ក្រចេះ៖ ផ្ទះប្រជាពលរដ្ឋចំនួន ០៦ខ្នងផ្ទះ ឋិតនៅចំណុចភូមិក្បាលស្នួល ឃុំស្នួល ស្រុកស្នួល ខេត្តក្រចេះ ត្រូវអគ្គីភ័យឆាប់ឆេះទាំងស្រុង កាលពីវេលាម៉ោង ២០:៣០ នាទីថ្ងៃទី១៤ ខែកុម្ភៈ ឆ្នាំ២០១៧ ។
ក្នុងប្រតិបត្តិការពន្លត់អគ្គីភ័យនេះក៏មានការដឹកនាំបញ្ជាផ្ទាល់ពីលោកឧត្តមសេនីយ៍ទោ លន់ សុផាត ស្នងការនគរបាលខេត្តក្រចេះ ដែលបានបញ្ជាកម្លាំងឲ្យជួយអន្តរាគមន៍ គ្រាដែលភ្លើងកំពុងរាលដាលពីផ្ទះមួយទៅផ្ទះមួយ ជិតដល់ផ្សារស្នួល ប៉ុន្តែត្រូវជួយអន្តរាគមន៍បានទាន់ពេលវេលា ដោយប្រើប្រាស់រថយន្តពន្លត់អគ្គីភ័យ ចំនួន ៣គ្រឿង និងបានប្រើប្រាស់ទឹកអស់ចំនួន ២០គ្រឿង ។
លោក ចាន់ សុគីម បានឲ្យដឹងថា ករណីអគ្គីភ័យ ភ្លើងឆេះផ្ទះ បានកើតឡើងចំនួន ០១លើក បណ្តាលអោយខូចខាតផ្ទះប្រជាពលរដ្ឋចំនួន ០៦ខ្នង ក្នុងនោះមាន ៖ ផ្ទះទី១ឈ្មោះ ស្លេះ ហ្សា ទំហំ៦,៥ម៉ែត្រx២៦ម៉ែត្រ ធ្វើអំពីឈើ ប្រកស័ង្កសី ទ្រព្យសម្បត្តិខូចខាតៈ ម៉ូតូចំនួន ០១គ្រឿង, កង់ចំនួន ០១គ្រឿង, ប្រាក់រៀលចំនួន ២,០០០,០០០រៀល (ពីរលានរៀលគត់) ខោអាវ និងសម្ភារៈក្នុងផ្ទះឆេះទាំងស្រុង។
-ផ្ទះទី២ឈ្មោះ ម៉ាត់ ស្លេះ ភេទប្រុស អាយុ ៣៣ឆ្នាំ ផ្ទះទំហំ ៥ម៉ែត្រx១០ម៉ែត្រ ធ្វើអំពីឈើប្រក ស័ង្កសី ទ្រព្យសម្បត្តិខូចខាត ប្រាក់រៀលចំនួន ១,៥០០,០០០រៀល (មួយរយហាសិបពាន់រៀលគត់) ខ្សែកមាសចំនួន ០២ជី, ខោអាវ និងសម្ភារៈក្នុងផ្ទះឆេះទាំងស្រុង ។
-ទី៣ ឈ្មោះ ម៉ាត់ រម៉ស្មះ ផ្ទះទំហំ ៤ម៉ែត្រx១០ម៉ែត្រ ធ្វើអំពីឈើប្រក ស័ង្កសី ទ្រព្យសម្បត្តិខូចខាត ប្រាក់ដុល្លាចំនួន៣០០០ដុល្លា(បីពាន់ដុល្លាគត់)ខោអាវ និងសម្ភារៈក្នុងផ្ទះឆេះទាំងស្រុង ។
-ទី៤ ឈ្មោះ វ៉ាន់ ក្រី ភេទប្រុស អាយុ៤២ឆ្នាំ ផ្ទះទំហំ៥ម៉ែត្រx៧ម៉ែត្រ ធ្វើអំពីឈើប្រកស័ង្កសី ម្ចាស់ផ្ទះមិននៅ ។
-ទី៥ ឈ្មោះ ហេង ថា ភេទប្រុស ផ្ទះទំហំ ៥ម៉ែត្រx៨ម៉ែត្រ ធ្វើអំពីឈើប្រក ស័ង្កសី ទ្រព្យសម្បត្តិខូចខាត (គ្មាន) ។
-ទី៦ ឈ្មោះ កុម អៀម ភេទប្រុស អាយុ ៤៩ឆ្នាំ ផ្ទះទំហំ ៥ម៉ែត្រx១៥ម៉ែត្រ ធ្វើអំពីឈើប្រក ស័ង្កសី ទ្រព្យសម្បត្តិខូចខាត ប្រាក់រៀលចំនួន ៥,០០០,០០០រៀល (ប្រាំលានរៀលគត់) ប្រាក់ដុល្លា ៦,០០០ដុល្លា (ប្រាំមួយពាន់ដុល្លាគត់) មាសចំនួន ០២តំឡឹង , ម៉ូតូចំនួន ០១គ្រឿង ខោអាវ និងសម្ភារៈក្នុងផ្ទះឆេះទាំងស្រុង ។ សរុបថវិកាក្នុងការខូចខាត: – ប្រាក់រៀលចំនួន ៨,៥០០,០០០ រៀល(ប្រាំបីលានហាសិបម៉ឺនរៀលគត់) -ជាប្រាក់ដុល្លាចំនួន ៩,០០០ដុល្លា(ប្រាំបួនពាន់ដុល្លា) – ម៉ូតូចំនួន ០២គ្រឿង, កង់ចំនួន ០១គ្រឿង, ខ្សែកមាស ចំនួន ២ជី, មាសចំនួន ០២តំឡឹង និងសម្ភារៈក្នុងផ្ទះមួយចំនួនទៀត ។
លោក បានបន្តថា មូលហេតុដែលបណ្តាលឲ្យអគ្គីភ័យកើតឡើង គឺនៅពុំទាន់ដឹងច្បាស់លាស់នៅឡើយទេ ដោយសមត្ថកិច្ចនគរបាលកំពុងស្រាវជ្រាវរកមូលហេតុ ៕
