ខេត្តរតនគិរី ៖ ខេត្តរតនគិរីនឹងត្រូវគេរំពឹងថា នឹងមានផ្លូវមួយខ្សែយ៉ាងល្អប្រណីត ក្រោមការស្ថាបនារបស់រាជរដ្ឋាភិបាលកម្ពុជា ដែលផ្ឡូវនោះ បាននិងកំពុងស្ថាបនាឡើងកាត់ព្រៃភ្នំ ជ្រោះជ្រលងដងអូរ កាត់ភាពលំបាកគ្រប់ដំណាក់កាល តាមបណ្តោយខ្សែបន្ទាត់ព្រំដែនកម្ពុជា វៀតណាម ដោយចាប់ផ្តើមពីចំណុចបង្គោលព្រំដែនលេខ៣០ ដល់តំបន់មុំបី កន្ទុយនាគ ។
តាមប្រសាសន៍ប្រធានក្រុមបច្ចេកទេសបោះបង្គោលខ័ណ្ឌសីមាប្រចាំខេត្តរតនគិរី លោក ណែម បូរា បានប្រាប់នៅល្ងាចថ្ងៃទី០៨ កុម្ភៈនេះថា ផ្លូវដែលនឹងស្ថាបនានោះ មានចម្ងាយ១៦០គីឡូម៉ែត្រ បច្ចុប្បន្នកំលាំងវិស្វកម្មត្រាសសេបានចម្ងាយ២៧គីឡូម៉ែត្រហើយ ។
កាលពីព្រឹកម្សិលមិញថ្ងៃទី០៨ កុម្ភៈ ឯកឧត្តម សៀក សុជាតិ នាយកទីចាត់ការការពារព្រំដែន នៃអគ្គបញ្ជាការកងយោធពលខេមរភូមិន្ទ និងឯកឧត្តម ថង សាវុន អភិបាលខេត្តរតនគិរី បានអញ្ជើញចុះពិនិត្យការស្ថាបនាផ្ឡូវនោះជាក់ស្តែង ។
ផ្លូវស្ថាបនាថ្មី តាមក្រវាត់ព្រំដែនកម្ពុជា វៀតណាម ដែលមានប្រវែង ១៦០គីឡូម៉ែត្រ ចាប់ពីបង្គោលសីម៉ាលេខ៣០ ច្រកទ្វារអន្តរជាតិស្រុកអូរយ៉ាដាវ ក្នុងខេត្តរតនគិរី ទៅទល់នឹងមុំបីកន្ទុយនាគ កម្ពុជា វៀតណាម ឡាវ ត្រូវបានស្ថាបនាដោយកម្លាំងវិស្វកម្ម ត្រាស់សេរបាន២៧គីឡូម៉ែត្រហើយ។
ឯកឧត្តម សៀក សុជាតិ ដែលចុះពិនិត្យការដ្ឋានផ្ទាល់ មានប្រសាសន៍ថា កម្ពុជាដឹកនាំដោយសម្តេចតេជោ ហ៊ុន សែន តែងគិតគូរជានិច្ចចំពោះការអភិវឌ្ឍន៍តាមតំបន់ព្រំដែន ដើម្បីប្រែក្លាយតំបន់ព្រំដែន អោយក្លាយទៅជាតំបន់សន្តិភាព មិត្តភាព និងការអភិវឌ្ឍន៍ ។
ជាក់ស្តែង ការឈូសឆាយស្ថាបនាផ្ឡូវ ១៦០គីឡូម៉ែត្រពីខេត្តរតនគិរី ប្រទេសកម្ពុជា ទៅខេត្តយ៉ាឡាយ ប្រទេសវៀតណាម ដែលចាប់ផ្តើមស្ថាបនាឡើង ពីចំណុចបង្គោលប្ពំដែនលេខ៣០ ឆ្ពោះទៅកាន់តំបន់មុំបី (កន្ទុយនាគ) នេះស្រាប់ ។
លោកថា ផ្លូវនេះគឺឈូសឆាយស្ថាបនាឡើងដោយកំលាំងវិស្វកម្ម នៃកងយោធពលខេមរភូមិន្ទ បច្ចុប្បន្នឈូសឆាយត្រាសេសបានចម្ងាយ២៧គីឡូម៉ែត្រហើយៗ នឹងបន្តឈូសឆាយអោយដល់តំបន់មុំបីកន្ទុយនាគ តាមផែនការរបស់រាជរដ្ឋាភិបាល ។
ឯកឧត្តម មានប្រសាសន៍បន្តថា ផ្លូវនេះជំហានដំបូងគឺយើងធ្វើការក្រាលគ្រួសក្រហមសិន ហើយនឹងឈានទៅក្រាលបេតុង ឬក្រាលកៅស៊ូបន្តទៀតនាពេលអនាគត ហើយផ្លូវក្រវ៉ាត់ព្រំដែននេះ ជាផ្លូវយុទ្ធសាស្ត្រ
សំរាប់ការពារបូរណភាពទឹកដី និងបំរើផលប្រយោជប្រជាពលរដ្ឋ ដែលរស់នៅតាមតំបន់ព្រំដែននេះផងដែរ ។
ជាមួយនឹងការរំពឹងថា នឹងទទួលបានផ្ឡូវល្អប្រណីតមួយខ្សែនេះ ខេត្តរតនគិរីត្រូវគេសម្លឹងឃើញថា នឹងកាន់តែកែប្រែមុខមាត់ថ្មី ទាំងវិស័យសេដ្ឋកិច្ច ទេសចរណ៍ វិស័យសិក្សាធិការ វប្បធម៌ជាដើម។ល។ មិនតែប៉ុណ្ណោះនៅពេលដែលផ្លូវនេះស្ថាបនារួច សង្ឃឹមថានឹងមានភ្ញៀវទេសចរណ៍ធ្វើដំណើរទៅកាន់តំបន់កន្ទុយនាគ ដែលជាតំបន់ធ្លាប់ត្រូវគេនិយាយថា ជារមណីយដ្ឋានធម្មជាតិដ៏ល្អប្រណីត ដែលភ្ញៀវទេសចរណ៍មិនដែដលបានទៅដល់សោះ៕
ដោយ យឹម សារិទ្ធិ
