រត់ការបង់ប្រាក់ឲ្យមន្ត្រីពាក់ព័ន្ធស្ទើរគ្រប់លំដាប់ថ្នាក់នៅក្នុងខេត្តមណ្ឌលគីរី។
ក្នុងនោះ លោក យិន ចន្ទី មេវរៈយោធាកាពារព្រំដែនគោកលេខ១០៣ គឺជាអ្នកទទួលខុសត្រូវនាំថៅកែជនជាត់វៀតណាមចូលមកកាប់ឈើនៅក្នុងខេត្តតែម្តង រួមជាមួយលោក ឯម ស៊ុងហ៊ួ មេកងអនុសេនាតូចទី៣ ក្នុងកងអនុសេនាធំទី២ វិរៈ១០៣ដែលគ្រប់គ្រងប៉ុស្តិ៍ការពារព្រំដែនជាច្រើនកន្លែង ស្ថិតនៅក្នុងស្រុកកែវសីមា និងស្រុកអូររាំង ។ លោក ឯម ស៊ុងហ៊ួ គឺជាកូនប្រសាររបស់លោក ឃិន ម៉េងស្រេង មេបញ្ជាការសឹងរងខេត្តមណ្ឌលគីរី។
ចំណែក លោក ឡេង សោភន្ទ័ មេវរៈនគរបាលកាពារព្រំដែនគោគលេខ៦២១ គឺជាអ្នកសម្របសម្រួលដល់ការធ្វើចរាចរណ៍ចេញចូលរបស់រថយន្តដឹកឈើខុសច្បាបើ និងជាអ្នកយកលុយប្រចាំខែរហូតដល់ប្រាំមួយដុល្លារ។
មិនតែប៉ុណ្ណោះលោក ឡេងសោភន្ធ័បានយករថយន្ដបង្កុងផ្ទាល់ខ្លួនចំនួនប្រាំគ្រឿងផ្សេងទៀត ដើម្បីដឹកជញ្ជូនឈើដែលត្រូវកាប់រំលំរួចហើយ។ ចំណែកឈ្មោះ ឯម សុងហ៊ួកូនប្រសារលោកឃិនម៉េងស្រេងមេបញ្ជាការសឹងរងខេត្តមណ្ឌលគីរីជាអ្នកទទួលខុសត្រូវរាប់ក្បាលឡានយកលុយ ។
សេចក្តីរាយការណ៍ឲ្យដឹងថា តម្លៃសម្រាប់ក្បាលឡានយួនដឹកឈើនេះ លោក ឯម សុងហ៊ួ អាចទារបានរហូតដល់៣០០ដុល្លារអាមេរិក។ ដូច្នេះ ក្នុងរយៈពេលមួយខែកុម្ភៈដែលកើតបទល្មើសនេះ កូនប្រសារលោក ឃិន ម៉េងស្រង អាចទទួលបានលុយមិនតិចជាង៣៥ម៉ឺនដុល្លារនោះទេ។
ពាក់ព័ន្ធនឹងការលើកឡើងខាងលើនេះ លោក ស្វាយ សំអៀង អភិបាលខេត្តមណ្ឌលគិរីបានមានប្រសាសន៍ឲ្យកាសែតដឹងដោយទទួលស្គាល់ថា៖ មន្ត្រីរាជអាវុធហត្ថផ្ទៃប្រទេស ដែលបានបង្ក្រាបករណីកាប់ឈើ និងដឹកជញ្ជូនឈើខុសច្បាប់ចូលទៅក្នុងប្រទេសវៀតណាម បានរកឃើញភស្តុតាងច្រើនដែរហើយពាក់ព័ន្ធនឹងការឃុបឃិតគ្នាពុករលួយជាប្រព័ន្ធនេះ។
លោកស្វាយសំអៀងបញ្ជាក់ថាៈ«ទាហាននិងប៉ូលិសជាពិសេសមេៗទាំងអស់ហ្នុង ប្រាប់ខ្ញុំថា អត់ដឹង។ នៅទីហ្នុងហើយឆ្លើយថាមិនដឹង មានតែមិនទទួលខុសត្រូវ មានតែឃុនឃិតគ្នាតែម្តង»។លោកបានព្រមានថា មេទាហាន និងមេនគរបាល ដែលជាប់ពាក់ព័ន្ធនឹងបទល្មើសអាចប្រឈមនឹងការដកពីតំណែង ឬអាចរហូតដល់ផ្ទន្ទាទោសតាមច្បាប់ទៀតផង។
លោកឧត្តមសេនីយ៍ ឃិន ម៉េងស្រេងមេបញ្ជាការសឹងរងខេត្តមណ្ឌលគីរី មិនអាចទាក់ទងបានទេ នៅពេលនេះ។
