ខេត្តមណ្ឌលគិរី ៖ លោកប្រធានមន្ទីរអភិវឌ្ឍន៍ជនបទ ខេត្តមណ្ឌលគិរី រងការចោទប្រកាន់ពីសហគមន៍ចំនួន២ នៅសង្កាត់រមនា ក្រុងសែនមនោរម្យ ថាដីព្រៃសហគមន៍ ជាង១០០ហិកតា នៅភូមិស្រែអ៊ី សង្កាត់រមនា ក្រុងសែនមនោរម្យ ខេត្តមណ្ឌលគិរី សព្វថ្ងៃត្រូវអ្នកមានអំណាចម្នាក់មានតួនាទីជាប្រធានមន្ទីរអភិវឌ្ឍន៍ជនបទ ខេត្តមណ្ឌលគិរី ឈ្មោះ យន់ សារ៉ោម កំពុងប្រើអំណាចកាប់រុករានទន្ទ្រានយកធ្វើជាកម្មសឹទ្ធផ្ទាល់ខ្លួនយ៉ាងរំភើយគ្មានញញើតច្បាប់ឡើយ បើទោះបីដីព្រៃនោះស្ថិតនៅក្រោមការគ្រប់គ្រងរបស់ក្រសួងបរិស្ថានឬគ្រប់គ្រងដោយរដ្ឋបាលព្រៃឈើក៍ដោយ ។ ព័ត៌មានខាងលើនេះត្រូវបានបែកធ្លាយដឹងលឺដល់អាជ្ញាធរ័ខេត្តមណ្ឌលគិរីហើយនៅថ្ងៃទី៦ ខែកុម្ភៈឆ្នាំ២០១៧នេះ។
ទោះបីជាយ៉ាងណាក៏ដោយរដ្ឋបាលសាលាខេត្តមណ្ឌលគិរីកំពុងរៀបចំគាណៈកម្មការចំរុះរបស់ខេត្តចុះទៅពិនិត្យដល់ទីតាំងក្នុងតំបន់ដីព្រៃកំពុងរងការកាប់បំផ្លាញនោះហើយ និងចាត់វិធានការណ៍តាមផ្លូវច្បាប់នៅព្រឹកថ្ងៃទី៧ខែកុម្ភៈឆ្នាំ២០១៧ស្អែកនេះ។
ស្របពេលដែលព័ត៌មាននេះត្រូវបានបែកធ្លាយ មហាជនទូទាំងខេត្តស្នើរឲ្យលោករដ្ឋមន្ត្រីក្រសួងបរិស្ថាន លោក សាយ សំអាល់ ជួយចាត់ចែងឲ្យមន្ត្រីជំនាញរបស់ក្រសួងធ្វើការស្រាវជ្រាវនិងចាត់វិធានការតាមផ្លូវច្បាប់ផងបើពុំដូច្នោះទេតំបន់ដែនជម្រកខាងលើចេះតែរួមតូចទៅៗក៍ដូចជាដីព្រៃគ្រប់គ្រងដោយរដ្ឋបាលព្រៃឈើផងដែររងការរុករានយ៉ាងអនាធិបតេយ្យ ដោយសារមន្ត្រីមានអំណាចខិលខូចមួយចំនួនធ្វើព្យុះភ្លៀងតាមតែអំពើចិត្ត។
លោក រយើម ផ្យើល ប្រធានសហគមន៍សហគមន៍ជនជាតិភាគតិចព្នងសហគមន៍ការពារ ព្រៃឈើនៅភូមិពូត្រុំទី២ លោក ត្រក់ ពើក ប្រធានសហគមន៍ចុះបញ្ជីដីធ្លីជនជាតិដើមភាគតិចព្នងស្រែអ៊ីនិងលោកមេភូមិក៍ដូចជាប្រជាពលរដ្ឋទាំងពីរភូមិខាងលើបានសម្តែងនូវការព្រួយបារម្ភយ៉ាងខ្លាំងរឿងបាត់បង់ដីព្រៃសហគមន៍ ដោយសារមន្ត្រីមានអំណាចដូចជាលោកយន់ សារ៉ោម ប្រធានមន្ទីរអភិវឌ្ឍន៍ជនបទខេត្តមណ្ឌលគិរីកំពុងកាប់រុករានទន្រានយកដីខាងលើរហូតជាង១០០ហិចតាហើយគ្មានការរំខានពីសមត្ថកិច្ចឬមន្ត្រីជំនាញឡើយ។
ទាក់ទងករណីខាងលើនេះលោក យន់ សារ៉ោម ប្រធានមន្ទីរអភិវឌ្ឍន៍ជនបទខេត្តដែលរងការចោទប្រកាន់ អ្នកយកព័ត៌មានយើងមិនអាចសុំការបំភ្លឺបានទេដោយសារមិនស្គាល់លេខទូរស័ព្ទ។
លោក ស្វាយសំអ៊ាង អភិបាលខេត្តមណ្ឌលគិរីបានថ្លែងប្រាប់ឲ្យដឹងនៅថ្ងៃទី៦ខែកុម្ភៈឆ្នាំ២០១៧នេះថា រដ្ឋបាលសាលាខេត្តនៅថ្ងៃទី៧ខែកុម្ភៈឆ្នាំ២០១៧និងរៀបចំក្រុមគណៈកម្មការចំរុះរបស់ខេត្ត ក្នុងនោះមានមន្ត្រីសាលាខេត្ត ក្រុង និងមន្ត្រីជំនាញ ចុះពិនិត្យនៅទីតាំងនោះនិងចាត់ការតាមផ្លូវច្បាប់ ។
លោក កែវ សុភគ៌ ប្រធានមន្ទីរបរិស្ថានខេត្តមណ្ឌលគិរីបានប្រាប់នៅរសៀលថ្ងៃនេះថា លោកនិងមន្ត្រីរបស់លោកនៅថ្ងៃស្អែកនេះនិងចុះទៅទីនោះដើម្បីពិនិត្យឲ្យបានជាក់លាក់ឈានទៅអនុវត្តតាមនិតិវិធីច្បាប់បន្ត ៕
ឌឹ មសឿន
