បន្ទាយមានជ័យៈ មន្ត្រីប៉ូលីស សេដ្ឋកិច្ចខេត្ត បន្ទាយមានជ័យម្នាក់ ឈ្មោះ រស់អៀមត្រូវបានគេរាយការណ៍ថា៖កំពុងល្បីខ្លាំង ពូកែខាងជំរិតទារប្រាក់ ពីម្ចាស់ឃ្លាំងស្តុបឥវ៉ាន់ក្នុងខេត្តនិងស្ទាក់ចាប់រថយន្តដឹកទំនិញឲ្យបង់លុយប្រចាំខែនិងដេញរថយន្តដឹកគ្រញូងយ៉ាងកក្រើកតែមិនដែលឃើញមានការបង្ក្រាបអ្វីឡើយ។
ប្រភពព័ត៌មាន ក្រុមអាជីវករម្ចាស់ស្តុបទំនិញក្នុង ខេត្តបន្ទាយមានជ័យ បានបង្ហើបប្រាប់ថា រាល់ថ្ងៃនេះពួកគាត់ ពិបាក រកស៊ីណាស់ព្រោះតែត្រូវបង់ពន្ធចូលរដ្ឋផងហើយបែជាមាន មន្ត្រី ប៉ូលីស សេដ្ឋកិច្ចខេត្ត បន្ទាយមានជ័យដែលគេស្គាល់ថាឈ្មោះ រស់អៀមដែលជាកូនចៅលោកចាបសុផារិទ្ធប្រធានការិយាល័យនគរបាលសេដ្ឋកិច្ចខេត្ត បានមក កោសរូស ទារប្រាក់ពីពួកគាត់ទៀត ។ មន្ត្រីប៉ូលិសរូបនេះគេគិតពីម្ចាស់ឃ្លាំង ក្នុងរថយន្ត១គ្រឿង១០ដុល្លា ក្នុង១ខែ ។ បើចឹងនៅក្នុងឃ្លាំងមួយៗ មានរថយន្តមិនតិចជាង១០គ្រឿងឡើយហើយបើគិតឃ្លាំងនៅក្នុងខេត្តបន្ទាយមានជ័យមិន ក្រោម ៣០ឃ្លាំងនោះឡើយដែលជាចំណូលរបស់លោករស់អៀមសំរាប់ចែកជាមួយមេកើយ។
ប្រភពបន្តឲ្យដឹងទៀតថា ក្រៅតែពីដើរកោសរូស ទារប្រាក់ប្រចាំខែពីម្ចាស់ឃ្លាំងស្កុបទំនិញក្នុងខេត្ត ក្រុមប៉ូលីសសេដ្ឋកិច្ចដែលដឹកនាំដោយលោករស់អៀមនោះបានដាក់ប៉ុស្តិ៍ត្រួតពិនិត្យឬហៅថាកុងត្រូលជជុះនៅចំណុចជិតមន្ទីពន្ធដារបន្ទាយមានជ័យស្ថិតនៅភូមិក្បាលស្ពានសង្កាត់ព្រះពន្លា ក្រុងសិរីសោភ័ណខេត្តបន្ទាយមានជ័យ។ដើម្បី ស្ទាក់ចាប់រថយន្តដឹកឈើរ គ្រញូង និងរថយន្តដឹកទំនិញ ផ្សេងៗដើម្បីអោយចូលបង់លុយកាក់ ហើយរថយន្តណាបើកហួស មិនបានចូលបង់ គឺក្រុមប៉ូលីស សេដ្ឋកិច្ច ខេត្តនេះដេញចាប់ដូចចោរអញ្ចឹង។
អ្នកបើកបររថយន្តដឹក ឥវ៉ាន់ និងផ្លែឈើរបន្តិចបន្តួចបានត្អូញត្អែរថា ពួកគាត់រាល់ថ្ងៃនេះរកប្រាក់ចំណេញមិនឃើញទេព្រោះតែត្រូវបង់លុយកាក់ជូនសមត្ថកិច្ចតាមដងផ្លូវស្ទើរគ្រប់ស្ថាប័ន ទៅហើយបែជាលោករស់អៀមដែលជាប៉ូលីសសេដ្ឋកិច្ច នេះបានចាប់រថយន្តនិងគំរាមកំហែងទារប្រាក់ចំនួន៥០ម៉ឺន រៀលបើមិនព្រមបង់អោយនឹងបញ្ជូនទៅតុលាការហើយមិនចង់វែងឆ្ងាយនាំឲ្យខាតកាងារពួកគាត់ក៏សម្រេចចងការប្រាក់គេមកបង់ជូនទើបលោកអៀមដោះលែង ។
ដោយឡែក កន្លងមកមានព័ត៌មានលេចលឺថា លោក រស់ អៀមនេះបានជំរិតទារប្រាក់ពីថៅកែទំនិញក្នុងក្រុងសិរីសោភ័ណម្នាក់ដោយទារប្រាក់៤០០ដុល្លាទៀតផង ។
ជុំវិញករណីនេះ សារព័ត៌មានយើងមិនអាចសុំការបំភ្លឺពីលោករស់អៀមបានទេ ។ លោកអាត់ខែមស្នងការខេត្តបន្ទាយមានជ័យបានប្រាប់ថា ជុំវិញបញ្ហាដាក់កុងត្រូលកាក់ទារប្រាក់ ខាងលើនេះ វាមិនមែនជាគោលការណ៍របស់នគរបាលជាតិឲ្យដាក់ ប៉ុស្តិ៍ខុសច្បាប់ទេ គួរតែអ្នកសារព័ត៌មានទៅសួរលោក រស់ អៀម ផ្ទាល់តែម្តងទៅ ។ ហើយក្រែងលោកអ្នករកស៊ីខុសច្បាប់ដឹងទើបគេចាប់ឲ្យបង់លុយ(ស៊ិក) ។ បើអ្នករកស៊ីណាថាទារប្រាក់ខុសច្បាប់គួរតែដាក់ប្តឹងមក ។ ទោះជាយ៉ាង យើងរង់ចាំទទួលការបកស្រាយរបស់លោក រស់ អៀមពិសេស លោក ចាប សុផារិទ្ធ ប្រធានការិយាល័យនគរបាលសេដ្ឋកិច្ចនៃស្នងការនគរបាលខេត្តបន្ទាយមានជ័យជុំវិញការចោទប្រកាន់ជានិច្ច ៕