សូមបញ្ជាក់ថា៖កាលពីយប់ថ្ងៃទី២១ ខែកុម្ភៈ ឆ្នាំ២០១៧ មានកិច្ចប្រតិបត្តិការ បង្ក្រាបបទល្មើសព្រៃឈើទ្រុងទ្រាយធំមួយ នៅចំណុចភូមិកូនក្រឡឹង ឃុំសែនមនោរម្យ ស្រុកអូររាំង ខេត្តមណ្ឌលគិរី ដោយចាប់យកវត្ថុតាងឡានរេវចំនួន៨គ្រឿង រណារយន្ត១គ្រឿង និងម៉ូតូ៥គ្រឿង ព្រមទាំងឃាត់ខ្លួនបាន១២នាក់ ក្នុងនោះមានជនជាតិវៀតណាម៧នាក់ ។
លោក អេង ហ៊ី អ្នកនាំពាក្យ PM ថ្លែងថា ប្រតិបត្តិការនេះ ដឹកនាំដោយឧត្តមសេនីយ៍ឯក វង្ស ពិសេន មេបញ្ជាការរង នាយសេនាធិការដ្ឋាន កងរាជអាវុធហត្ថលើផ្ទៃប្រទេស ប្រើប្រាស់ឧទ្ធម្ភាគចក្រចំនួន៣គ្រឿង និងដឹកនាំកម្លាំងចូលក្នុងព្រៃប្រមាណ១៣០នាក់ ដោយឧត្តមសេនីយ៍ឯក ហុង វិណុល មេបញ្ជាការរង កងរាជអាវុធហត្ថលើផ្ទៃប្រទេស ទទួលការងារស្រាវជ្រាវព័ត៌មាន និងបង្ក្រាបបទល្មើសធនធានធម្មជាតិ។
លោក អេង ហ៊ី បញ្ជាក់ថា នៅព្រលឹមស្រាងៗ ថ្ងៃទី២១ ខែឆ្នាំដដែល កម្លាំងកងរាជអាវុធហត្ថ បានចូលក្នុងព្រៃជិតព្រំដែនកម្ពុជា-វៀតណាម ចំណុចអូរហ៊ុច បានឃាត់ខ្លួនមនុស្សចំនួន១២នាក់ ជាករណីបទល្មើសជាក់ស្តែង។ ក្នុងនោះ មានជនជាតិវៀតណាមចំនួន៧នាក់ ត្រូវបានកសាងនីតិវិធីបញ្ជូនទៅតុលាការ ។ ចំណែកជនជាតិខ្មែរចំនួន៥នាក់ បានធ្វើការអប់រំ ធ្វើកិច្ចសន្យាអនុញ្ញាតឱ្យត្រឡប់ទៅលំនៅឋានវិញ។
ចាំមើលថាតើករណីបង្ក្រាបបទល្មើសព្រៃឈើមួយនេះក្រុមអាវុធហត្ថនិងចៅហ្វាយខេត្តមណ្ឌលគីរីរកអ្នកទទួលខុសត្រូវមកផ្តន្ទាទោសបានដែរឬអត់។ព្រោះថាដើម្បីឲ្យបទបញ្ជារបង្ក្រាបបទល្មើសព្រៃឈើរបស់នាយករដ្ឋមន្ត្រីតេជោហ៊ុនសែនមានប្រសិទ្ធិភាពសមត្តកិច្ចត្រូវពន្លត់ភ្លើងមិនមែនអង្គុយបក់ផ្សែងដូចរយៈពេលកន្លងមកនោះទេ!។
មានការកត់សម្គាល់ថា៖ពលរដ្ឋនៅក្នុងស្រុកអូររាំងខេត្តមណ្ឌលគិរី មានការមិនសប្បាយចិត្ត ចំពោះការបង្ក្រាបបទល្មើសព្រៃឈើនៅក្នុងស្រុកនេះ ជារៀងរាល់ថ្ងៃសកម្មភាពដឹកជញ្ជូនចេញពីក្នុងភូមិអណ្តូងក្រឡឹង និងភូមិពូហ្យាមដឹកតាមរយះម៉ូតូនឹងរថយន្តជាដើម មិនដែលឃើញចាប់បង្ក្រាបម្តងណាទេ ដោយសារសមត្ថកិច្ចនៅទីនោះត្រូវគ្នាជាមួយអ្នករកស៊ីបទល្មើសព្រៃឈើ។
ក្នុងមួយយប់ៗរថយន្តដឹកឈើមិនក្រោមពី១៥គ្រឿងនោះទេមានរថយន្តកាមរីហើម កាមរីគូថស្វិត លិសស៊ីស កាមរីបាឡែន វីឯម៉ូតូដឹកឈើវិញមិនក្រោមពី១៥ទៅ២០គឿងឡើយ។
ពលរដ្ឋបានបន្តថា បើសិនពលរដ្ឋអាឈើយកមកធ្វើផ្ទះវិញ គឺនាំគ្នាទៅចាប់ តែរថយន្តនឹងម៉ូតូដឹកឈើនៅមុខបែរជាមិនចាប់ទៅវិញ ធ្វើអោយពលរដ្ឋខកចិត្តយ៉ាងខ្លាំងចំពោះសមត្ថកិច្ច និងជំនាញនៅក្នុងស្រុកអូររាំងធ្វើបាបតែប្រជាពលរដ្ឋតូចតាច។
