ខេត្តរតនគិរី ៖ រថយន្តបង្កុងមួយគ្រឿងដឹកបទល្មើសព្រៃឈើនិXងគោយន្តកែច្នៃមួយគ្រឿងត្រូវកងរាជអាវុធហត្ថខេត្តនិងកងរាជអាវុធហត្ថបរកែវ ចាប់បង្ក្រាបខណរថយន្តនោះលួចដឹកបទល្មើសព្រៃឈើចូលទៅក្នុងក្រុមហ៊ុនមួយ។
ការចុះបង្ក្រាបនេះធ្វើឡើងនៅវេលាម៉ោង១០និង៤៥នាទី ព្រឹកថ្ងៃទី២៤ កុម្ភៈ ម្សិលមិញ ដឹកនាំកំលាំងដោយវរៈសេនីយ៍ត្រី ឃី សុខា ប្រធានមន្ទីរបច្ចេកទេសសន្តិសុខអាវុធហត្ថខេត្ត ក្រោមបញ្ជាផ្ទាល់ពីលោកឧត្តមសេនីយ៍ត្រី គឹម រស្មី មេបញ្ជាការកងរាជអាវុធហត្ថខេត្តរតនគិរី ។
របាយការណ៍អោយដឹងថា កំលាំងកងរាជអាវុធហត្ថខេត្តចំនួន០៣នាក់ និងកងរាជអាវុធហត្ថស្រុកបរកែវចំនួន០៤នាក់ បានចុះបង្ក្រាបរថយន្តបង្កុងមួយគ្រឿងដឹកឈើ ប្រភេទសុក្រម និងប្រភេទផ្ចឹក ចំនួន០៦កំណាត់ស្មើនឹង ៧.១៤៤ម៉ែត្រត្រីគុណ ។
របាយការណ៍អោយដឹងថា ការបង្ក្រាបគឺធ្វើឡើងនៅភូមិសមុទ្រលើ ឃុំសេដា ស្រុកលំផាត់ ក្នុងទឹកដីក្រុមហ៊ុនហ្ស៊ូមវ៉ាង ខេមបូឌា អ៊ិនវេសម៉ិន ដែលជាដៃគូអភិវឌ្ឍន៍ជាមួយក្រុមហ៊ុនរ័ត្នសាខន ។
មេបញ្ជាការកងរាជអាវុធហត្ថខេត្តរតនគិរី លោកឧត្តមសេនីយ៍ត្រី គឹម រស្មី បានថ្លែងក្នុងបទសំភាសន៍ នៅព្រឹកថ្ងៃទី២៥ កុម្ភៈនេះថាៈ ទម្រាំឈានដល់ការបង្ក្រាប រថយន្តដឹកបទល្មើសឈើមួយគ្រឿងនេះ គឺបានជួបឧបសគ្គជាមួយប្រជាពលរដ្ឋ ដែលអាចនិយាយបានថា ជាអ្នកកាងបទល្មើសអោយឈ្មួញ ធ្វើសកម្មភាពរារាំងជាមួយកំលាំងសមត្ថកិច្ច ដូចជាធ្វើការឡោមព័ទ្ធ ផឹកស្រាស្រវឹងអុកឡុកសមត្ថកិច្ច ក្នុងគោលបំណងរំដោះវត្ថុតាង។
លោកបញ្ជាក់ថា កំលាំងសមត្ថកិច្ចមានតែចំនួន០៧នាក់ ពុំអាចរំដោះវត្ថុតាងបានឡើយ ទើបបញ្ជាអោយបន្ថែមកំលាំង ដោយប្រើប្រាស់រយៈពេលពីរថ្ងៃ ទើបអាចរំដោះវត្ថុតាងនោះបាន ។
