មណ្ឌលគិរី : មានសេចក្តីរាយការណ៍ថា៖ កាលពីរសៀលថ្ងៃទី១កុម្ភះ ២០១៧កន្លងមកនេះ មានប្រជាពលរដ្ឋ ជាច្រើននាក់ រស់នៅក្នុងភូមិ អូអាម ឃុំស្រែខ្ទុម ស្រុក កែវសីមា ខេត្ត មណ្ឌលគិរី បានសម្តែងការក្តៅក្រហាយនិងរិះគន់ចំពោះ បុគ្គលិកមន្ទីរពេទ្យ បង្អែកខេត្តមណ្ឌលគិរី ថា មិនយក ចិត្តទុកដាក់ ទៅលើអ្នកជំម្ងឺក្រីក្រដោយសារតែបានបណ្តោយឲ្យក្មេងស្រីក្រីក្រអាយុ១៥ឆ្នាំម្នាក់ស្លាប់ព្រោះតែគ្មានលុយ៦០ម៉ឺនរៀល ។ជនរងគ្រោះដែលស្លាប់កូននៅក្នុងមន្ទីរពេទ្យ បង្អែកខេត្តមណ្ឌលគិរីមានឈ្មោះ វិ វី អាយុ៥៥ឆ្នាំ និង ប្រពន្ធ ឈ្មោះ ជុំ តាន់ អាយុ ៥៤ឆ្នាំ និង កូនស្រីដែលស្លាប់មាន ឈ្មោះ ស្រីនី ដែល រស់នៅក្នុង ភូមិ ឃុំ ខាងលើ។ប្តីប្រពន្ធនេះ បាននិយាយរៀបរាប់ ទាំងទឹកភ្នែក ថា ពួក គាត់បាន នាំកូនស្រីរបស់គាត់ម្នាក់មានឈ្មោះ វី ស្រីវាត់ អាយុ១៥ឆ្នាំ ទៅមន្ទីពេទ្យបង្អែកខេត្តមណ្ឌលគិរី តាំងពីម៉ោង៥ព្រឹកថ្ងៃទី៣១មករា ២០១៦។ ពេលទៅដល់ ឃើញមានតែ បុគ្គលិកមន្ទីរពេទ្យ បង្អែក ម្នាក់ប៉ុណ្ណោះមកប្រាប់ពួកគាត់ ថា ពេលនេះគាត់ចប់ម៉ោងហើយសុំចាំបន្តិច ដល់ម៉ោងគេមកប្តូរហើយ ។
ក្រោយពីគ្រូពេទ្យនិយាយបែបនេះ ពួកគាត់ក៍បានបន្តអង្គុយចាំ រហូតដល់ម៉ោង៨:៣០នាទី ទើបឃើញ មានបុគ្គលិកពេទ្យ មកប្តូរវេន និងពិនិត្យមើលជម្ងឺកូនស្រីរបស់គាត់។ គ្រូពេទ្យក៏បានចាក់ថ្នាំ បានបន្តិចកូនស្រីរបស់គាត់ ប្រកាច់ យ៉ាងខ្លាំង ហើយពួកគាត់ក៏បានទៅសួរគ្រូពេទ្យ តែគ្រូពេទ្យនិយាយថា មិនអីនោះទេ។ បានប៉ុន្មានម៉ោងក្រោយមកក៏ឃើញពេទ្យមកចាក់ថ្នាំទៀត លុះមកដល់ម៉ោងប្រហែល ៣រសៀល ថ្ងៃដដែល ទើបឃើញមានបុគ្គលិកមន្ទីរពេទ្យ បង្អែកនោះមកប្រាក់ពួកគាត់ថា កូនស្រីនេះមានជម្ងឺរលាកស្រោមខួរក្បាល ទាល់តែបញ្ជូនទៅមន្ទីពេទ្យបង្អែករាជធានីភ្នំពេញទើបបាន។
សាច់ញាតិជនរងគ្រោះបន្តរទាំងទឹកភ្នែកទៀតថា ពេលនោះគ្រូពេទ្យនិយាយទៀតថា ការបញ្ជូនទៅមន្ទីពេទ្យបង្អែកនៅភ្នំពេញ លុះត្រាតែមានលុយចំនួន៦០ម៉ឺនរៀល ទើបឡានពេទ្យបញ្ជូនទៅបាន ។ពេលនោះពួកគាត់ក៏បានសួរទៅពេទ្យវិញថា ចុះលោកគ្រូពេទ្យថាជម្ងឺស្រាលមិនអីទេ តើហេតុអ្វីបានពេលនេះ មកប្រាប់ពួកខ្ញុំយ៉ាងនេះទៅវិញ?។ ពេទ្យនោះក៏បាននិយាយតបមកវិញដោយគំរោះគំរើយថា បើចេះជាងពេទ្យធ្វើជា ពេទ្យវិញទៅ ហើយថែមនិយាយទៀតថា ខ្លួន ក្រ ហើយអន់មាយាទទៀត ។
បន្ទាប់មកក៏សួរពួកគាត់ទៀតថា មានលុយ៦០ម៉ឺនរៀល ដែរក៏អត់ ?ពួកគាត់បាន សុំ ត្រឹមតែចំនួន៤០ម៉ឺនរៀលបានទេ។តែពេទ្យនោះក៏ក្រវីក្បាល រួចហើយដើរចេញទៅវិញបាត់ ។ពេលឃើញ កូនស្រីរបស់គាត់ចេះតែប្រកាច់ ដោយគ្រូពេទ្យនៅទីនោះមក បង្ខំ អោយពួកគាត់ជាឪពុកជនរងគ្រោះ ផ្ដិតមេដៃ ខណ:ម្តាយមិននៅផងនោះ ។
