រតនគិរី ៖ មានមន្ដ្រីប៉ូលិសម្នាក់ដាក់គ្រឿងចក្រឈូសឆាយដីព្រៃរបស់រដ្ឋរាប់រយហិកតានៅស្រុកអូរយ៉ាដាវ ធ្វើជាកម្មសិទ្ធិអាជ្ញាធរថាអត់ទាន់បានដឹងនៅឡើយ ។ ដីនោះមានទំហំប្រហែល៣០០ហិកតា មានទីតាំងនៅស្ថិតនៅក្នុងភូមិសាស្ដ្រឃុំយ៉ាទុងស្រុកអូរយ៉ាដាវជាប់មាត់អូរតាងខាងលិច។
ប្រភពព័ត៌មានពីឃុំយ៉ាទុងបានឱ្យដឹងថា កាលពីចុងឆ្នាំ២០១៦ មានមន្ដ្រីប៉ូលិសប៉ុស្ដិ៏ការពារព្រំដែនស្រុកអូរយ៉ាដាវម្នាក់ បាននាំគ្រឿងចក្រចំនួន៣គ្រឿងចូលទៅឈូសឆាយដីព្រៃឈើរបស់រដ្ឋនៅតំបន់ខាងលើគឺវាទយកដីនោះធ្វើជាកម្មសិទ្ធិរបស់ខ្លួនដោយសម្អាងថាបានទិញពីប្រជាពលរដ្ឋ។
ប្រភពបានបន្ដឱ្យដឹងទៀតថា នៅពេលធ្វើសកម្មភាពឈូសឆាយដីព្រៃនោះ គេពុំឃើញមានអាជ្ញាធរមូលដ្ឋាន ឬសមត្ថកិច្ចពាក់ព័ន្ធចុះទៅធ្វើកាទប់ស្កាត់ទេ ។ រហូតដល់គេឈូសឆាយបានដីប្រហែល៣០០ហិកតា ទើបមានមន្ដ្រីស្រុកអូរយ៉ាដាវមួយក្រុមចុះទៅត្រួតពិនិត្យ ប៉ុន្ដែត្រឡប់មកវិញ រហូតដល់ថ្ងៃទី៧ ខែកុម្ភ:នេះ ពុំទាន់មានវិធានការតាមផ្លូវច្បាប់នៅឡើយ ។
លោក រចំហ្វេន មេឃុំយ៉ាទុង បានឱ្យដឹងតាមទូរស័ព្ទកាលពីថ្ងៃទី៦ ខែកុម្ភ: ឆ្នាំ២០១៧ ថា ដីនោះស្ថិតនៅក្រោមការគ្រប់គ្រងរបស់លោក ។ ប៉ុន្ដែរឿងថា ដាក់គ្រឿងចក្រឈូសឆាយដីព្រៃនៅនោះ គេមិនបានប្រាប់ឱ្យលោកបានដឹងនោះឡើយ។
ប៉ុន្ដែប្រជាពលរដ្ឋនៅឃុំយ៉ាទុង បានឱ្យដឹងថា ដីព្រៃដែលមន្ដ្រីប៉ូលិសឈូសឆាយយកធ្វើជាកម្មសិទ្ធិនោះ គឺគេប្រមូលទិញពីប្រជាពលរដ្ឋនៅទីនោះ គឺក្នុងមួយគ្រួសារបួនដប់ហិកតា ហើយដីនោះមានការទទួលស្គាល់ពីមេភូមិ និងមេឃុំទើបគេហ៊ាននទិញយកធ្វើជាកម្មសិទ្ធិ ។
លោក ម៉ា វិចិត្រ អភិបាលស្រុកអូរយ៉ាដាវកាលពីថ្ងៃទី១ ខែកុម្ភ: ឆ្នាំ២០១៧ អ្នកសារព័ត៌មានយើងបានសុំការពន្យល់ពីរឿងមន្ដ្រីប៉ូលិសដែលបានដាក់គ្រឿងចក្រឈូសឆាយដីព្រៃរបស់រដ្ឋរាប់រយហិកតានោះដែរប៉ុន្ដែទូរស័ព្ទលោកពុំមានអ្នកលើក។
លោក ទឹម ស៊ីណាត ប្រធានមន្ទីររៀបចំដែនដីនគររូបណីយកម្មសំណង និងសុរិយោដីខេត្ដរតនគិរីកាលពីថ្ងៃទី៣ ខែកុម្ភ: ឆ្នាំ២០១៧បានបញ្ជាក់ឱ្យដឹងតាមទូរស័ព្ទថា ដីព្រៃដែលគេដាក់គ្រឿងចក្រឈូសឆាយដីនោះ យើងមិនដែលបានដឹងទេ ។
