ក្រចេះ ៖ អំពើហិង្សាបង្កឡើងពីជនមិនស្គាល់មុខ បានលបវាយស្ត្រីចំណាស់ម្នាក់នឹងដំបងឈើជ្រុង បណ្តាលឲ្យរងរបួសក្បាលធ្ងន់ធ្ងរ ត្រូវបានគេបញ្ជូនទៅមន្ទីរពេទ្យ ។ ហេតុការណ៍បានកើតឡើងនៅភូមិអំពិលទឹកឃុំកំពង់ចាមស្រុកសំបូរខេត្តក្រចេះកាលពីយប់ថ្ងៃទី២១ខែកុម្ភៈឆ្នាំ២០១៧។
សមត្ថកិច្ចស្រង់សម្តីសាក្សីបានឲ្យដឹងថា មុនកើតហេតុឈ្មោះ អ៊ាប គឹមហេង ភេទស្រីអាយុ៥៨ឆ្នាំមានទីលំនៅភូមិអំពិលទឹកឃុំកំពង់ចាមស្រុកសំបូរខេត្តក្រចេះកំពុងអង្គុយច្រកស្ករនៅលើផ្ទះហើយឈ្មោះវង ណានភេទស្រី អាយុ៨៨ឆ្នាំ (ជរា) ត្រូវបងប្អូនជាជីដូនមួយហើយបានដេកជាមួយ នៅផ្ទះឈ្មោះអ៊ាប គឹមហេង។ តែដេករានផ្ទះខាងក្រោយ ខណៈឈ្មោះ វង ណាន ដេកលក់ ឈ្មោះអ៊ាបគឹមហេង ស្រែកហៅវង ណាន ឲ្យជួយ ព្រោះត្រូវគេវាយនឹងដំបងចំក្បាលបណ្តាលឲ្យបែក។
ប្រភពបានបន្តថា ពេលនោះ ឈ្មោះវង ណាន អត់ឮ ព្រោះត្រចៀកថ្លង់ ឈ្មោះអ៊ាប គឹមហេង ក៏លូនទៅកន្លែង ឈ្មោះវង ណានដេក ហើយឈ្មោះវង ណាន បានចាប់ដៃឈ្មោះ អ៊ាបគឹមហេង មានសភាពត្រជាក់និង ស្ទាបក្បាល មានឈាម ក៏បានស្រែកហៅកូនក្មួយដែលរស់នៅជិតគ្នាអោយជួយ ហើយ និងបញ្ចូន ឈ្មោះ អ៊ាប គឹមហេង (ជនរងគ្រោះ) មកមន្ទីរពេទ្យសំបូរ ដោយស្ថានភាពជនរងគ្រោះមានសភាពធ្ងន់ ក៏ត្រូវបញ្ចូនបន្តទៅមន្ទីរបង្អែកខេត្តក្រចេះតែម្ដង។
បន្ទាប់ពីករណីខាងលើនេះកើតឡើង កម្លាំងនគរបាលជំនាញស្រុកសំបូរ និង កម្លាំងនគរបាលប៉ុស្តិ៍កំពង់ចាម បានចុះទៅដល់កន្លែងកើតហេតុ ធ្វើការស៊ើបអង្កេត និងស្រាវជ្រាវស្វែងរកមុខសញ្ញា ដែលវាយឈ្មោះ អ៊ាប គឹមហេងឲ្យរងរបួសអត់ដឹងមូលហេតុ ។ នៅកន្លែងកើតហេតុមាន បន្សល់ឈើបួនជ្រុងលើផ្ទះជនរងគ្រោះមួយកំណាត់ និង នៅកាំជណ្ដើរមួយកំណាត់៕
