ខេត្តរតនគិរី ៖ ប្អូនស្រីមានជម្ងឺប្រចាំកាយឈ្មោះ ហំ ស្រីលីន ដែលទើបបានបុត្រានាយករដ្ឋមន្ត្រី ហ៊ុន សែន គឺឯកឧត្តមបណ្ឌិត ហ៊ុន ម៉ាណែត ទទួលយកទៅព្យាបាលនៅទីក្រុងភ្នំពេញនោះ ឥឡូវនេះនាងត្រូវគេផ្តល់ដំណឹងថា បានស្លាប់លាចាកលោកយើងនេះទៅហើយ ដែលនាងទើបតែទទួលការព្យាបាលបានចំនួនតែពីរថ្ងៃប៉ុណ្ណោះ ពីក្រុមគ្រូពេទ្យគន្ធបុប្ផារាជធានីភ្នំពេញ ។
ហំ ស្រីលីន ត្រូវបានឳពុកនាងបញ្ជាក់នៅមុនបញ្ជូនទៅក្រុងភ្នំពេញថា នាងត្រូវជាកូនទីពីរ មានអាយុ១២ឆ្នាំ ដែលត្រូវបានម្តាយចាកចោលទៅមានឪពុកថ្មីជាច្រើនខែមកហើយ ។ លោក ពៅ តឿ ជាឪពុកបានបញ្ជាក់ថា នាងមានជម្ងឺប្រចាំកាយរយៈពេល២ឆ្នាំកន្លងទៅហើយ ប៉ុន្តែលោកមិនមានប្រាក់ដើម្បីព្យាបាលទេ គឺទុកអោយកូនស្រីដែលមានជម្ងឺប្រចាំកាយនោះនៅនឹងផ្ទះតែម្នាក់ឯង ពោលគឺជីវិតនាងបណ្តោយតាមយថាកម្ម ។ ចំណែកលោក ហើយនិងបងប្រុសរបស់នាងមានអាយុទើបតែ១៤ឆ្នាំ រវល់ទៅជៀជ័រកៅស៊ូដើម្បីជីវៈភាពប្រចាំថ្ងៃ បើពុំនោះទេនឹងត្រូវដាច់បាយស្លាប់ទាំងអស់គ្នា ។ លោក ពៅ តឿ បានបញ្ជាក់ប្រវត្តិជីវិតរបស់លោថា មុននឹងមកខេត្តរតនគិរី គឺលោកមានស្រុកកំណើតនៅឯភូមិបសេធន៍ ស្រុកពាមរក៍ ខេត្តព្រៃវែង ។
ដោយសារតែកត្តាជីវភាព លោកនិងប្រពន្ធដែលទៅមានប្តីថ្មីនិងកូន២នាក់ ក៏ស្រុះស្រួលបបួលគ្នា មករកការងារធ្វើក្នុងខេត្តរតនគិរី គឺរូបគាត់ហើយនិងកូនប្រុសច្បងបានចូលធ្វើជាកម្មករជៀជ័រកៅស៊ូ ដោយស្នាក់នៅក្នុងចំការរបស់ថៅកែកៅស៊ូនោះតែម្តង ។ ជីវិតរស់នៅក្នុងភាពដ៏កំសត់ បានធ្វើអោយប្រពន្ធរបស់លោក លួចទៅមានសាហាយថ្មី ធ្វើអោយលោកហើយនិងកូនៗរស់នៅក្នុងភាពកណ្តោចកណ្តែងជាទីបំផុត ។ ស្រាប់តែជិវិតកណ្តោចកណ្តែងមិនទាន់បានបញ្ចប់ផងនោះ កូនស្រីរបស់លោកគឺនាង ហំ ស្រីលីន បានធ្លាក់ខ្លួនមានជម្ងឺយ៉ាងដំណំ រហូតដំណឹងជម្ងឺរបស់នាងបានបែកធ្លាយដល់ប្រព័ន្ធព័តមានក្នុងខេត្តរតនគិរី ទើបធ្វើអោយមានការចុះផ្សាយអំពីដំណឹងនោះ កាលពីថ្ងៃទី៤ កុម្ភៈកន្លងទៅនេះ ដែលសុំអោយមានសប្បុរសជនជួយឧបត្ថម្ភចវិកាដើម្បីព្យាបាលជម្ងឺនាង ។
