ស្រុកឆ្លូង បានរៀបចំពិធីផ្សព្វផ្សាយស្ដីពីការរីកចម្រើនរបស់នារីកម្ពុជា និងផែនការ ឆ្ពោះ ទៅ កាន់ការបោះឆ្នោតឃុំ សង្កាត់ ឆ្នាំ២០១៧ ក្រោមអធិបតីភាព លោកជំទាវ ស៊ុន សាភឿន តំណាងរាស្ត្រ មណ្ឌលក្រចេះ អមដំណើរដោយលោកជំទាវពេជ្យ ពិទូរដ្ឋា រួមមាន លោកស្រី ប៊ន សុភី អភិបាលរងខេត្ត លោកស្រីអភិបាលរងស្រុក និង មានការចូលរួមពីស្ត្រី ប្រមាណ ជាង ១០០ នាក់ កាលពីព្រឹកថ្ងៃទី ០៤ ខែកុម្ភៈ ឆ្នាំ២០១៧។
លោកស្រី ម៉ែន សុផល អភិបាលរងស្រុកឆ្លូងមានប្រសាសន៍ថា នេះគឺជាការ ផ្ដល់កិត្តិ យសដ៏ធំធេង និងបញ្ជាក់ពីឆន្ទះ និងការយកចិត្តទុកដាក់ខ្ពស់របស់គណបក្សប្រជាជនកម្ពុជា និងថ្នាក់ដឹកនាំរបស់រាជរដ្ឋាភិបាល ក្នុងការលើកកម្ពស់ស្ថានភាពស្ត្រី និងយុវវ័យ ដើម្បីឲ្យស្ត្រី ទទួលបាននូវការគោរពសិទ្ធិអំណាច ឋានៈ តួនាទី និងឱកាសចូលរួមដោយស្មើភាពរវាងបុរស និងស្ដ្រី ក្នុងសមភាពនៃការអប់រំ និងបង្កើនភាពអង់អាចដល់ស្ត្រី ក្នុងកិច្ចអភិវឌ្ឍន៍សង្គម ។
មានប្រសាសន៍បន្ថែមក្នុងពិធីផ្សព្វផ្សាយស្ដីពីការរីកចម្រើនរបស់នារីកម្ពុជា និងផែនការ ឆ្ពោះ ទៅ កាន់ការបោះឆ្នោតឃុំ សង្កាត់ ឆ្នាំ២០១៧ លោកជំទាវ ស៊ុន សាភឿន តំណាង រាស្ត្រ មណ្ឌលក្រចេះ បានបញ្ជាក់ថា យើងមានថ្ងៃនេះក៏ដោយសារគុណបំណាច់ របស់គណបក្ស ប្រជាជនកម្ពុជាដែលបានរំដោះយើងពីប្រល័យពូជសាសន៍ ។រហូតមកទល់ពេលនេះ យើង រស់នៅបានសុខសន្តិភាព ស្ថិរភាព និងសន្តិសុខសង្គម និងនយោបាយទោះមានបញ្ហា ប្រឈមតិចតួច បណ្ដាលមកពីគណបក្សប្រឆាំងខ្លះក៏ដោយ ។ ប្រទេសយើងក្រោមការដឹកនាំ ដ៏ឆ្លាតវៃ ប្រកបដោយគតិបណ្ឌិតខ្ពស់របស់ សម្ដេចអគ្គមហាសេនាបតីតេជោ នាយករដ្ឋមន្ត្រី មានការអភិវឌ្ឍន៍លោះគ្រប់វិស័យ សូមបីតែអន្តជាតិក៏ទទួល ស្គាល់ដែរ ។ លោកជំទាវ បាន បន្ត ទៀតថា ការបោះឆ្នោតក្រុមប្រឹក្សាឃុំ សង្កាត់នេះ ខិតជិតមកដល់ គឺនៅ តែប្រហែលជា ៤ខែប៉ុណ្ណោះ គឺថ្ងៃទី ០៤ ខែមិថុនាឆ្នាំ២០១៧ មានសារៈសំខាន់ និងជាគន្លឹះសម្រាប់ការបោះ ឆ្នោត ព្រឹត្តសភា និងជាពិសេសការបោះឆ្នោតទូទៅ សកល ជ្រើសរើសតំណាងរាស្ដ្រនៅឆ្នាំ ២០១៨ ខាងមុខ ដែល ជាកត្តាស្លាប់រស់ ។
ឆ្លៀតក្នុងឱកាសនោះដែលលោកជំទាវ និងក្រុមការងារបាននាំយកអំណោយ ទៅជូនដល់គ្រួសារចំនួន០៤ដែលរងគ្រោះដោយភ្លើងឆេះផ្ទះ នៅភូមិព្រែកសំរោងទី១ ឃុំខ្សាច់អណ្ដែត ស្រុកឆ្លូង ដែលក្នុងមួយគ្រួសារទទួលបានអង្ករ ១បាវ ទឹកស៊ីអ៊ីវ ១យួរ ត្រីខ ១យួរ មុង ភួយ កន្ទេរ និងថវិការ៥០ម៉ឺនរៀល ៕
