ខេត្តរតនគិរី ៖ រថយន្តចំនួន ២ គ្រឿងក្នុងចំណោមរថយន្តចំនួន ៣ គ្រឿង របស់អ្នកសារព័ត៌មានបានរងនូវការបុក និងវាយកំទេចដែលសង្ស័យថា បំណងបំបាក់ស្មារតី ខណ:ពេលក្រុមអ្នកព័ត៌មានទាំងនោះបានចុះយកព័ត៌មានបទល្មើសព្រៃឈើ ក្មុងស្រុកវ៉ើនសៃខេត្តរតនគិរី ប៉ុន្តែអធិការនគរបាលស្រុកនិយាយថា ជាករណីគ្រោះថ្នាក់ចរាចរណ៍។
តាមប្រសាសន៍លោក ទឺ នូថង អធិការនគរបាលស្រុកវ៉ើនសៃឲ្យដឹងថា រឿងហេតុនេះ ជាករណីគ្រោះថ្នាក់ចរាចរណ៍ គឺបានកើតឡើងកាលពីថ្ងៃទី១ ខែកុម្ភ: ឆ្នាំ២០១៧ ក្រោយពេលក្រុមអ្នកកាសែត និងអង្គការអភិក្សព្រៃឈើ និងអភិវឌ្ឍន៍ធនធានធម្មជាតិ បានចុះទៅថតរូបភាពនៅផ្ទះប្រជាពលរដ្ឋម្នាក់ឈ្មោះ ម៉េង ស្ថិតនៅក្នុងភូមិផាក់ណាម ត្រង់ចំណុចលើកំពង់ដ ភូមិកោះពាក្យ ឃុំកោះពាក្យ ស្រុកវ៉ើនសៃ។
លោកបញ្ជាក់នៅព្រឹកថ្ងៃទី២ ខែកម្ភ:នេះថា ក្រោយធ្វើសម្មភាពថតរូបរួច ពួកគេបានជិះរថយន្តត្រឡប់ក្រោយ មកដល់ចំណុចទួលអូរតូច (កន្លែងកប់ខ្មោចភូមឃួន) ក៏ស្រាប់តែមានគោយន្តកែច្នៃ១គ្រឿង បើកស្របទិសគ្នាបានបុករថយន្តក្រុមអ្នកកាសែតពីក្រោយ បង្កឲ្យបែកស្តុបមួយចំហៀង រួចក៍បើកហួសទៅមុខប្រមាណ៦០ម៉ែត្រទៀត ក៏បានបុកចំហៀងរថយន្តក្រុមអ្នក កាសែតម្តងទៀត ទើបម្ចាស់គោយន្តនោះគេចខ្លួនរត់ចូលព្រៃតែម្តង ក្រោយមកសមត្ថកិច្ចចុះវាស់វែង និងនាំយានយន្តទាំង ២ មករក្សាទុកនៅអធិការដ្ឋាន។
លោកបញ្ជាក់បន្តថា ក្រោយកើតហេតុនេះ ក្រុមអ្នកកាសែតនិងអង្គការបានត្រឡប់ទៅខេត្តវិញ ក៏ស្រាប់តែក្រុមអ្នកកាសែតទាំងនោះត្រឡប់មករាយការណ៍ថា មានមនុស្សមិនស្គាល់អត្តសញ្ញាណប្រមាណ១០នាក់ ប្រដាប់ដោយដែកត្បែងពូថៅនឹងដំថ្ម គប់នឹងវាយទៅលើរថយន្តមួយគ្រឿងទៀត ម៉ាកហាយឡែនឌឺ ពណ៌ សបណ្តាលឲ្យរងការខូចខាត រួចជនទាំងនោះបានគេចចូលព្រៃ ប៉ុន្តែមិនបង្កឲ្យមានរបួសស្នាមទេ។
សូមបញ្ជាក់ថា មនុស្សដែលជិះនៅក្នុងរថយន្តចំនួន៣គ្រឿងរបស់អ្នកកាសែតនឹងអង្គការនោះ មានចំនួន៧នាក់ ហើយរថយន្តបានរងនៅការបុកជាមួយគោយន្តកែច្នៃ ជារថយន្តរបស់លោក តែម វាសនា បំម្រើការនៅអង្គការអភិក្សព្រៃឈើ និងអភិវឌ្ឍន៍ធនធានធម្មជាតិ ។ ចំណែករថយន្តហាយ ឡែនឌឺ ពណ៌ស ជាកម្មសិទ្ធិរបស់លោកសុខសុវណ្ណ ប្រធានសមាគមន៍អ្នកព័ត៌មានខ្មែរប្រជាធិបតេយ្យ ។
អ្នកយកព័ត៌មានបានសុំធ្វើបទសំភាសន៍ជាមួយលោក សុខ សុវណ្ណ ប្រធានសមាគមន៍អ្នកសារព័ត៌មានខ្មែរប្រជាធិបតេយ្យ និងជាប្រធានក្រុមប្រឹក្សាសារព័ត៌មានកម្ពុជា នៅព្រឹកថ្ងៃទី២ខែកុម្ភ:នេះ ដើម្បីស្វែងរកការបំភ្លឺជុំវិញករណីកើតហេតុខាងលើនេះ ប៉ុន្តែលោកបានឆ្លើយយ៉ាងខ្លីថា រឿងរ៉ាវនេះ គឺទុកឲ្យសមត្ថកិច្ចចាត់វិធានការ។
គួរបញ្ជាក់ឡើងវិញថា នៅព្រឹកថ្ងៃទី២ខែកុម្ភ:នេះ ក្រុមអ្នកកាសែតប្រមាណ១០នាក់ ក្នុងនោះ មានលោក សុខ សុវណ្ណ ផងដែរ ត្រូវគេឃើញបានចតរថយន្តច្រើនគ្រឿង នៅក្នុងទឹកដីស្រុកវ៉ើនសៃ គឺស្ថិតនៅក្បែរកន្លែងដែលមានមនុស្សមិនស្គាល់អត្តសញ្ញាណបានធ្វើសម្មភាព គប់ដំថ្មនឹងវាយទៅលើរថយន្តរបស់លោក ។ មិនដឹងថា តើក្រុមអ្នកកាសែត គ្រោងនឹងមានវិធានការក្តៅ ដើម្បីជំរុញឲ្យសមត្ថកិច្ចវែកមុខអ្នកបង្កនោះដោយវិធីណាទេ ប៉ុន្តែបើតាមតម្រុយខ្លះៗ អ្នកបង្កគឺត្រូវបានគេស្គាល់នឹងមានរូបភាពខ្លះៗហើយ ។
ម្ចាស់តម្រុយខាងលើនេះ អ្នកយកព័ត៌មានមិនអាចបង្ហាញបានទេ គឺសូមរក្សាសិទ្ធិនឹងក្រមសិលធម៌វិជ្ជាជីវ: របស់អ្នកសារព័ត៌មាន៕
ដោយ ៖ កុច យទ្ធ និង យឹមសារិទ្ធ
