ខេត្តព្រៃវែង ៖ គ្រោះថ្នាក់ចរាចរណ៍បង្កឡើងដោយខ្លួនឯង បានបណ្តាលឲ្យរថយន្តស៊េរីទំនើបមួយគ្រឿងក្រឡាប់ផ្ងារជើង ព្រោះតែបួងចង្កូតជ្រុលគេចពីម៉ូតូ តែមិនបង្កគ្រោះថ្នាក់ដល់អាយុជីវិតឬរងរបួសទេ គ្រាន់តែខូចខាតរថយន្ត ។ ហេតុការណ៍នេះបានកើតឡើងកាលពីវេលាម៉ោង១១ថ្ងៃត្រង់ ថ្ងៃទី២១ ខែកុម្ភៈ ឆ្នាំ២០១៧ នៅលើផ្លូវជាតិលេខ៨ ស្ថិតក្នុងភូមិពោធិ៍សាបាង ឃុំរាប ស្រុកពារាំង ខេត្តព្រៃវែង ។
សាក្សីនៅកន្លែងកើតហេតុបានឲ្យដឹងថា មុនពេលកើតហេតុគេឃើញរថយន្តម៉ាកឡិចស៊ីស៣០០ ពណ៌ខ្មៅ ពាក់ស្លាកលេខកំពង់ចាម2A-7394 បើកក្នុងទិសដៅពីកើតមកលិច ។ លុះធ្វើដំណើរមកដល់ចំណុចកើតហេតុ ស្រាប់តែរថយន្តបួងចង្កូតគេចពីម៉ូតូ១គ្រឿង ហើយក៏ជាន់ហ្វ្រាងបង្ខំបណ្ដាលឲ្យក្រឡាប់ នៅក្បែរចិញ្ចើមផ្លូវមុខផ្ទះប្រជាពលរដ្ឋក្នុងភូមិ ។
អ្នកបើករថយន្តត្រូវបានស្គាល់ឈ្មោះ គង់ ឡុង ភេទប្រុស អាយុ៣៨ឆ្នាំ មានទីលំនៅភូមិជ្រៃផ្សារ ឃុំជ្រៃស្រុកស្វាយអន្ទរ ខេត្តព្រៃវែង រួមដំណើរជាមួយប្រពន្ធ និងកូនស្រី អាយុ៤ឆ្នាំ ។
អធិការនគរបាលស្រុកពារាំង លោក ស៊ឹម កុសល បានប្រាប់ឲ្យដឹងថា ករណីគ្រោះថ្នាក់ចរាចរណ៍ខាងលើនេះគឺមកពីអ្នកបើកបររថយន្ត បួងចង្កូតបង្ខំំ គេចពីម៉ូតូ១គ្រឿង មិនស្គាល់ម៉ាក ក៏បណ្តាលឲ្យក្រឡាប់តែម្តង តែមិនបង្កគ្រោះថ្នាក់ដល់អាយុជីវិតឡើយ ដោយគ្រាន់តែ ខូចខាតរថយន្តតែប៉ុណ្ណោះ ៕