ខេត្តរតនគិរី៖ វិវាទដីធ្លីមួយកន្លែងស្ថិតនៅភូមិ២ សង្កាត់កាចាញ ក្រុងបានលុង ខេត្តរតនគិរី រវាង លោក សេង ប៊ុនធឿន(ប្រជាពលរដ្ឋ) និង ឯកឧត្តម វ៉ាន់ សោភា ប្រធានមន្ទីរមុខងារសាធារណៈខេត្តរតនគិរី និងជាទីប្រឹក្សា ក្រសួងមុខងារសាធារណៈ ដែលទើបតែងតាំង មានឋានៈស្មើនឹងអគ្គនាយក បានចាប់ផ្តើមកើតឡើងចាប់តាំងពី ដើមខែមករា ឆ្នាំ២០១៧ ដោយសារ ឯកឧត្តមរូបនេះ មិនបានគោរពទៅតាមការសន្យារបស់ខ្លួនចំពោះការប្រគល់ ប្រាក់បង្គ្រប់ចំនួន ១០២.០០០ដុល្លារអាមេរិក ជូនភាគីម្ចាស់ដី (លោក សេង ប៊ុនធឿន) តាមកាលកំណត់ និងបាន អូសបន្លាយពេលម្តង ពីរដង ជាបីដង មិនចេះចប់ ។ នៅក្នុងកិច្ចសន្យា ដែលរៀបចំឡើងដោយភាគី ឯកឧត្តម វ៉ាន់ សោភា ដែលគេដាក់ការសង្ស័យថា ជាកិច្ចសន្យាដែលមិនមានសង្គតិភាពជាមួយច្បាប់បានចែងថា “លិខិតទទួល ប្រាក់កក់ ខ្ញុំបាទឈ្មោះ សេង ប៊ុនធឿន ភេទប្រុស កើតនៅឆ្នាំ១៩៦០ ជនជាតិខ្មែរ សញ្ជាតិខ្មែរកាន់ អត្តសញ្ញាណប័ណ្ណសញ្ជាតិខ្មែរលេខ ២៤០១០៣៦៩៨ និងឈ្មោះ ឈុន អេង ភេទស្រី កើតនៅឆ្នាំ១៩៨១ ជនជាតិខ្មែរ សញ្ជាតិខ្មែរ ត្រូវជាប្រពន្ធ មានទីលំនៅបច្ចុប្បន្នភូមិ៤ សង្កាត់កាចាញ ក្រុងបានលុង ខេត្តរតនគិរី ដែលមានលេខប្លង់កាន់កាប់លេខ AIII 026០ ដែលមានទំហំ ១៤៣.១១២ ម៉ែត្រការ៉េ បានទទួលប្រាក់កក់ ថ្លៃដីពីឈ្មោះ វ៉ាន់ សោភា ភេទប្រុស កើតនៅឆ្នាំ១៩៨៣ និងប្រពន្ធឈ្មោះ យាន ប្រាថ្នា ភេទស្រី កើតនៅឆ្នាំ១៩៨៥ មានទីលំនៅបច្ចុប្បន្ន ភូមិអូររមៀត សង្កាត់ឡាបានសៀក ក្រុងបានលុង ខេត្តរតនគិរី ។ ដែលមានទឹកប្រាក់សរុប ១០២.០០០$(ដប់ម៉ឺនពីរពាន់ដុល្លារអាមេរិក) ប្រាក់កក់ចំនួន ១០.