លោកប្រធានមន្ទីរសុរិយោដីបានបញ្ជាក់ទៀតថា មកដល់ពេលនេះ ហើយគ្មានអ្នកណាគេហានចេញច្បាប់ឱ្យឈូសឆាយដីព្រៃទៀតឡើយ ។ បើមានគឺមានតែគេធ្វើដោយលួចលាក់នៅត្រឹមថ្នាក់មូលដ្ឋានប៉ុណោះ ។ រឿងនេះបើចង់ដឹងសួរទៅមេឃុំ,ចៅហ្វាយស្រុក,មេព្រៃខាងកសិកម្ម និងមន្ទីរបរិស្ថានទៅពួកគេច្បាស់ជាបានដឹង ។
លោក ឡេង យុគ នាយផ្នែករដ្ឋបាលព្រៃឈើប្រចាំស្រុកបរកែវ អណ្ដូង និងស្រុកអូរយ៉ាដាវ បានបញ្ជាក់ប្រាប់អ្នកព័ត៌មានយើងឱ្យដឹងកាលពីថ្ងៃទី១ ខែកុម្ភ: ឆ្នាំ២០១៧ ថា ពាក់ព័ន្ធករណីដីព្រៃនៅចំណុចខាងលើ គឺមានគេទូរស័ព្ទមកសួរលោកច្រើនដែរក៏ ប៉ុន្ដែយើងបានប្រាប់ថាដីនៅតំបន់នោះវាស្ថិតនៅក្រោយការគ្រប់គ្រងរបស់មន្ទីរបរិស្ថានខេត្ដទេ។
នាយផ្នែករដ្ឋបាលព្រៃឈើបានបញ្ជាក់បន្ថែមទៀតថា ភូមិសាស្ដ្រដីព្រៃដែលគេឈូសឆាយយកនោះគឺស្ថិតនៅក្នុងព្រះរាជក្រិត្យហើយខាងក្រសួងបានឱ្យអភិរក្សទុកសម្រាប់ធ្វើជាតំបន់ទេសចរផ្នែកកីឡាប្រមាញ់សត្វព្រៃ។
លោក ផុន ខេមរិន្ទ ប្រធានមន្ទីរបរិស្ថានខេត្ដរតនគិរី កាលពីថ្ងៃទី៧ ខែកុម្ភ: ឆ្នាំ២០១៧ បានទូរស័ព្ទទំនាក់ទំនងទៅលោក ដើម្បីសុំការបំភ្លឺពីបញ្ហាដីនៅចំណុចដូចខាងលើ ប៉ុន្ដែទូរស័ព្ទរោទិ៍ជាច្រើនដង ពុំមានអ្នកទទួល ។ នៅថ្ងៃដដែលនោះដែរ លោក ទេព បូរិន អនុប្រធានស្ដីទី នៃមន្ទីរបរិស្ថានខេត្ដបានបញ្ជាក់ឱ្យដឹងតាមទូរស័ព្ទថា ដីព្រៃដែលគេឈូសឆាយនៅភូមិសាស្ដ្រដូចខាងលើនោះ លោកមិនទាន់បានដឹងនៅឡើយទេ ។ ម្យ៉ាងទៀត ពាក់ព័ន្ធទៅនឹងផ្នែកធនធានធម្មជាតិមានតែលោកប្រធានតែម្នាក់ប៉ុណ្ណោះ ដែលអាចដឹងពីរឿងនោះដូច្នេះលោកឲ្យសួរទៅប្រធានទៅ ។
លោក ញឹម ផែ នអភិបាលរងខេត្ដរតនគីរី ទទួលបន្ទុកវិស័យដីធ្លីលោកបានបញ្ជាក់ប្រាប់តាមទូរស័ព្ទកាលពីថ្ងៃទី៧ ខែកុម្ភ: ឆ្នាំ២០១៧ថា ករណីដីព្រៃរបស់រដ្ឋស្រុកអូរយ៉ាដាវនោះ នៅមិនទាន់មានគេរាយការណ៏មកខេត្ដ ឱ្យបានដឹងនៅឡើយទេ ។ កាលពីមុននេះមួយថ្ងៃ គណ:បញ្ជាការឯកភាពខេត្ដបានប្រជុំលើកពីបញ្ហាដីធ្លីដែរ ប៉ុន្ដែហេតុអ្វីចៅហ្វាយស្រុកអូរយ៉ាដាវបែរជាមិនលើកឡើងពីបញ្ហាដីនោះ ។
លោកអភិបាលរងខេត្ដបានបញ្ជាក់ឱ្យដឹងទៀតថា រឿងដីព្រៃរបស់រដ្ឋដែលគេបានឈូសឆាយនោះ លោកនិងសាកសួរទៅខាងស្រុកអូរយ៉ាដាវសិនបើមានករណីបែបនោះមែន យើងនឹងមានវិធានការតាមផ្លូវច្បាប់ ៕
ម៉ី មេងហ៊ុយ រតនគិរី
