ខេត្តក្រចេះ ៖ ស្នងការនគរបាលខេត្តក្រចេះ លោកឧត្តមសេនីយ៍ទោ លន់ សុផាត នៅរសៀលថ្ងៃទី៨ កុម្ភះ បានដឹកនាំគណៈស្នងការធ្វើពិធីបញ្ចុះបឋមសិលាសាងសង់ អគារប៉ុស្តិ៍នគរបាលរដ្ឋបាលសំបូរ បន្ទាប់ពីអគារប៉ុស្តិ៍រដ្ឋបាលសម្រាប់មន្ត្រីនគរបាលធ្វើការបច្ចុប្បនធ្វើអំពីឈើប្រក់ស័ង្កសីមានសភាពចាស់ទ្រុឌទ្រោមកាន់តែខ្លាំង។
បើតាមការលើកឡើងពីលោកវរសេនីយ៍ទោ ប៊ុន ឈឿន អធិការនគរបាល ស្រុកសំបូរបានឲ្យដឹងថា ដោយមើលឃើញពីភាពលំបាករបស់មន្ត្រីនគរបាលប៉ុស្តិ៍រដ្ឋបាលសំបូរ ដែលសព្វថ្ងៃកំពុងតែបម្រើរការងារក្នុងអគារចាស់ទ្រុឌទ្រោម ធ្វើអំពីឈើប្រកសង្កសី ជាច្រើនឆ្នាំមកហើយនោះ លោកឧត្តមសេនីយ៍ស្នងការ បានចំណាយថវិកាផ្ទាល់មាន ចំនួនជិត៤០លានរៀល ដើម្បីសាងសង់អគារថ្មីមួយទៀតនៅលើទីតាំងចាស់ដើម្បីជូនមន្ត្រីនគរបាលប៉ុស្តិ៍ងាយស្រួលក្នុងការ បំពេញកិច្ចការប្រយោជន៍ដើម្បីបំរើប្រជាពលរដ្ឋនៅក្នុងមូលដ្ឋាន នៃឃុំសំបូរ ។
អគារដែលត្រូវធ្វើពិធីបញ្ចុះបឋមសិលាសាងសង់នេះ មានទំហំ៤,៥មែត្រX១០មែត្រ ធ្វើពីបេតុង សម្រេចសាងសង់ឲ្យរួចរាល់បានប្រើប្រាស់ជាផ្លូវការក្នុងអំឡុងរយះពេល៦ខែ និងសាងសង់នៅលើទីតាំងចាស់ក្នុងបរិវេណសាលាឃុំសំបូរ ស្រុកសំបូរ។
រាប់ទាំងអគារប៉ុស្តិ៍រដ្ឋបាលដែលនឹងត្រូវសាសង់ថ្មីមួយនេះទៀត ជាអគារប៉ុស្តិ៍នគរ បាលរដ្ឋបាលទី៥ នៅតាមបណ្តារអធិការស្រុក-ក្រុងក្នុងខេត្ត ដែល មានសភាពចាស់ ទ្រុឌទ្រោមខ្លាំង ហើយក៏ត្រូវបានលោកឧត្តមសេនីយ៍ទោ លន់ សុផាត ស្នងការនគរបាលខេត្តក្រចេះ បានសាងសង់ថ្មីសមរម្យសម្រាប់ឲ្យមន្ត្រីនគរបាលងាយ និងធ្វើកិច្ចការងារប៉ុស្តិ៍ប្រយោជន៍ ងាយនិងបំរើរសេវាសាធារណៈដល់ពលរដ្ឋក្នុងមូលដ្ឋាន។
មានប្រសាសន៍សំណេះសំណាលជាមួយនិងពលរដ្ឋក៏ដូចជានាយ នាយរងនគរបាល នៃអធិការដ្ឋាននគរបាលស្រុកក្នុងពិធីបញ្ចុះបឋមសិលា នារសៀលនោះ ស្នងការនគរបាល ខេត្តក្រចេះលោកឧត្តមសេនីយ៍ទោ លន់ សុផាត បានអំពាវនាវឲ្យបងប្អូនប្រជាពលរដ្ឋ ទៅបោះឆ្នោតឲ្យបានគ្រប់ៗគ្នានៅពេលខាងមុខ និងស្នើរឲ្យពលរដ្ឋមានការទំនាក់ទំនងមក នគរបាលមូលដ្ឋានដើម្បីជួយអន្តរាគមឲ្យបានបានឆាប់រហ័ស នូវរាល់ករណីណាមួយដែល កើតមាន។ បន្ថែមពីលើនេះលោកឧត្តមសេនីយ៍ស្នងការ បានមានប្រសាសន៍ជម្រុញឲ្យ នគរបាលមូលដ្ឋានបន្តរការផ្សព្វផ្សាយគោលនយោបាយភូមិ-ឃុំមានសុវត្ថិភាព ពិសេស ផលប៉ះពាល់គ្រឿងញៀន ច្បាប់ចរាចរណ៍ ក៏ដូចជាលក្ខណះសម្បត្តិផ្សេងទៀត ដល់ពល រដ្ឋនិងសិស្សានុសិស្សឲ្យពួកគាត់យល់ដឹងកាន់តែច្បាស់ ដើម្បីចូលរួមកាត់បន្ថយបទល្មើស នៅក្នុងមូលដ្ឋានរបស់យើង ។
ក្នុងនោះផងដែរ លោកឧត្ដមសេនីយ៍ បានកោតសសើរដល់មន្ត្រីក្រោមឱវាទតាមបណ្ដាស្រុកប៉ុស្ដិរដ្ឋបាល ដែលបានខិតខំបំពេញភារកិច្ចបំរើប្រជាពលរដ្ឋអស់ពីកម្លាំងកាយចិត្តដោយចាត់ទុកពលរដ្ឋជាម្ចាស់និងជាអានាព្យាបាលរបស់ពួកគាត់ដោយមិនគិតពីការនឿយហត់ឡើយ ។
លោកបានបន្តទៀតថា ក្រោយពីទទួលបានប៉ុស្ដិរដ្ឋបាលថ្មីនេះទៅ សូមអោយមន្ត្រីនគរបាល នៅទីនេះ ត្រូវតែខិតខំថែរក្សាការពារនិងយកចិត្តទុកដាក់ទ្វេរដងលើសពីឆ្នាំកន្លងទៅ ៕