០០០$ ជាអក្សរ (មួយម៉ឺនដុល្លារអាមេរិក) ហើយ សងបង្គ្រប់នៅថ្ងៃទី០១ ខែមករា ឆ្នាំ២០១៧ អ្នកទិញនឹងចូលគ្រប់គ្រងបន្តពីថ្ងៃទី០១ ខែធ្នូ ឆ្នាំ២០១៦ ។ កិច្ចសន្យា នេះ ត្រូវបានធ្វើឡើងដោយមានការព្រមព្រៀងពីភាគីទាំងសង្ខាង ដោយគ្មានការបង្ខិតបង្ខំពីភាគីណាមួយឡើយ ដើម្បីជាការទុកចិត្តទាំងអស់គ្នា ខ្ញុំបាទ/នាងខ្ញុំ សូមផ្តិតមេដៃស្តាំទុកជាភស្តុតាង ។ ធ្វើនៅរតនគិរី ថ្ងៃទី២៩ ខែវិច្ឆិកា ឆ្នាំ២០១៦ ។ ស្នាមេដៃរបស់៖ អ្នកលក់ដី សេង ប៊ុនធឿន(ប្តី) ឈុន អេង(ប្រពន្ធ) អ្នកទិញដី វ៉ាន់ សោភា(ប្តី) យាន ប្រាថ្នា(ប្រពន្ធ) សាក្សីទី១ ស៊ឹម ស៊ីបញ្ញា សាក្សីទី២ ងួន សុធា។” (មានឯកសារជូនភ្ជាប់) ។
គួរបញ្ជាក់ដែរថា៖លោក សេង ប៊ុនធឿន និងឈ្មោះ ឈុន អេង ជាភរិយា ជាម្ចាស់កម្មសិទ្ធិអចលនវត្ថុ(ដីធ្លី)លេខ AIII 026០ ស្មើនឹងទំហំផ្ទៃដីសរុប ១៤៣.១១២ ម៉ែត្រការ៉េ នៅចំណុចភូមិ២ សង្កាត់កាចាញ ក្រុងបានលុង ខេត្តរតនគិរី ដែលបានកាន់កាប់ចាប់តាំងពីឆ្នាំ២០០៨ មកម្ល៉េះ ។ ឈ្មោះ សេង ប៊ុនធឿន និងឈ្មោះ ឈុន អេង ជាភរិយា បានធ្វើការដាំដុះកៅស៊ូចាប់តាំងពីឆ្នាំ២០០៩ រហូតមកដល់ពេលនេះ កៅស៊ូមានអាយុកាលប្រមាណ ជាង ០៦ឆ្នាំហើយ និងបានប្រមូលផលនៅក្នុងអំឡុងឆ្នាំ២០១៣ រហូតដល់បច្ចុប្បន្ន ។
តាមការបញ្ជាក់អះអាងពី លោក សេង ប៊ុនធឿន និងឈ្មោះ ឈុន អេង ជាភរិយា ថា ពួកគាត់អក្ខរកម្មភាសាខ្មែរ និងមានមនោសញ្ចេតនា ច្រើន ម្យ៉ាងដោយភាពទំនុកចិត្ត ទើបមានការធ្វេសប្រហែសចំពោះខ្លឹមសារនៃកិច្ចសន្យានេះ ពួកគាត់បានចាត់ទុក កិច្ចសន្យានេះជាការឆបោក ដើរខ្សែលើ និងបានចែងយកប្រៀបឈ្នះ ទៅលើ ០៣ ចំណុចគឺ ទី១.មិនមានចែងអំពី កាលបរិច្ឆេទនៃការអាសារបង់ប្រាក់កក់ ប្រសិនបើភាគីអ្នកទិញបង់ប្រាក់បង្គ្រប់លើសពេលវេលាកំណត់ ទី២.ភាគី អ្នកទិញចូលគ្រប់គ្រងមុនពេលវេលាបង់ប្រាក់បង្គ្រប់រយៈពេល ០១ខែ ទី៣.សាក្សីទាំង០២រូប គឺជាមនុស្សរបស់ភាគី អ្នកទិញ ។
ពួកគាត់បានបន្តទៀតថា៖ ឯកឧត្តម វ៉ាន់ សោភា បានលើកពេលបង់ប្រាក់បង្គ្រប់ចំនួន ០៣លើក ដែល លើសរយៈពេលដែលត្រូវបង់បង្គ្រប់ចំនួន ០៩ ថ្ងៃ ដូច្នេះពួកគាត់មិនអាចរង់ចាំបន្តទៅ
