កំពង់ឆ្នាំង ៖ កាលពីព្រឹកថ្ងៃទី០៨ ខែកុម្ភៈ ឆ្នាំ២០១៧លោកវន ស៊ីផា អភិបាលស្រុកសាមគ្គីមានជ័យ បានដឹកនាំក្រុមកាងារដែលមានលោក ដួង ឌី អធិការរងនគបាលស្រុកសាមគ្គីមានជ័យ លោកទា កុំមេឃុំខ្នាឆ្មា លោកឈឹម សំអាតមេប៉ុស្ដិរដ្ឋបាលខ្នាឆ្មានិងមន្ត្រីការិយាល័ធម្មការស្រុកព្រមទាំងគណៈកម្មការ អាចារ្យវត្តបឹងខ្នា ចុះទៅសម្រប សម្រួលដោះស្រាយករណី ទំនាស់ដីធ្លីរ៉ាំរ៉ៃមួយកន្លែង នៅមុខវត្តបឹងខ្នារវាងប្រជាពលរដ្ឋនិងព្រះសង្ឃ ។
ក្នុងរឿងនេះប្រជាពលរដ្ឋម្ចាស់ដីឈ្មោះជា ស៊ុនលី(ហៅយាយនាង)បានចោទថាព្រះគ្រូចៅអធិការវត្តបឹងខ្នាព្រះនាម(នួន ស៊ីណាត់)បានឃុបឃិតគ្នាជាមួយមេឃុំខ្នាឆ្មាគឺលោក ទា កុំរំលោភយកដីកេរ្ដិ៍របស់គាត់តាំងពីដូនតាព្រមទាំង កាប់បំផ្លាញផលដំណាំនិងដកបង្គោលរបងព្រុំដីរបស់គាត់បំបាត់ភស្ដុតាងទៀតផង។
បើយោងតាមការអោយដឹងពីប្រជាពលរដ្ឋបានបង្ហើបថា ដំបូងព្រះសង្ឃឈ្មោះនួន ស៊ីណាត់រំលោភយកដីដោយបានអោយកូននេនកាប់ដើមឈើ និងកាប់បំផ្លាញផលដំណាំនិងដកបង្គោលរបងរបស់គាត់អស់១ចំនួនហើយគាត់ក៏បានទៅប្ដឹងប៉ូលីសប៉ុស្ដិខ្នាឆ្មាអោយទៅឃាត់ ចំណែកប៉ូលីសក៏បានទៅឃាត់ដែរមិនស្ដាប់ ដោយគេសំអាងថាគេជាក្មួយរបស់លោកមេឃុំ ហើយលោកមេឃុំជាអ្នកនៅពីក្រោយខ្នងបញ្ជាអោយធ្វើ និងមានលេចឮពាក្យថា បើលោករំលោកយកដីនោះបាន លោកមេឃុំនិងយកដីនេះមួយចំណែកដើម្បីធ្វើជាទីតាំងផលិតទឹកសុទ្ធឬទឹកស្អាតលក់។
ប្រជាពលរដ្ឋម្ចាស់ដីបានប្រាប់អោយដឹងថា ការធ្វើរបងស៊ីមងត៍ព័ទ្ធយកដីរបស់គាត់ពង្រីកយកធ្វើជាដីវត្តនេះ គាត់មានបំណងចង់រួមចំណែកដែរ ប៉ុន្តែត្រូវមានការដោះដូរជាដី ឬជាថវិការទៅតាមការព្រមព្រៀងគ្នា មិនគួរមកព័ទ្ធយកដីរបស់គាត់ទទេៗ បែបនេះទេ ប្រទេសមានច្បាប់ ត្រូវគោរពច្បាប់។ ម្យ៉ាងទៀតគាត់(ម្ចាស់ដី)ក៏ធ្លាប់បានបរិច្ចាក (ប្រគេន)ដីអោយវត្តសម្រាប់កសាងសមិទ្ធិផលអស់មួយចំនួនដែរហើយ ដូចជាដីកសាងសាលាឆាន់ជាដើម។
នៅក្នុងពេលចុះទៅសម្រប សម្រួលដោះស្រាយករណីដីទំនាស់នោះ លោកអភិបាលស្រុកបានសណូមពរ និងដាក់បទបញ្ជាអោយភាគីទាំងសងខាងបញ្ឈប់ការធ្វើសកម្មភាពជាបណ្ដោះអាសន្នសិនរងចាំការដោះស្រាយ។
លោកអភិបាលបានបញ្ជាក់បន្ថែមថា ករណីនេះលោកគ្រូចៅអធិការគួរតែរកដំណោះស្រាយដោះដូរជាថវិកា ដោយចេញជាសោហ៊ុយ(ទឹកប្រាក់)អោយទៅភាគីខាងម្ចាស់ដីទើបបានប្រសើ ។ នៅថ្ងៃទី១២ ខែកុម្ភៈ ឆ្នាំ២០១៧នេះ លោកវន ស៊ីផាអភិបាលស្រុកសាមគ្គីមានជ័យបានប្រាប់អ្នកយកព័ត៌មានយើងថាខាងលោកវត្តបឹងខ្នាឮថាព្រមចេញលុយអោយម្ចាស់ដីហើយគឺត្រឹមតែប្រមាណពី៤ពាន់ឬ៥ពាន់ដុល្លាប៉ុណ្ណះ ។ ចំណែកម្ចាស់ដីបានដាក់តម្លៃ១ម៉ឺនប្រាំពាន់ដុល្លា ព្រោះដីរបស់គាត់មានទំហ៊ំធំគឺមានជាង៨៥ម៉ែត្រគុណនឹងជាង៩០មឹត្រ និងមានដើមឈើ ដើមត្នោត និងដំណាំស្រុកជាច្រើនផងដែរ ប៉ុន្តែបច្ចុប្ន្នត្រូវបានខាងភាគីខាងលោកកាប់បំផ្លាញ និងគាស់គល់បំបាត់ភ័ស្តុតាងអស់មួយចំនួនធំហើយ សូមដោះស្រាយអោយបានសមរម្យផង ៕