ដើម្បីថែរក្សាការពារ រាលសមិទ្ធិផលទាំងឡាយ ដែលខេត្តបាត់ដំបងសម្រេចបានពិសេស លើសកម្មភាពការងារ ប្រឡង ប្រណាំងទីក្រុងស្អាត ដែលទទួលបានពិន្ទុនាំមុខទូទាំងប្រទេស ផ្ការំដួល ៣ទង ឱ្យបានស្ថិតស្ថេរគង់វង្ស ឯកឧត្តម ច័ន្ទ សុផល អភិបាល នៃគណអភិបាលខេត្តបាត់ដំបង ក្រោមការចូលរួមពីមន្ត្រីសាលាខេត្ត សាលក្រុង លោកគ្រូ សិស្សនិស្សិត សហការសហព័ន្ធយុវជន កីឡា ខេត្តបាត់ដំបងជាច្រើន រូបបានចូលរួមធ្វើអនាម័យសំអាតបរិស្ថាន រើសសំរាមនៅតាមទីធ្លា សួនច្បារ ឯកឧត្តម ស ខេង ឧបនាយករដ្ឋមន្ត្រីក្រសួងមហាផ្ទៃ និងជាតំណាងរាស្ត្រមណ្ឌលបាត់ដំបង ត្រើយខាងកើតដងស្ទឹងសង្កែ ពេលព្រឹកថ្ងៃទី ៩ ខែតុលា ឆ្នាំ២០១៤ នេះ។
ក្រោយពីពិធីប្រណាំងទូក អបអរសាទរ បុណ្យចេញព្រះវស្សាបណ្តែតប្រទីប ដែលជាប្រពៃណីរបស់ប្រជាពលរដ្ឋ រយៈពេល ២ថ្ងៃ គឺចាប់ពីថ្ងៃទី ៧ ដល់ថ្ងៃទី៨ ខែតុលា ឆ្នាំ២០១៤ កន្លងទៅថ្មីៗនេះ យើងមើលឃើញយ៉ាងច្បាស់ ពីទិដ្ឋភាពនៅតាមទីធ្លា ទាំង ខាងលិច និងខាងកើត ដងស្ទឹងសង្កែ ពោរពេញទៅដោយសំរាមកាកសំណល់ យ៉ាងច្រើនឥតគណនា ដែលស្តែងចេញមកពីការ យល់ដឹង នៅមានកំរិតរបស់ប្រជាពលរដ្ឋយើង។
សកម្មភាពនេះបញ្ជាក់ឱ្យឃើញពីការយកចិត្តទុកដាក់របស់រដ្ឋបាលខេត្តដែលកន្លងមកស្ទើរតែពុំមានសោះនូវសកម្មភាព ដែលថ្នាក់ដឹកនាំខេត្ត ធ្វើអនាម័យដើររើសសំរាមផ្ទាល់ ក្រោយពីពិធីប្រណាំងទូករួច។ដូចនេះសូមឱ្យគ្រប់មជ្ឍដ្ឋាននៃព្រជាពលរដ្ឋ យុវវ័យសូមមេត្តាចូលរួមបានយ៉ាងសស្រាក់សស្រាំ ជាមួយអាជ្ញាធរយើង ពេលដើរកំសាន្ត រឺ នៅតាមផ្ទះរាល់កាកសំណល់សំរាម កុំបោះចោលពាសវាលពាសកាល ត្រូវវេចខ្ចប់ឱ្យបានត្រឹមត្រូវដាក់ចូលក្នុងធុងសំរាម ឱ្យបានគ្រប់ៗគ្នា។ សកម្មភាពនេះ មិនត្រឹតែ ធ្វើឱ្យពិន្ទុ នៃការការប្រឡងប្រណាំងទីក្រុងស្អាត ផ្ការំដួល៣ទង ស្ថិតស្ថេរគង់វង្សប៉ុណ្ណោះទេ ថែមទាំងធ្វើឱ្យទីក្រុងបាត់ដំបងយើង មានសោភ័ណភាពស្រស់បំព្រង ទាក់ទាញភ្ងៀវទេសចរណ៍ កាន់តែច្រើន ធ្វើឱ្យជីវភាពធូធារ ពិសេសផ្តល់នូវសុខភាពយ៉ាងល្អដល់ យើងគ្រប់ៗគ្នា ទៀតផង ៕
