ក្រចេះ៖ នៅព្រឹកថ្ងៃទី២១ ខែគុម្ភៈ ឆ្នាំ២០១៧ មន្ទីរទេសចរណ៍ខេត្តក្រចេះ មានរៀបចំបើកវគ្គបណ្ដុះបណ្ដាលស្ដីពី បដិសណ្ឋារកិច្ច និងសេវាកម្មសណ្ឋាគារ ផ្ទះសំណាក់ ម្ហូបអាហារ និងភេសជ្ជៈ ក្រោមអធិបតីភាព ឯកឧត្តម ប៉ាក់ សុខុម រដ្ឋលេខាធិការក្រសួងទេសចរណ៍ និងឯកឧត្តម ខ័ណ្ឌ ចំណាន អភិបាលរងខេត្តក្រចេះ ។
វគ្គសិក្ខាសាលានេះ មានសិក្ខាកាមចូលរួមសរុបចំនួន ១៣១នាក់ មកពីគ្រប់មន្ទីរ ស្ថាប័ន អង្គភាពពាក់ព័ន្ធនានា ផ្នែកឯកជន និងសិស្សនិស្សិតនៅសកលវិទ្យាល័យគ្រប់គ្រង និងសេដ្ឋកិច្ចជាច្រើននាក់ ប្រព្រឹត្តិណ៍ទៅមានរយៈពេល ៣ថ្ងៃចាប់ពីថ្ងៃទី២១ ដល់ថ្ងៃទី២៣ ខែគុម្ភៈ ឆ្នាំ២០១៧ នៅសកលវិទ្យាល័យគ្រប់គ្រង និងសេដ្ឋកិច្ច ខេត្តក្រចេះ ។
ឯកឧត្តម ខ័ណ្ឌ ចំណាន អភិបាលរងខេត្ត បានមានប្រសាសន៍ថា ខេត្តក្រចេះ ជាខេត្តដែលមានសក្ដានុពលទេសចរយ៉ាងច្រើន ហើយត្រូវបានឯកឧត្តមអភិបាលនៃគណៈអភិបាលខេត្ត កំណត់យកវិស័យទេសចរជាវិស័យអាទិភាពមួយ ក្នុងចំណោមវិស័យសំខាន់ៗ ជាអាទិភាពរបស់ខេត្ត ។ ជាពិសេសខេត្តក្រចេះ មានសត្វផ្សោតទន្លេមេគង្គ មានអាគារពីសម័យបារាំង ផ្ទះខ្មែរបុរាណ ។ ទន្ទឹមនឹងនោះ វិស័យទេសចរ បានចូលរួមចំណែកយ៉ាងសកម្មក្នុងការចូលរួមអនុវត្តកម្មវិធីអភិវឌ្ឍន៍សេដ្ឋកិច្ចខេត្ត និងចូលរួមដោយផ្ទាល់ដល់ប្រជាពលរដ្ឋ តាមសហគមន៍ទេសចរ តំបន់រមណីយដ្ឋានទេសចរ និងតាមរយៈការផ្ដល់ឱកាសការងារ និងមុខរបរ បានចូលរួនអនុវត្តគោលនយោបាយរបស់រាជរដ្ឋាភិបាលសំដៅលើការកាត់បន្ថយភាពក្រីក្ររបស់ប្រជាពលរដ្ឋ ។
ជាមួយគ្នានោះ ឯកឧត្តម ប៉ាក់ សុខុម រដ្ឋលេខាធិការក្រសួងទេសចរណ៍ បានមានប្រសាសន៍លើកឡើងថា ក្រសួង មន្ទីរទេសចរណ៍ខេត្ត ជាមួយស្ថាប័នពាក់ព័ន្ធ និងផ្នែកឯកជន បើកវគ្គសិក្ខាសាលានេះឡើង គឺក្នុងគោលបំណង់ពង្រឹងចំនេះដឹងជូនដល់ម្ចាស់និងអ្នកបម្រើការងារតាមមូលដ្ឋានអាជីវកម្ម សេវាកម្មទេសចរណ៍ដូចជា ភោជនីយដ្ឋាន អាហាររដ្ឋាន សណ្ឋាគារ ផ្ទះសំណាក់ និងសេវាកម្មផ្សេងៗដែលបម្រើឲ្យវិស័យទេសចរណ៍ឲ្យកាន់តែមានសេវាល្អប្រកបដោយគុណភាពប្រសទ្ធិភាព ទាំងចំណេះដឹង និងចំណេះធ្វើ ឆ្លើយតបទៅនឹងចលនាប្រឡងប្រណាំង ទីក្រុងស្អាត រមណីយដ្ឋានស្អាត សេវាល្អ បដិសណ្ឋាកិច្ចល្អ ដើម្បីពង្រឹងគុណភាពអប់រំបណ្ដុះបណ្ដាល និងពង្រឹងសត្ថភាពដល់ម្ចាស់ អ្នកគ្រប់គ្រង និងបុគ្គលិកដែលធ្វើការងារពាក់ព័ន្ធផ្ទាល់ ហើយក៏ជាការបង្កើតធនធានមនុស្សក្នុងវិ ស័យទេសចរណ៍ ទទួលបាននូវភាពទាក់ទាញភ្ញៀវចូលមកកាន់ខេត្តក្រចេះកាន់តែច្រើនឡើងៗ ៕