លោកបញ្ជាក់ថា ភូមិចំនួនពីរដែលមានព្រំប្រទល់ជាប់ស្រុកលំផាត់ និងស្រុកអូរយ៉ាដាវ ពលរដ្ឋនៅតំបន់នោះតែងធ្វើសកម្មភាពប្រាសចាកពីនីតិវិធីច្បាប់ ដូចជា មានប្រដាប់ដោយដំបង កាំបិត ពូថៅ និយាយរួមសំភារៈប្រើប្រាស់បទល្មើសយកទៅគំរាមកំហែង ឬឡោមព័ទ្ធ និងវាយទៅលើរថយន្តសមត្ថកិច្ចឬរថយន្តអ្នកកាសែតជាដើម ។
ជាក់ស្តែង កន្លងមក មន្ត្រីបរិស្ថានធ្លាប់ត្រូវពួកនេះធ្វើសកម្មភាពចាប់វាយ ចាប់ចងវាយបណ្តើរជាមួយយោធា និងធ្លាប់ឡោមព័ទ្ធរថយន្តអ្នកកាសែត និងវាយរថយន្តអ្នកកាសែតជាដើម។ រួចហើយពួកគេតែងតែចាប់មនុស្សដែលគ្រាន់តែជាមនុស្សសង្ស័យថាជាសមត្ថកិច្ចឬថាជាអ្នកកាសែតប្រគល់ទៅរដ្ឋបាលគ្រប់គ្រងជាដើម ដែលសកម្មភាពខាងលើវាហាក់បីដូចជាធ្វើឡើងស្របទៅតាមនីតិវិធីច្បាប់អញ្ចឹង ?។
ឧត្តមសេនីយ៍ត្រី គឹម រស្មី បានរៀបរាប់ថា មុននឹងឈានទៅបង្ក្រាបរថយន្តដឹកបទល្មើឈើ និងរថយន្តកែច្នៃខាងលើនេះ គឺសមត្ថកិច្ចបានប្រើប្រាស់គ្រប់រូបភាព និងគ្រប់មធ្យោបាយទាំងអស់ ធ្វើយ៉ាងណារឹបអូសយកវត្ថុតាងអោយខាងតែបាន បើទោះបីត្រូវជួបឧបសគ្គធ្ងន់ធ្ងរយ៉ាងណាក៏ដោយ។
ប្រភពពីប្រជាពលរដ្ឋដែលទើបនឹងរាយការណ៍កាលពីល្ងាចថ្ងៃទី២៤ កុម្ភៈ ថាៈ មានសកម្មភាពកាប់បំផ្លាញព្រៃឈើនៅតំបន់នោះយ៉ាងរង្គាល ហើយពលរដ្ឋមួយចំនួនធំនៅទីនោះតែងធ្វើការតវ៉ា និងមួយចំនួនតូចត្រូវឈ្មួញទិញទឹកចិត្ត ដែលតែងតែធ្វើសកម្មភាពប្រឆាំងរារាំងជាមួយសមត្ថកិច្ច នៅពេលដែលមានការចុះបង្ក្រាបម្តងៗ។
ឧត្តមសេនីយ៍ត្រី គឹម រស្មី បានមានប្រសាសន៍ម៉ឺងម៉ាត់ថាៈ នឹងធ្វើការបង្ក្រាបនូវរាល់បទល្មើសព្រៃឈើទាំងឡាយ ស្របតាមបទបញ្ជារបស់ឯកឧត្តម នាយឧត្តមសេនីយ៍ សៅ សុខា មេបញ្ជាការកងរាជអាវុធហត្ថលើផ្ទៃប្រទេស ដែលជាប្រធានគណៈកម្មការបង្ក្រាបធនធានធម្មជាតិ ខណៈមានសកម្មភាពបំផ្លាញព្រៃឈើគ្រប់រូបភាពណាមួយ។ ចំណែកវត្ថុតាងរថយន្តនិងឈើ បានប្រគល់ទៅឲ្យជំនាញខណ្ឌរដ្ឋបាលព្រៃឈើនៅព្រឹកថ្ងៃដដែលនេះហើយ៕
ដោយៈ យឹម សារិទ្ធ