ទៀតបានទេ ដោយសារមូល ហេតុ ឯកឧត្តម វ៉ាន់ សោភា មិនគោរពតាមកាលបរិច្ឆេទដែលត្រូវបង់ប្រាក់បង្គ្រប់ ១០២.០០០ដុល្លារអាមេរិក នៅថ្ងៃទី០១ ខែមករា ឆ្នាំ២០១៧ ទើបនៅថ្ងៃទី០៩ ខែមករា ឆ្នាំ២០១៧ ពួកគាត់បានត្រឡប់ចូលទៅគ្រប់គ្រងលើ ដីចំការ និងកៅស៊ូរបស់ខ្លួនជាប្រក្រតីឡើងវិញ ពីព្រោះកិច្ចសន្យានោះ ត្រូវបានអស់សុពលភាពផ្លូវច្បាប់(មោឃភាព ដោយស្វ័យប្រវត្តិតាមអំណាចនៃច្បាប់ស្តីពីកិច្ចសន្យា) ចាប់តាំងពីថ្ងៃទី០១ ខែមករា ឆ្នាំ២០១៧ មកម្ល៉េះ ដូច្នេះ ឯកឧត្តម វ៉ាន់ សោភា មិនទាន់មានសិទ្ធិស្របច្បាប់ក្នុងការគ្រប់គ្រង ឬចាត់ចែងអ្វីទាំងអស់នៅលើទីតាំងដីចំការកៅ ស៊ូនោះ ។
ពួកគាត់បានបន្តទៀតថា៖ កាលពីរសៀលថ្ងៃទី០៩ ខែមករា ឆ្នាំ២០១៧ ពួកគាត់បានចូលទៅគ្រប់គ្រង ចំការកៅស៊ូរបស់ពួកគាត់វិញ និងបានចាត់ចែងលក់ជ័រកៅស៊ូដូចធម្មតា ស្រាប់តែនៅម៉ោងប្រមាណជា ០៣៖៣០ នាទីរសៀល មានកម្លាំងកងរាជអាវុធហត្ថក្រុងបានលុងមួយក្រុមប្រដាប់ដោយកាំភ្លើង ដឹកនាំដោយ លោក ហៃ វណ្ណារ៉ា មេបញ្ជាការPMក្រុងបានលុង បានចុះមកដល់ទីតាំងចំការកៅស៊ូរបស់ពួកគាត់ និងបានចោទពួកគាត់ថាជា ចោរលួចជ័រកៅស៊ូរបស់ ឯកឧត្តម វ៉ាន់ សោភា តាមការប្តឹងផ្ទាល់មាត់តាមទូរស័ព្ទរបស់ ឯកឧត្តម វ៉ាន់ សោភា ទៅវិញ និងបានហាមឃាត់ពួកគាត់មិនឲ្យលក់ជ័រកៅស៊ូនោះទេ ។
សំណួរសួរថា៖ តើធ្វើដូចម្តេចទើបកម្លាំង PM ក្រុងបានលុង អាចដឹងបានថា អ្នកណាជាម្ចាស់ ហើយអ្នកណាជាចោរ
បើគ្មានឯកសារគតិយុត្តិសម្អាងផ្លូវច្បាប់ ផងហ្នឹង? ហេតុអ្វីបានPMក្រុងបានលុង ហ៊ានសន្មត់ថា៖ លោក សេង ប៊ុនធឿន ដែលជាម្ចាស់កម្មសិទ្ធិ អចលនវត្ថុ(ដីធ្លី)លេខ AIII 026០ ថាជាចោរ ហើយសន្មត់ថា ឯកឧត្តម វ៉ាន់ សោភា គឺជាម្ចាស់នៃអចលនវត្ថុនេះ?
