បន្ទាយមានជ័យ ៖យោងតាមរបាយការណ៍បឋមរបស់សមត្ថកិច្ចបានឲ្យដឹងថា នៅយប់ថ្ងៃទី១៣កុម្ភៈវេលាម៉ោង២២ និង៥០នាទី មានហេតុការណ៍គ្រោះថ្នាក់ចរាចរណ៏មួយនៅផ្លូវលំចាក់បេតុងត្រង់ចំណុចស្តង់ជ្រូកស្ថិតក្នុងភូមិបាលិលេយ្យ២សង្កាត់និងក្រុង ប៉ោយប៉ែតខេត្តបន្ទាយមានជ័យ រវាងរថយន្តម៉ាក PICKUP FORD RANGER បានបើកបុកម៉ូតូចំនួន01គ្រឿង ហើយខ្ទាតទៅបុកម៉ូតូ និងម៉ូតូកង់បីមួយគ្រឿងទៀត បណ្តាលឲ្យមានមនុស្សស្លាប់២នាក់ ម្នាក់នៅនឹងកន្លែងនិងម្នាក់ទៀតស្លាប់នៅមន្ទីរពេទ្យ ។
សេចក្តីរាយការណ៏បានបន្តថា មុនកើតហេតុគេបានឃើញរថយន្ត01គ្រឿងម៉ាក PICKUP FORD RANGER) ពណ៌ស ពាក់ស្លាកលេខភ្នំពេញ 2AQ-0808 អ្នកបើកបរ ជាមន្ត្រីនគរបាល ឈ្មោះ ប៉ីណា ស៊ី បើកបរក្នុងគោលដៅពីទិសខាងលិចទៅកើត ដល់ផ្លូវបំបែកជាបួន ស្រាប់តែមានម៉ូតូ១គ្រឿងម៉ាកហុងដា ឌ្រីមសេ១២៥ពណ៌ខ្មៅ ពាក់ស្លាកលេខ បន្ទាយមានជ័យ 1M-2410 បើកបរដោយឈ្មោះ ស្រី នីភេទស្រីមានអាយុ១៨ឆ្នាំមុខរបរកម្មករ ដឹកមនុស្ស២នាក់ផង ហើយត្រូវបានរថយន្តបុកពេញទំហឹងខ្ទាតទៅប៉ះនិងម៉ូតូកង់៣ដែលបានចតចោលនឹងកន្លែង ។
សូមបញ្ជាក់ថា ហេតុការណ៏ដ៏រន្ធត់នោះ បានបង្កឲ្យយុវជនឈ្មោះ សំបូរហៅពៅមានអាយុ១៨ឆ្នាំពេលដឹកដល់មន្ទីរពេទ្យ ចំណែកក្មេងស្រីម្នាក់ទៀតឈ្មោះស្រី នីមានអាយុ១៨ឆ្នាំស្លាប់និងកន្លែង ហើយក្មេងស្រីម្នាក់ទៀតឈ្មោះ នរាណ៍ ភេទស្រី អាយុ១៧ឆ្នាំមុខរបរកម្មកររងរបួសធ្ងន់ អ្នកទាំងបីរស់នៅក្នុងភូមិគីឡូម៉ែត្រលេខ៤ សង្កាត់ផ្សារកណ្តាល ក្រុងប៉ោយបែត ខេត្តបន្ទាយមានជ័យ ។
ចំណែកប្រភពពីពលរដ្ឋដែលក្បែរហេតុការណ៏ខាងលើ បានឲ្យដឹងថា ក្រោយកើតហេតុសមត្ថកិច្ចបានមកដល់ ហើយបានចាប់អ្នកបើករថយន្តបង្កដាក់ខ្នោះដៃទៀតផង ព្រោះអ្នកបង្កទំនងជាស្រវឹងធ្លាក់ភ្នែក ហើយនៅជាប់ខ្លួនមានកាំភ្លើងផងដែរ មិនដឹងជាយ៉ាងមិចក្រោយមកស្រាប់តែជនបង្កចេះអាគមន៏សូត្របាលី ធើ្វឲ្យខ្នោះដៃត្រូវបានរហូតចេញធ្លាក់ឮសូរ្យតែគ្តុក រួចគេចខ្លួនបាត់ស្រមោលភ្លាមៗតែម្តង ។
ជុំវិញករណីគ្រោះថ្នាក់ដ៏កម្របានឃើញនេះ ពលរដ្ឋនៅក្រុងបោយបែតភាគច្រើនបានស្គាល់អត្តសញាណអ្នកបើកបររថយន្តហើយថា ម្ចាស់រថយន្ត មានលំនៅក្បែរផ្សារហ៊ុយឡេងជាប់និងរបងអាគារថ្មី(ហ្សូនសាប)ស្ថិតក្នុងភូមិអូរជ្រៅសង្កាត់និងក្រុងបោយបែត ។
ចំណែកប្រភពមួយផ្សេងទៀតបានបង្ហើបស្រដៀងគ្នាថា អ្នកបើកបររថយន្តបង្កមានឋានៈជាស្នងការរងកណ្តាលយុត្តិធម៌ នៃស្នងការខេត្តបន្ទាយមានជ័យ ដូច្នេះហើយបានជាក្រោយពីកើតហេតុជនបង្កមានទាំងកាំភ្លើងទៀតផង ហើយអ្វីដែលអស្ចារ្យនោះគឺជនខាងលើចេះបាលីជម្រុះខ្នោះទៀត ។
បើបែបនេះមែននោះគេមិនសង្ឃឹមថា អាណាព្យាបាលសពនឹងទទួលបានយុត្តិធម៌ តាមផ្លូវច្បាប់នោះឡើយ ព្រោះជនបង្កមានបុណ្យសក្តិខ្ពង់ខ្ពស់ ចំណែកជនរងគ្រោះទាំងស្លាប់និងរបួសផង សុទ្ធសឹងតែមានជីវភាពតោកយាកក្រីក្រ ។ ជាការពិតណាស់សូម្បីតែរថយន្តបង្កនោះ ក៏លោកអធិការនគរបាលក្រុងប៉ោយប៉ែតនាំយកទៅលាក់ទុកនៅប៉ុស្តិរដ្ឋាបាលសង្កាត់ផ្សារកណ្តាលដើម្បីឲ្យនៅឆ្ងាយពីក្រសែភ្នែកមហាជន ។
ក្នុងហេតុការណ៏គ្រោះថ្នាក់ខាងលើបានបង្ក ឲ្យមានមនុស្សស្លាប់២នាក់និងរងរបួសធ្ងន់ម្នាក់៕