ខេត្តរតនគិរី ៖ អាជ្ញាធរក្រុងបានលុង បានបើកយុទ្ធនាការផ្សព្វផ្សាយ ស្តីពីការត្រួតពិនិត្យគ្រឿងញៀននិងផលប៉ះពាល់នៃការប្រើប្រាស់គ្រឿងញៀន តាមផែនការរបស់រាជរដ្ឋាភិបាលហើយ ក្រោយពីកម្ពុជានាពេលចុងក្រោយនេះ ត្រូវគេដឹងថាយុវជនកម្ពុជាមួយចំនួន កំពុងរងគ្រោះថ្នាក់ដោយសារតែបានប្រើប្រាស់គ្រឿងញៀននេះ។
យុទ្ធនាការនេះគឺបានធ្វើឡើងនៅព្រឹកថ្ងៃទី០៦ កុម្ភៈនេះ ក្រោមវត្តមានលោក គឹន វណ្ណា ប្រធានមន្ទីរយុត្តិធម៌កងរាជអាវុធហត្ថខេត្តរតនគិរី និងមានចូលរួមពីអនុប្រធានមន្ទីរកងរាជអាវុធហត្ថខេត្ត លោកគ្រូ អ្នកគ្រូ សិស្សានុសិស្ស រួមទាំងអាជ្ញាធរដែនដី មានមេភូមិ អនុភូមិ ចំនួនសរុប ៤៦៥នាក់។
ការអនុវត្តផែនការលេខ០១ផ ក ចុះថ្ងៃទី១៣ ខែធ្នូ ២០១៦ របស់រាជរដ្ឋាភិបាល ស្តីពីយុទ្ធនាការប្រយុទ្ធប្រឆាំងគ្រឿងញៀនខុសច្បាប់ លើកទី១រយៈពេល៦ខែ ចាប់ពីថ្ងៃទី០១ មករា ដល់ថ្ងៃទី៣០ មិថុនា ២០១៧ គឺត្រូវបានគេដឹងថា បានធ្វើឡើងនូវទូទាំងព្រះរាជាណាចក្រកម្ពុជា ។
ក្រោយពីលោក អ៊ុន ស៊ីដេត អភិបាលរងក្រុងបានលុង បានសំណេះសំណាលបើកកម្មវិធីរួចមក លោកវរៈសេនីយ៍ទោ គឹន វណ្ណា បានឡើងធ្វើបទបង្ហាញច្បាប់ ស្តីពីការត្រួតពិនិត្យគ្រឿងញៀន ដោយលើកយយកមាត្រាច្បាប់មួយចំនួន ពាក់ព័ន្ធទៅនឹងការដាំដុះ ការជួញដូរ ការរក្សារទុក ការចែកចាយ និងការប្រើប្រាស់ដោយខុសច្បាប់នូវសារធាតុញៀន និងបានធ្វើការពន្យល់អំពីផលប៉ះពាល់ នៃការប្រើប្រាស់គ្រឿងញៀន ជូនសមាជិកសមាជិការ ដែលអញ្ជើញចូលរួមក្នុងអង្គពិធីនោះ ។
លោក គឹន វណ្ណា បានថ្លែងទៅកាន់លោកគ្រូ អ្នកគ្រូ និងបងប្អូនប្រជាពលរដ្ឋ សិស្សានុសិស្ស ត្រូវមានការប្រុងប្រយ័ត្នខ្ពស់ ចំពោះការបញ្ចុះបញ្ចូលពីជនអគតិមួយចំនួន ដែលតែងតែបោកបញ្ឆោតអោយប្រព្រឹត្តនូវអំពើខុសច្បាប់ ជាពិសេសការប្រើប្រាស់នូវសារធាតុញៀន ។ លោកបានថ្លែងថា យើងត្រូវតែឆ្លើយថាទេចំពោះគ្រឿងញៀន ពីព្រោះគ្រឿងញៀនវាបានបំផ្លាញអនាគត បំផ្លាញសង្គមគ្រួសារ និងបំផ្លាញសង្គមជាតិយើងទៀតផង ៕
ដោយ យឹម សារិទ្ធិ