ក្រោយមានការចុះផ្សាយថ្ងៃទី៤ កុម្ភៈ ដំណឹងនោះបានសុះសាយដល់បុត្រានាយករដ្ឋមន្ត្រី ទើបបុត្រានាយករដ្ឋមន្ត្រី គឺឯកឧត្តមបណ្ឌិត ហ៊ុន ម៉ាណែត ស្នើអោយយកនាងទៅព្យាបាលនៅរាជធានីភ្នំពេញ នៅថ្ងៃទី០៥ កុម្ភៈ ។ នាង ហំ ស្រីលីន ត្រូវគេបញ្ជូនភ្លាមៗទៅដល់មន្ទីរពេទ្យគន្ធបុបា្ផ ទីក្រុងភ្នំពេញ នៅវេលាម៉ោង ៤និង៣០នាទីថ្ងៃដដែលនោះ ក្រោមការពិនិត្យតាមដានពីក្រុមគ្រូពេទ្យយ៉ាងហ្មត់ចត់ជាទីបំផុត ។
អ្នកយកព័ត៌មានមិនអាចស្វែងរកការបំភ្លឺពីក្រុមគ្រូពេទ្យគន្ធបុបា្ផទីក្រុងភ្នំពេញបានទេ ប៉ុន្តែតាមព័តមានពីអ្នកថែទាំជម្ងឺរបស់នាង បានបង្ហើបថា ក្រុមគ្រូពេទ្យនិយាយថា ថ្លើម សួត លំពែង ពោះវៀន របស់នាង ហំ ស្រីលីន មានសភាពខូចខាតទាំងស្រុង ។
បើទោះមានការព្យាយាមព្យាបាលយ៉ាងដិតដល់ពីក្រុមគ្រូពេទ្យនៅទីនោះយ៉ាងណាក៏ដោយ ក៏នាងនៅតែមិនអាចគេចផុតសេចក្តីស្លាប់បានដដែល ។ នាងត្រូវគេបញ្ជាក់ថា បានស្លាប់បាត់បង់ជីវិតនៅវេលាម៉ោង១១ថ្ងៃត្រង់ ថ្ងៃទី០៧ កុម្ភៈនេះ នៅក្នុងមន្ទីរពេទ្យគន្ធបុបា្ផទីក្រុងភ្នំពេញ ដែលធ្វើអោយអ្នកធ្លាប់ជួយឧបត្ថម្ភ ធ្លាប់អានដំណឹងនេះ មានអារម្មណ៍សោកស្តាយ និងក្តុកក្តួលជាទីបំផុត ។
ក្រោយការស្លាប់របស់នាង ហំ ស្រីលីន ក្រុមការងាររបស់ឯកឧត្តមបណ្ឌិត ហ៊ុន ម៉ាណែត បានជំនួយទឹកប្រាក់ចំនួន៧៥០ដុល្លារសហរដ្ឋអាមេរិក និងទឹកប្រាក់២០០ដុល្លារនិង៥មឺនរៀលទៀតដែលជំនួយមកពីប្រទេសអាមេរិក និងប្រទេសកូរ៉េ ដែលផ្តល់មកសហការីព័តមានក្នុងខេត្តរតនគិរី ក៏ត្រូវបានភ្នាក់ងារនៅទីក្រុងភ្នំពេញ បានប្រគល់ជូនទៅឪពុកនាងសំរាប់កិច្ចការសពរបស់នាងហើយផងដែរ ។
ដំណឹងចុងក្រោយនេះ សពនាង ហំស្រីលីន ត្រូវគេបូជាតាមការស្នើសុំរបស់ឪពុកនាង នៅក្នុងវត្តព្រែកលាប រាជធានីភ្នំពេញរួចរាល់ហើយផងដែរ ។
បើទោះបីនាងបានលាចាកលោកនេះក៏ពិតមែន ក៏អ្នកដែលធ្លាប់ដឹងដំណឹងរបស់នៅតែនឹកស្រណោះសោកស្តាយ និងចូលរួមមរណៈទុក្ខនេះយ៉ាងក្រៀមក្រំ ព្រមទាំងឧទ្ទិសអោយវិញ្ញាណ្ខន្ធរបស់នាង យោងចាប់កំណើតថ្មីក្នុងសេចក្តីសុខជារៀងរហូតទៅអើយ៕
ដោយៈ យឹម សារិទ្ធិ