ផ្តើមចេញពីការរំលោភលើកិច្ចសន្យា រំលោភលើទំនុកចិត្ត និងការប្រើប្រាស់កម្លាំងខុសច្បាប់ ទៅរំលោភបំពាន និង រារាំងដល់ម្ចាស់អចលនវត្ថុស្របច្បាប់ ទើបនៅថ្ងៃទី១២ ខែមករា ឆ្នាំ២០១៧ លោក សេង ប៊ុនធឿន បានសម្រេច ចិត្តដាក់ពាក្យបណ្តឹងចូលទៅអយ្យការអមសាលាដំបូងខេត្តរតនគិរី ប្តឹង ឯកឧត្តម វ៉ាន់ សោភា ប្រធានមន្ទីរមុខងារ សាធារណៈខេត្តរតនគិរី និងជាទីប្រឹក្សាក្រសួងមុខងារសាធារណៈ ពីបទ “ប៉ះពាល់កម្មសិទ្ធិ និងសិទ្ធស្របច្បាប់ ផ្សេងទៀតលើអចលនវត្ថុ និងប្រើអំពើហឹស្សាទៅលើអ្នកកាន់កាប់អចលនវត្ថុដោយសុចរិត” និង ប្តឹង លោក ហៃ វណ្ណារ៉ា មេបញ្ជាការ PM ក្រុងបានលុង ពីបទ “ប្រើអំណាចដោយរំលោភ ទោះមានបញ្ជា ឬគ្មានបញ្ជា ដើម្បី ដកហូរអចលនវត្ថុពីអ្នកកាន់កាប់ដោយសន្តិភាព” ។ (មានឯកសារភ្ជាប់)
កាលពីថ្ងៃទី០៩ ខែមករា ឆ្នាំ២០១៧ នាថ្ងៃកើតហេតុ យុវជនខ្មែរព័ត៌មាន ក៏បានចុះទៅយកព័ត៌មានជាក់ស្តែង ទាន់សភាពការណ៍ផងដែរ និងបានថតផ្តិតយករូបភាពពីសកម្មភាពរបស់ក្រុមកងកម្លាំងPMក្រុងបានលុង ចុះមក ចាប់ហាមឃាត់ការអាស្រ័យផល(លក់ជ័រកៅស៊ូ)របស់ លោក សេង ប៊ុនធឿន ដែលជាម្ចាស់កម្មសិទ្ធិស្របច្បាប់ លើអចលនវត្ថុ យកមកចុះផ្សាយនៅថ្ងៃទី១០ ខែមករា ឆ្នាំ២០១៧ ។ បន្ទាប់ពីការចុះផ្សាយ យុវជនខ្មែរព័ត៌មាន (លោក ទិត្យ ឦសាន) ត្រូវបាន ឯកឧត្តម វ៉ាន់ សោភា ប្តឹងពីបទ “បរិហាកេរ្តិ៍ជាសាធារណៈ” ទៅអយ្យការ អមសាលាដំបូងខេត្តរតនគិរី ដែលរឿងក្តីនេះ កំពុងតែដំណើរការនីតិវិធីមិនទាន់ចប់សព្វគ្រប់ផង ក៏ស្រាប់តែលេច ចេញនូវការប្តឹងមួយករណីផ្សេងទៀតផ្ទួនៗ មកលើ លោក ទិត្យ ឦសាន ដោយចោទពីបទ “លួច” ទៀត ចំណែក ខាងអយ្យការវិញ ចំណាត់ការបណ្តឹងរបស់ ឯកឧត្តម វ៉ាន់ សោភា លឿនដូចផ្លេកបន្ទោរ ខណៈដែលបណ្តឹងរបស់ លោក សេង ប៊ុនធឿន ដែលជាម្ចាស់កម្មសិទ្ធិស្របច្បាប់លើអចលនវត្ថុ ប្តឹង ឯកឧត្តម វ៉ាន់ សោភា ជាងមួយខែមក ហើយ ប៉ុន្តែខាងអយ្យការនៅសម្ងំស្ងៀមមិនទាន់មានចំណាត់ការនៅឡើយ ? សំណួរសួរថា៖ តើរវាងពាក្យបណ្តឹង របស់ លោក សេង ប៊ុនធឿន និងបណ្តឹងរបស់ ឯកឧត្តម វ៉ាន់ សោភា ពាក្យបណ្តឹងណាមួយគួរមានចំណាត់ការ ជាអាទិភាពមុន? ខណៈដែល លោក សេង ប៊ុនធឿន មានប័ណ្ណរឹង ចំណែក ឯកឧត្តម វ៉ាន់ សោភា មានតែកិច្ច សន្យាមិនប្រក្រតី និងអស់សុពលភាពផ្លូវច្បាប់មួយសន្លឹកតែប៉ុណ្ណោះ ហើយបានតាំងខ្លួនជាម្ចាស់ដីស្របច្បាប់ ? បើរកម្ចាស់ដីស្របច្បាប់មិនទាន់ឃើញផង ហេតុម្តេចក៏ខាងអយ្យការវែករកមុខចោរជាមុន? តើរបស់ដែលអ្នកអនុវត្ត ច្បាប់ចោទថាចោរលួចនោះ ការពិតជារបស់អ្នកណា? ឬមួយចោរស្រែកឲ្យចាប់ចោរ???
