ខេត្តរតនគិរី ៖ បុរសម្នាក់ដែលគេដឹងថា មានប្រពន្ធនិងកូនពីរនាក់ហើយនោះ បានធ្វើអោយគេភ្ញាក់ផ្អើលដោយសារតែមានស្ត្រីម្នាក់បានជិះម៉ូតូដេញតាមឡានបុរសនោះ ហើយឈប់ម៉ូតូហក់តោងទ្វារឡាន រួចរបូតដៃធ្លាក់ចូលកង់ក្រោយបាក់ភ្លៅខ្ទេច ពេលបុរសនោះបើកឡានចេញបន្តិច។
ហេតុការណ៍នេះបានកើតឡើងកាលពីល្ងាចថ្ងៃទី២៥ កុម្ភៈ នៅចំណុចរង្វង់មូលបឹងយក្សឡោម ក្រុងបានលុង ខេត្តរតនគិរី។ ក្រោយហេតុការណ៍កើតឡើងទើបដឹងថា បរុសបើកឡាននោះជាប្តីស្ត្រីរងគ្រោះនោះ។
សាក្សីបញ្ជាក់ថាៈ នៅក្រោយពេលស្ត្រីនោះធ្លាក់ចូលក្រោមកង់ឡានខាងក្រោយ គេឃើញបុរសជាប្តីចុះមកបីត្រកងស្ត្រីនោះ ដាក់ទៅក្នុងរថយន្តដែលបុរសនោះបានដឹកប្រពន្ធចុងនៅក្នុងឡាននោះស្រាប់។
សាក្សីបន្តថា ស្ត្រីនោះបានរងរបួសបាក់ភ្លៅខ្ទេច ត្រូវប្តីដឹកទៅអោយគ្រូខ្មែរព្យាបាល។ ប៉ុន្តែអ្វីគួរអោយអាណិតគឺកូនតូចនៅពេលដែលបានឃើញម្តាយត្រូវរថយន្តរបស់ឪពុកកិនជើងឆ្វេងបាក់ខ្ទេចនោះ គេបានស្រែកយំអោបម្តាយទាំងភ័យតក់ស្លុតទឹកភ្នែកហូររហាម យំនោះគឺយំមិនបាត់ទាល់តែសោះ។
បុរសជាប្តីដែលជាជនបង្កនោះឈ្មោះ ហេង ឌី និយាយថា គាត់មិនមានបំណងចង់អោយមានគ្រោះថ្នាក់ទេ វាជារឿងចៃដន់ មិនដឹងថានាងហក់តោងទ្វារឡាននោះសោះ ហើយប្រពន្ធចុងក៏បានលែងលះគ្នាប៉ុន្មានឆ្នាំកន្លងទៅហើយ ក៏ប៉ុន្តែតែពេលនេះគាត់គ្រាន់តែចង់ជូននាងទៅផ្ទះតែប៉ុណ្ណោះ ។
លោកប្រាប់ថាៈ ប្រពន្ធដើមលោកមានឈ្មោះ សុខ ចំរើន អាយុ៤៤ឆ្នាំ រៀបការជាមួយគ្នាជាង២០ឆ្នាំហើយ បានកូនស្រីច្បងអាយុ១៦ឆ្នាំ និងកូនប្រុសអាយុ ៥ឆ្នាំ។ ចំណែកប្រពន្ធចុងវិញ ក៏នៅជាមួយគ្នាបានកូនមួយផងដែរ តែបានលែងលះគ្នាយូរឆ្នាំមកហើយ ហើយគេក៏មានប្តីក្រោយទៀតដែរ ហើយក៏នៅទាក់ទងគ្នាតាមទូរស័ព្ទដើម្បីវេលុយចិញ្ចឹមកូនស្រីនោះជាធម្មតា សព្វថ្ងៃគឺរស់នៅជាមួយប្រពន្ធដើមទេ ។ តែរឿងហេតុដែលកើតឡើងនេះគឺដោយសារតែប្រពន្ធដើមខ្លាចខ្ញុំនៅទាក់ទងជាមួយប្រពន្ធចុងទៀត ទើបនាងជិះម៉ូតូដេញតាមទាល់តែកើតរឿងគ្រោះថ្នាក់បែបនេះតែម្តង៕
ដោយ យឹម សារិទ្ធ
