ក្រចេះ៖ ដើម្បីបង្ហាញពីភាពលូតលាស់លើវិស័យកសិកម្ម បង្កើនការយល់ដឹង អំពីសាកវប្បកម្ម និងលើកកម្ពស់សុវត្ថិភាពចំណីអាហារ មន្ទីរកសិកម្មខេត្តក្រចេះ បានរៀបចំពិពរណ៍កសិកម្មឡើង នៅរាត្រីថ្ងៃទី០១ ខែគុម្ភៈ ឆ្នាំ២០១៧ នៅបរិវេណមាត់ទន្លេទល់មុខមហោស្រពខេត្ត ។
ការតាំងពិពណ៌ផលិតផលកសិកម្មនេះ គឺដោយមានការគាំទ្រពីទីភ្នាក់ងារស្វីសដើម្បីអភិវឌ្ឍន៍ និងកិច្ចសហប្រតិបត្តិការណ៍ ដែលហៅកាត់ថា SDC ជាម្ចាស់ជំនួយ និងក្រុមអននុវត្តគម្រោង ដែលរួមមាន អង្គការអភិវឌ្ឍន៍ហហូឡង់ (SNV) សហការជាមួយមន្ទីរកិច្ចការនារី អង្គការមិនមែនរដ្ឋាភិបាល វិស័យឯកជន និងស្ថាប័នពាក់ព័ន្ធនានាទូទាំងខេត្ត ។
លោក ម៉ៅ វិចិត្រ អនុប្រធានមន្ទីរកសិកម្ម រុក្ខាប្រមាញ់ និងនេសាទ បានឲ្យដឹងថា គោលបំណងសំខាន់នៃការរៀបចំពិពរណ៍កសិកម្មនេះឡើង គឺចង់ឲ្យសហគមន៍អ្នកដាំបន្លែផ្លែឈើ បានដាក់តាំងនូវផលិតផលរបស់ខ្លួន និងចង់ឲ្យពួកគាត់បានស្គាល់ ជាមួយខាងក្រុមហ៊ុន ក្រុមអ្នកទិញបន្លែ ជាពិសេស គឺមានទំនាក់ទំនងជាមួយគ្នា ។
លោក បានបន្តថា ការរៀបចំពិពរណ៍កសិកម្មនេះ មិនមែនដើម្បីរកប្រាក់ចំនូលឡើយ ប៉ុន្តែជាព្រឹត្តិការណ៍ ដើម្បីបង្កើនតំបន់ផលិតកម្ម រកឱកាសភ្ជាប់បណ្ដាញទីផ្សារជាមួយពាណិជ្ជករ និងអ្នកពាក់ព័ន្ធដទៃទៀត និងដើម្បីអនុញ្ញាតឲ្យអ្នកពាក់ព័ន្ធទាំងនោះ បានបង្ហាញពីផលិតផល និងសេវាកម្មរបស់ខ្លួន សម្រាប់ការចែករំឡែកចំណេះដឹង និងការតភ្ជាប់កិច្ចសន្ទា ពាក់ព័ន្ធនិងវិស័យកសិកម្ម និងរកឱកាសសម្រាប់សាកវប្បកម្មក្នុងខេត្តក្រចេះ ។
ទន្ទឹមនោះ លោក វ៉ា ថន អភិបាលរងខេត្តក្រចេះ បានមានប្រសាសន៍លើកឡើងថា តាមរយៈព្រឹត្តិការណ៍នេះ នឹងក្លាយជាឱកាសមួយ ដើម្បីផ្លាស់ប្ដូរបទពិសោធន៍ជាមួយកសិករផ្សេងទៀត រៀនអំពីអាហាររូបត្ថម្ភ ការទទួលបាននូវបច្ចេកវិទ្យាថ្មី និងឱកាសដើម្បីពិភាក្សាកង្វល់ និងការលំបាក់របស់កសិករក្នុងការធ្វើកសិកម្មជាមួយអ្នកជំនាញ ឬការចែករំឡែកស្នាដៃ និងបទពិសោធន៍របស់អ្នកជាមួយកសិករផ្សេងទៀត ដែលមកពីតំបន់ផ្សេងគ្នា ។
លោកអភិបាលរងខេត្ត មានប្រសាសន៍បន្ដថា នៅឆ្នាំ២០១៦ ខេត្តក្រចេះ អនុវត្តការងារដាំដុះរួមមាន ផ្ទៃដីបង្កបង្កើនផលស្រូវរដូវវស្សាអនុវត្តន៍បានចំនួន ៣៣.០៧២ហិកតា លើផែនការ ៣៣.០០០ហិកតា ទិន្នផលមធ្យម ២,៧៤៦តោនក្នុង១ហិកតា បរិមាណផលសរុប ៩០,៨២៩តោន ។
ផ្ទៃដីបង្កបង្កើនផលស្រូវរដូវប្រាំង អនុវត្តន៍បានចំនួន ១៤.០០០ហិកតា លើផែនកា ១៤.០០០ហិកតា ទិន្នផលមធ្យម ៤,៨២៩តោនក្នុង១ហិកតា បរិមាណផលសរុប ៦១.២៥១តោន ។ ផ្ទៃដីដាំដុះដំណាំរួមផ្សំអនុវត្តបានចំនួន ១៤៥.២៨១ហិកតា ធៀបនឹងឆ្នាំ២០១៥ ខ្ពស់ជាង ៦០.៧៩៩ហិកតា បរិមាណផលសរុប ២.៦៤២.០៣៩តោន ធៀបនឹងឆ្នាំ២០១៥ ខ្ពស់ជាង ១.១៤៤.៧៦៧តោន ។ ដំណាំកសិ-ឧស្សាហកម្មរយៈពេលខ្លី អនុវត្តបាន ៦.៤២១ហិកតា បរិមាណផលសរុប ៦៣.១៧១តោន ធៀបនឹងឆ្នាំ២០១៥ ខ្ពស់ជាង ៥១.២៣០តោន និងដំណាំកសិ-ឧស្សាហកម្មរយៈពេលវែង ១០០.៤១៥ហិកតា ធៀបនឹងឆ្នាំ២០១៥ កើនឡើង ១១.៥៩០ហិកតា ។
លោកបានបន្ដថា បន្លែភាគច្រើនដែលប្រជាជនកម្ពុជា ទទួលទានមានច្រើនប្រភេទណាស់ ដែលមួយចំនួននៃបន្លែទាំងនោះជាប្រភេទបន្លែ ដាំដុះក្នុងមូលដ្ឋាន ប៉ុន្តែផលិតផលនៅក្នុងខេត្តនៅពុំទាន់បានបំពេញតាមតម្រូវការបរិភោគឲ្យបានគ្រប់គ្រាន់នៅឡើយទេ ដែលជាកត្តាទាមទារនូវការនាំចូលពីខេត្តជិតខាង និងពីបរទេស ។
តាមរយៈការអនុវត្តគម្រោងCHAINជាក់ស្ដែង ដោយមានកិច្ចសហការជាមួយមន្ទីរកសិកម្ម និងមន្ទីរកិច្ចការនារីខេត្ត លោកសង្ឃឹមជឿជាក់ថា ភាពក្រីក្ររបស់ប្រជាកសិករនៅក្នុងខេត្តក្រចេះ ក៏ដូចជាការនាំចូលផលិតផលបន្លែ និងផ្លែឈើពីបរទេស នឹងត្រូវកាត់បន្ថយមួយកម្រឹតថែមទៀត ៕