ខេត្តរតនគិរី ៖ អនុប្រធានប៉ុស្តីច្រកទ្វារអន្តរជាតិអូរយ៉ាដាវនិងបក្ខពួកម្នាក់ទៀត ត្រូវជនរងគ្រោះម្នាក់ប្តឹងចូលស្ថាប័នអយ្យការសុំផ្តន្ទាទោសនិងទារសំណង២ម៉ឺនដល្លារ ក្រោយពេលបង្កគ្រោះថ្នក់ចរាចរមួយក្នុងខេត្តរតនគិរី។
លោក តុល មីនា អនុប្រធានប៉ុស្តីច្រកទ្វារអន្តរជាតិអូរយ៉ាដាវ និងបក្ខពួកម្នាក់ទៀតមិនស្គាល់ឈ្មោះ ត្រូវជនរងគ្រោះក្នុងករណីគ្រោះថ្នាក់ចរាចរឈ្មោះ ប្រាក់ សុជុំ ជនជាតិខ្មែរ ដាក់ពាក្យបណ្តឹងចូលស្ថាប័នអយ្យការសាលាដំបូងខេត្តរតនគិរី សុំអោយផ្តន្ទាទោសនិងបក្ខពួកម្នាក់ទៀតតាមនីតិវិធីច្បាប់ និងទាមទារសំណងជួសជុលព្យសនកម្ម ដែលបណ្តាលមកពីបទល្មើសចំនួន២ម៉ឺនដុល្លារសហរដ្ឋអាមេរិក ។
ពាក្យបណ្តឹងជនរងគ្រោះឈ្មោះ ប្រាក់ សុជុំ បានដាក់ចូលទៅស្ថាប័នអយ្យការសាលាដំបូងខេត្ត កាលពីថ្ងៃទី២១ ខែកុម្ភៈ ឆ្នាំ២០១៧ ដែលមានចំណុចខ្លឹមសារខ្លះៗបានរៀបរាប់ថាៈ លោកបានជិះម៉ូតូដឹកឈើសុក្រមចំនួន២ដុំតូច ដើម្បីលក់យកកំរៃចិញ្ចឹមជីវិត លុះមកដល់ភូមិប៉ក់ញ៉ៃ ឃុំប៉ក់ញ៉ៃ ស្រុកអូរយ៉ាដាវ លោកតុល មីនា និងបក្ខពួកម្នាក់ទៀតមិនស្គាល់ឈ្មោះ បានបើករថយន្តបំបុកពីចំហៀងជើងខាងឆ្វេងប៉ើងធ្លាក់ចូលក្នុងប្រឡាយ។ ចំណុចខ្លះក្នុងពាក្យបណ្តឹងសរសេរថាៈ លោក តុល មីនា បានជាន់ហ្គ៊ែររថយន្តបំរុងបំបុកបន្ថែមទៀតអោយស្លាប់តែម្តង តែមានមុស្សម្នាក់ឈ្មោះ ហាន ដែលជិះម៉ូតូក្នុងដំណើរជាមួយគ្នា ជួយរារាំងការពារកុំអោយលោកតុល មីនា និងបក្ខពួកជិះបំបុកម្តងទៀត។ ក្រោយពេលបុកហើយ ជនបង្កបានជិះរថយន្តគេចខ្លួន ប៉ុន្តែត្រូវកងរាជអាវុធហត្ថចាប់បាន។
លោកប្រាក់ សុជុំ រៀបរាប់ថាៈ ដោយសារស្ថានភាពរបួសធ្ងន់ធ្ងរពេកនិងដោយឆ្អឹងជើងរបស់លោកបែកដាច់សសៃអស់ ទើបត្រូវបញ្ជូនទៅព្យាបាលនៅមន្ទីរពេទ្យ២១ ខេត្តយ៉ាឡាយ ប្រទេសវៀតណាម ហើយពេទ្យជំនាញនៅទីនោះបានកាត់ជើងខាងឆ្វេងរបស់លោកត្រឹមជង្គង់។ លោកថាៈ លោកបានសំរាកព្យបាលនៅទីនោះរហូតដល់ជាងកន្លះខែ បច្ចុប្បន្នកំពុងបន្តព្យបាលនៅពេទ្យឯកជនខេត្តស្ទឹងត្រែង។
លោកបញ្ជាក់ថា ជនបង្កដែលត្រូវកងរាជអាវុធហត្ថចាប់បាននោះ បានត្រូវដោះលែងវិញហើយ ទើបលោកប្តឹងដោយផ្ទាល់មកលោកព្រះរាជអាជ្ញា ដើម្បផ្តន្ទាទោសជនបង្កនិងបក្ខពួក។
ប្រភពបានបង្ហាញថាៈ លេខទូរស័ព្ទ ០៧១ ២០៨ ៧៧៧៧ គឺជាលេខរបស់លោកតុល មីនា កន្លងមកអ្នកសារព័ត៌មានបានធ្លាប់ទាក់ទងរកចម្លើយតប ជុំវិញពាក្យបណ្តឹងខាងលើ ប៉ុន្តែម្ចាស់លេខទូរស័ព្ទបានបដិសេធន៍ថា មិនមែនឈ្មោះតុល មីនា ទេ ។ ដោយមិនអស់ចិត្ត នៅថ្ងៃទី២៨ ខែកុម្ភៈនេះ អ្នកកាសែតបានធ្វើការទំនាក់ទំនងម្តងទៀត ប៉ុន្តែមិនត្រូវបានម្ចាស់ទូរស័ព្ទលើកនោះទេ។
សូមបញ្ជាក់ថា ករណីគ្រោះថ្នាក់ចរាចរខាងលើនេះ គឺបានកើតឡើងតាំងពីថ្ងៃទី២៤ ខែមករា ឆ្នាំ២០១៧មកម្ល៉េះ រហូតមកដល់ពេលនេះ លោកតុល មីនា ត្រូវសាច់ញាតិជនរងគ្រោះបញ្ជាក់ថា មិនទាន់ផ្តល់សំណងណាមួយដែលអាចទទួលយកបាននៅឡើយទេ។ គេសង្ឃឹមថា អយ្យការសាលាដំបូងខេត្តរតនគិរីនឹងចាត់វិធានការសមស្របតាមវិធានច្បាប់ នៅក្នុងករណីខាងលើនេះ។ អ្នកសារព័ត៌មាន នឹងព្យាយាម ដើម្បីទាក់ទងរងចម្លើយតបវិញ ពីលោកតុល មីនា នាពេលក្រោយទៀត៕
ដោយៈ យឹម សារិទ្ធិ