លោក ទិត្យ ឦសាន ត្រូវបានរងការបោទប្រកាន់ផ្លូវច្បាប់ចំនួន ០២ ករណី ផ្សេងគ្នា ពីសំណាក់ ឯកឧត្តម វ៉ាន់ សោភា ប្រធានមន្ទីរមុខងារសាធារណៈខេត្តរតនគិរី និងជាទីប្រឹក្សាក្រសួងមុខងារសាធារណៈ ប្តឹងនៅក្នុងរឿងវិវាទដី ធ្លីតែមួយរវាង លោក សេង ប៊ុនធឿន និងឯកឧត្តម វ៉ាន់ សោភា ដែលខាងតុលាការខេត្តរតនគិរី ដោយចៅក្រម ឈ្មោះ………………………. នឹងកោះហៅឲ្យចូលខ្លួន ក្នុងសវនាការ នាថ្ងៃទី២៤ ខែកុម្ភៈ ឆ្នាំ២០១៧ ខាងមុខ ពីបទ “បរិហាកេរ្តិ៍ជាសាធារណៈ” និងចូលខ្លួនតាមដីកា កោះរបស់តំណាងអយ្យការ អមសាលាដំបូងខេត្ត ដោយព្រះរាជ អាជ្ញារង ម៉ម វណ្ណដា បំភ្លឺពីបទ “លួច” នៅថ្ងៃទី២២ ខែកុម្ភៈ ឆ្នាំ២០១៧ ផងដែរ ។
ពាក់ព័ន្ធជាមួយអ្នកសារព័ត៌មាននៅក្នុងខេត្តរតនគិរី ត្រូវបានថ្នាក់ដឹកនាំកំពូលក្នុងខេត្តរតនគិរីនេះ ចាត់ទុកជាសត្រូវ ជាឆ្អឹងទទឹងក និងជាបន្លាក្នុងកែវភ្នែក ដែលត្រូវតែកម្ចាត់ចោល និងត្រូវតែដកចេញ ឲ្យខាងតែបាន ហើយចំពោះ លោក ទិត្យ ឦសាន អគ្គនាយករង ទទួលបន្ទុកនិពន្ធនាយក ប្រចាំការនៅក្នុងខេត្តរតនគិរី គឺជាមុខសញ្ញាក្តៅក្នុង ការសរសេរព័ត៌មានបកអាក្រាតរឿងអាស្រូវនានាពាក់ព័ន្ធជាមួយបទល្មើសគ្រប់ប្រភេទនៅក្នុងខេត្ត រាយការណ៍ជូន សម្តេចតេជោ នាយករដ្ឋមន្ត្រី ហើយក៏ត្រូវទទួលរងនូវការគម្រាមកំហែងសុខសុវត្ថិភាពគ្រប់រូបភាពមកលើរូបលោក ពីសំណាក់កងកម្លាំង សមត្ថកិច្ច និងជំនាញពាក់ព័ន្ធ ទាំងក្នុង និងក្រៅប្រព័ន្ធច្បាប់ ។ គ្រប់ទង្វើរបស់ថ្នាក់ដឹកនាំ ខេត្ត និងមន្ត្រីពាក់ព័ន្ធមកលើក្រុមអ្នកសារព័ត៌មាន ពិសេស មកលើរូប លោក ទិត្យ ឦសាន គឺអាចចាត់ទុកថាជា ចេតនាមួយដើម្បីគម្រាមកំហែង ក្នុងគោលដៅវាយបំបាក់ស្មារតីអ្នកសារព័ត៌មាន ដែលយើងអាចដាក់ការសង្ស័យ បានថា ករណី ឯកឧត្តម វ៉ាន់ សោភា ប្តឹងលោក ទិត្យ ឦសាន ០២ករណី ផ្ទួនៗគ្នាលើកនេះ ក៏អាចមានការជាប់ ពាក់ព័ន្ធជាមួយករណីផ្សេងៗទៀត ដែលធ្វើមកលើក្រុមអ្នកសារព័ត៌មាននាពេលកន្លងមក ?
ក្នុងនាមជនរងគ្រោះម្នាក់ សង្ឃឹមទុកជាមុនថា ខាងអយ្យការ ក៏ដូចជាតុលាការនឹង អនុវត្តច្បាប់ដោយតម្លាភាព ត្រឹមត្រូវ និងយុត្តិធម៌(នៅត) ៕