ខេត្តរតនគិរី ៖ ប្ដីប្រពន្ធពីរនាក់ ត្រូវកងរាជអាវុធហត្ថឃាត់ខ្លួន ពេលដែលពួកគេត្រូវសមត្ថកិច្ចរកឃើញថា បានរក្សាទុក ចែកចាយ និងសេពសារធាតុញៀន។
វរៈសេនីយ៍ត្រី ហៃ វណ្ណរ៉ា មេបញ្ជាការកងរាជអាវុធក្រុងបានលុង ក្រោមការសម្របសម្រួល និងសហការណ៍ពី លោក រ៉ាប៉ូរ៉ាន់ឌី ព្រះរាជអាជ្ញារងអមសាលាដំបូងខេត្ត និងការចង្អុលបង្ហាញ ពីឧត្ដមសេនីយ៍ត្រី គឹមរស្មី មេបញ្ជាការកងរាជអាវុធហត្ថខេត្តរតនគិរីផងនោះ នៅវេលម៉ោង ៩ព្រឹក២០កម្ភៈនេះ កម្លាំងបានឃាត់មុខសញ្ញាពីរនាក់ប្ដីប្រពន្ធ ដែលរក្សាទុកចែកចាយ និងសេពសារធាតុញៀន នៅចំណុចភូមិ ជ័យជំនះសង្កាត់ឡាបានសៀក ក្រុងបានលុង។
វត្ថុតាងដែលឃាត់បានរួមមាន មនុស្សពីរនាក់ប្ដីប្រពន្ធឈ្មោះ ឈៀង សំណាង អាយុ ៤៤ឆ្នាំ មុខរបរ រត់ម៉ូតូឌុប និងប្រពន្ធឈ្មោះ ឈឿន សេងហុង អាយុ៣៦ឆ្នាំ មុខរបរមេផ្ទះ និងវត្ថុតាងសារធាតុញៀនចំនួន ២កញ្ចប់ធំ និង១២កញ្ចប់តូច សរុប១៤កញ្ចប់ ម៉ូតូមួយគ្រឿង រួមទាំងថវិការ និងសម្ភារៈសេពមួយចំនួនទៀត។
លោក ហៃ វណ្ណរ៉ា ឲ្យដឹងថា ដោយយោយតាមយុទ្ធនាការ ស្ដីពិការត្រួតពិនិត្យ និងផលប៉ះពាល់នៃ ការប្រើប្រាស់ គ្រឿងញៀនរបស់សម្ដេចក្រឡាហោម ស ខេង និងបទបញ្ជារបស់ឯក៉ត្ដមនាយឧត្ដមសេនីយ៍ សៅ សុខា មេបញ្ជាការកងរាជអាវុធហត្ថលើផ្ទៃប្រទេស កងរាជអាវុធហត្ថក្រុងបានលុងបានខិតខំក្ដាប់មុខសញ្ញា រួមទាំងផ្ដល់ព័ត៌មាន និងការសហការណ៍ពីប្រជាពលរដ្ឋផងនោះ ទើបធ្វើឲ្យកម្លាំងរបស់លោកឈានទៅបង្ក្រាប នូមុខសញ្ញាខាងលើនេះ។
ការឃាត់ខ្លួនអ្នករក្សាទុក ចែកចាយ និងសេពសារធាតុញៀននេះ គឺស្របពេលដែលមានការផ្សព្វផ្សាយ ពីការប្រយុទ្ធប្រឆាំងគ្រឿងញៀន ពីកងរាជអាវុធហត្ថខេត្តរតនគិរី ដែលកំពង់ធ្វើនៅតាមបណ្ដាស្រុកផ្សេងៗ ទាំងស្រុក៨ស្រុក ក្រុងមួយ ក្នុងខេត្តរតនគិរី ដើម្បីឲ្យប្រជាពលរដ្ឋយល់កាន់តែច្បាស់ពីគ្រោះថ្នាក់នៃការប្រើប្រាស់សារធាតុញៀននេះ ហើយក្រោយការផ្សព្វផ្សាយ គេរំពឹងថា នឹងមានការថយចុះ ពីការប្រើប្រាស់គ្រឿងញៀន នៅទូទាំងប្រទេស៕
ដោយ យឹម សារិទ្ធិ
