ខេត្តរតនគិរី ៖ ទីតាំងស្តុកឈើប្រណិតមួយកន្លែងស្ថិតនៅក្នុងភូមិអូររមៀត (ហៅ ភូមិថ្មី) សង្កាត់ឡាបានសៀក ក្រុងបានលុង ខេត្តរតនគិរី ដែលម្ចាស់ឃ្លាំងត្រូវបានគេស្គាល់ឈ្មោះ យាវ លាងហេង ភេទប្រុស អាយុ 30 ឆ្នាំ ជនជាតិខ្មែរ មានទីលំនៅ ភូមិ ឃុំខាងលើ គឺជាឈ្មួញដុះស្លែម្នាក់ សកម្មក្នងការប្រម៉ែប្រមូលទិញឈើគ្រប់ទីកន្លែងដែល ឈ្មួញនានា ដឹកតាមម៉ូតូ តាមរឺម៉កម៉ូតូ និងតាមរថយន្ត ៘ ទូទាំងក្រុងបានលុងមកស្តុកទុក រងចាំឱកាសល្អ បញ្ចេញបន្តទៅអោយឈ្មួញផ្សេងៗទៅលក់នៅប្រទេសវៀតណាមឬ តាមសិប្បកម្មកែច្នៃជាដើមត្រូវបានកម្លាំងនគរបាលប្រឆាំងបទល្មើសសេដ្ធកិច្ចនៃស្នងការដ្ធាននគរបាលខេត្តដែលដឹកនាំផ្ទាល់ ដោយលោក នូវ ដារ៉ា នាយការិយាល័យប្រឆាំងបទល្មើសសេដ្ធកិច្ចខេត្ត និងមានការសម្រប សម្រួលពី លោក ម៉ម វណ្ណ ដា ព្រះរាជអាជ្ញារងអមសាលាតំបូងខេត្តរតនគិរីផងដែរ យុទ្ធនាការចុះបង្ក្រាបទីតាំងខាងលើធ្វើឡើងកាលពីព្រឹកថ្ងៃទី១៣ ខែកុម្ភៈ ឆ្នាំ២០១៧ វេលាម៉ោង 9 និង 30នាទី និងធ្វើការរិបអូសបានឈើប្រណិតប្រភេទឈើធ្នុង មុខកាត់ធំៗ ខ្នាតចម្រុះ ចំនួន ពីររឺម៉ក កន្លះ រឺម៉ក ខ្នាតយក្ខ (2,5រ៉ឺម៉ក)។
បើតាមប្រភព ពីប្រជាពលរដ្ធដែលរស់នៅក្បែរឃ្លាំងស្តុកឈើខាងលើបានបង្ហើបអោយ ភ្នាក់ងារ សារព័ត៏មានដំណឹងភ្នំពេញ ដឹងនៅព្រឹកថ្ងៃទី១៣នេះថា ៖ មួយយប់ៗពួកគាត់ដេកស្តាប់ឮស្នូរសម្លេងទំលាក់ឈើចេញពីឃ្លាំងខាងលើ ក្តុងក្តាំងៗ ឥតលាស់ថ្ងៃនោះឡើយ ដេកមិនលក់បក់មិនល្ហើយទាល់តែសោះ ពុំដែលឃើញមានក្រុមសមត្ថកិច្ចជំនាញណាមួយចុះមកបង្ក្រាបសោះ ។ ហើយពេលនេះពួកគាត់សប្បាយចិត្ត អបអរសាទរ ដោយ បានឃើញសមត្ថកិច្ចខេត្តយើងមានចំណាត់ការចុះមកបង្ក្រាប ទីតាំងខាងលើ យប់នេះពួកគាត់និងបានដេកលក់ស្រួលជាមិនខាន។
បច្ចុប្បន្ន សមត្ថកិច្ចនគរបាលបានដឹកជញ្ជូនឈើទៅរក្សាទុកនៅស្នងការដ្ធាននគរបាលខេត្តដើម្បីបំពេញសំណុំបែបបទបញ្ជូនទៅខ័ណ្ឌរដ្ធបាលព្រៃឈើខេត្តចាត់ការបន្ត ។ ដោយឡែក ម្ចាស់ឈើ ឈ្មោះ យាវ លាង ហេង សមត្ថកិច្ចជំនាញនិងត្រូវអោយចូលខ្លួន ទទួលខុសត្រូវ ដើម្បីធ្វើការបង់ផាក់ពិន័យទៅតាមច្បាប់រដ្ធបាលព្រៃឈើ ៕
ដោយ ៖ ចាប សំអាន
