មណ្ឌលគិរី ៖លោក ស្វាយ សំអ៊ាង អភិបាលខេត្តមណ្ឌលគិរី បានបញ្ជារជំនាញបរិស្ថានដកដីព្រៃសហគមន៍ចំនួន២៣ហិកតា ដែលលោក យន់ សារ៉ោម ប្រធានមន្ទីរអភិវឌ្ឍន៍ជនបទខេត្តនេះ បានកាប់រានយកធ្វើជាកម្មសិទ្ធិ។
ការបញ្ជាការរបស់ឯកឧត្តមអភិបាលខេត្តនេះ បានធ្វើឡើងតាមរយៈចំណារលើរបាយការណ៍របស់មន្ទីរបរិស្ថាន បន្ទាប់គណៈកម្មការចុះត្រួតពិនិត្យករណីលោកយន់ សារ៉ោម ប្រធានមន្ទីរអភិវឌ្ឍន៍ជនបទកាប់រានដីព្រៃសហគមន៍ នៅភូមិស្រែអ៊ី សង្កាត់រមនា ក្រុងសែនមនោរម្យ បានរកឃើញថា លោកយន់ សារ៉ោម បានកាប់រានដីព្រៃរបស់សហគមន៍ចំនួន២៣ ហិកតា។
សូមបញ្ជាក់ថា លោកយន់ សារ៉ោម ប្រធានមន្ទីរអភិវឌ្ឍន៍ជនបទ ខេត្តមណ្ឌលគិរី រងការចោទប្រកាន់ពីសហគមន៍ចំនួន២ នៅសង្កាត់ រមនា ក្រុងសែនមនោរម្យ ថា ដីព្រៃសហគមន៍ ជាង១០០ហិចតា នៅភូមិស្រែអ៊ី សង្កាត់រមនា ក្រុងសែនមនោរម្យ ខេត្តមណ្ឌលគិរី កំពុងប្រើអំណាចកាប់រុករានទន្ទ្រានយកធ្វើជាកម្មសិទ្ធផ្ទាល់ខ្លួនយ៉ាងរំភើយគ្មានញញើតច្បាប់ឡើយ បើទោះបីដីព្រៃនោះស្ថិតនៅក្រោមការគ្រប់គ្រងរបស់ក្រសួងបរិស្ថានឬគ្រប់គ្រងដោយរដ្ឋបាលព្រៃឈើក៏ដោយ។
លោក កែវ សុភគ៌ ប្រធានមន្ទីរបរិស្ថានខេត្តមណ្ឌលគិរីបានឲ្យដឹងថា លោកពិតជា បានទទួលចំណាររបស់ឯកឧត្តមអភិបាលខេត្តឲ្យដកដីព្រៃពីលោកយន់ សារ៉ោម ដែលគណៈកម្មការចម្រុះបានរកឃើញចំនួន២៣ ហិកតានេះមែន។
ទោះបីយ៉ាងណា លោកប្រធានមន្ទីរបរិស្ថាន បានបញ្ជាក់ថា មន្ទីរជំនាញបរិស្ថានរបស់លោកបានធ្វើរបាយការណ៍ជូនព្រះរាជអាជ្ញាអមសាលាដំបូងខេត្តមណ្ឌលគិរីរួចហើយ។ ជាមួយគ្នានេះ លោកកែវ សុភគ៌ បានបញ្ជាក់ថា លោកនឹងបញ្ជូនសំណុំរឿងពាក់ពន្ធ័ការកាប់រានដីព្រៃរបស់លោកយន់ សារ៉ោម ទៅតាមផ្លូវច្បាប់។
ទាក់ទងករណីខាងលើនេះលោក សូ សុវិទ្យា ព្រះរាជអាជ្ញារងតុលាការខេត្តមណ្ឌលគិរី បានឲ្យដឹងថា តំណាងអយ្យបានទទួលរបាយការណ៍របស់មន្ទីរបរិស្ថានរួចហើយ ។ ប៉ុន្តែ មិនទាន់បានទទួលបានសំណុំរឿងដែលមន្ទីរជំនាញបញ្ជូនមកនៅឡើយ៕ ឌឺម សឿន