សាច់ញាតិជនរងគ្រោះ បានបញ្ជាក់ទៀតថា ដោយមិនខ្វល់ពីអ្នកជម្ងឺ គ្រូពេទ្យក៍បន្តរចាក់ថ្នាំ រហូតដល់ម៉ោង៣ទាបភ្លឺ ទី១កុម្ភះ ២០១៧ កូនស្រីរបស់គាត់ ក៏ស្លាប់ បាត់ទៅហើយហើយគ្រូពេទ្យទាំងនោះ ក៍បានមកបញ្ជា អោយ ពួកគាត់ យកសព កូនស្រី ត្រលប់ទៅ ផ្ទះ វិញ។
ជំវិញពាក់ព័ន្ធករណីនេះអ្នកសារពតិមាន បានទៅដល់មន្ទីរពេទ្យបង្អែកខេត្តមណ្ឌលគិរី នារសៀល ថ្ងៃទី២កុម្ភះ ២០១៧ ហើយក៏បានជួប លោក ស៊ា សុខមាម ប្រធានមន្ទី ពេទ្យបង្អែក ខាងលើ ពេលនោះលោកបានបំភ្លឺថា កាលពីថ្ងៃទី៣១មករា កន្លងទៅលោកបានទៅប្រជុំនៅឯភ្នំពេញ លោកមិនបានដឹងនោះទេ លុះមកដល់ ព្រឹកថ្ងៃទីកុម្ភះ ទើបលោកចូលមកធ្វើការវិញ ពេលនោះបុគ្គលិកមន្ទីរពេទ្យ របស់លោក ប្រាប់ថា មានអ្នកជម្ងឺម្នាក់បានស្លាប់ ។
លោកវេជ្ជបណ្ឌិត បានឲ្យដឹងថា៖បុគ្គលិកមន្ទីរពេទ្យ បំរើការងារនៅថ្ងៃនោះ មានចំនួន៤ នាក់ ទី១ មានឈ្មោះ ទុយ ស្រស់ ភេទប្រុស មានទួនាទីជា អនុប្រធាន ទី២- វេជ្ជបណ្ឌិត នូសូ មិធា ភេទប្រុសទី៣ វេជ្ជបណ្ឌិត លឹម តិចឡុង ភេទប្រុស ទី៤- វេជ្ជបណ្ឌិត សែម វាស្នា ភេទប្រុស ដោយគ្រូពេទ្យទាំង៤នាក់នោះ បានទៅយាមតាមគោលដៅអស់ទៅហើយ ចាំព្រឹកគាត់និង ប្រាប់។ លុះមកដល់ព្រឹកថ្ងៃទី៣កុម្ភះ ក្រុមភ្នាក់ងារក៏បានទៅដល់មន្ទីរ ពេទ្យបង្អែកនោះម្តងទៀត ដោយពេលនោះឃើញលោកប្រធានមន្ទីរពេទ្យ ឈ្មោះ ស៊ា សុខមាម ឈរនិយាយជាមួយបុគ្គលិករបស់លោកចំនួន៤នាក់នោះ ហើយបន្ទាប់មក លោកបាននិយាយ ប្រាប់ភ្នាក់ងារសារពតិមានថា ពួក ពេទ្យទាំងនោះទៅធ្វើការអស់ទៅហើយ គឺមិននៅជួបនោះទេ។
ក្រុម ភ្នាក់ងារពតិមានបាន ថតទីធ្លាមន្ទីរពេទ្យ ប៉ុន្តែក៏ត្រូវបានបុគ្គលិកពេទ្យ ចំនួន ៣នាក់ ដោយមិនស្គាល់ឈ្មោះ បានមកហាមមិនអោយក្រុមការងារ ថត យករូបភាពនោះទេ មិនតែប៉ុណ្ណោះថែមទាំង គំរាមក្រុមភ្នាក់ងារពតិមានថា បើនៅតែ ថត ទៀតនោះលោកនិង ដោះ ត្រនាប់ជើង គុបក្បាលជាមិនខាន។ សូមបញ្ជាក់ដែរថា ប្រតិកម្មពីគ្រូពេទ្យគេបាននិយាយពង្វៀងរឿងលុយ៦០ម៉ឺនមិនមែនពេទ្យទារទេគឺខាងគ្រួសារថាមកភ្នំពេញអត់លុយសម្រាប់ចំណាយទេ។
ការពិតចម្លើយចឹងៗលំបាកកទទួលយកព្រោះថាលោកម៉មប៊ុនហេងរដ្ឋមន្ត្រីក្រសួងសុខាភិបាលបានប្រកាសហើយថាករដឹកជញ្ជូនអ្នកជម្ងឺមិនត្រូវបង់លុយទេ។ករណីគ្រូពេទ្យគ្មានសីលធមិបណ្តោយឲ្យក្មេងក្រីក្រស្លាប់ គេរំពឹងថា លោកម៉ម ប៊ុនហេង រដ្ឋមន្ត្រីក្រសួងសុខាភិបាល នឹងចាត់វិធានការឬបើកការសើបអង្កេត ដើម្បីផ្តល់យុត្តិធម៌ជូនជនរងគ្រោះជាមិនខាន ៕
