ការប្រែប្រួលអាកាសធាតុ ដែលត្រូវបានរំពឹងទុកថាមានការកើនឡើងជាបន្តបន្ទាប់នោះ គឺបង្កឱ្យមានគ្រោះមហន្តរាយ ធម្មជាតិកាន់តែច្រើនឡើងៗ បន្តជហឥទ្ធិផលកាន់តែខ្លាំងទៅលើជីវិតមនុស្សសត្វ និងធម្មជាតិនៅលើភពផែនដី បាននាំឱ្យស្ត្រី និង កុមារក្លាយជាជនរងគ្រោះ និងជនងាយរងគ្រោះ។ នេះជាប្រសាសន៍ឯកឧត្តម បណ្ឌិត ប៊ុត គិមស៊ាន អភិបាលរង នៃគណៈអភិបាល ខេត្តបាត់ដំបង ថ្លែងក្នុងពិធីបើកវគ្គបណ្តុះបណ្តាលស្តីពីការរៀបចំ កសាងផែនការត្រៀមបំរុង និងឆ្លើយតបគ្រោះភ័យ នៃគ្រោះ មហន្តរាយ ក្រុង ស្រុក ដែលរៀបចំដោយគណកម្មាធិការគ្រប់គ្រង គ្រោះមហន្តរាយខេត្ត កាលពីថ្ងៃទី០២ ខែតុលា នៅសាលា ខេត្តបាតដំបង។
ឯកឧត្តមបានបន្តទៀតថាៈ នៅប្រទេសកម្ពុជា គ្រោះមហន្តរាយបានកើតឡើងជាបន្តបន្ទាប់ចាប់ពីឆ្នាំ២០០៩មក បាន ជម្រុញឱ្យមានកិច្ចខិតខំប្រឹងប្រែងកាន់តែខ្លាំងថែមទៀត ដើម្បីពង្រឹងការគ្រប់គ្រងគ្រោះមហន្តរាយ ទាំងនៅថ្នាក់ជាតិ និងថ្នាក់ ក្រោមជាតិ។គណគ្របគ្រង គ្រោះមហន្តរាយបានចាត់ទុកថា ការត្រៀមបំរុង និងឆ្លើយតបគ្រោះភ័យនៃគ្រោះមហន្តរាយ គឺជា ការងារអាទិភាពមួយ ក្នុងចំណោមការងារអទិភាពជាច្រើនទៀត ព្រោះមុខសញ្ញាគ្រោះត្រូវបានកត់សំគាល់ថា មានការកើនឡើង ពីមួយឆ្នាំទៅមួយឆ្នាំ។ ដើម្បីត្រៀមបំរុង និងឆ្លើយតបគ្រោះមហន្តរាយនានា ដែលអាចនិងកើតឡើងជាយថាហេតុ នាឆ្នាំ២០១៤ នេះក៏ដូចជានៅបណ្តាឆ្នាំខាងមុខ រដ្ឋបាលខេត្តបាត់ដំបង ត្រូវរៀបចំផែនការយុទ្ធសាស្ត្រ សម្រាប់អនុវត្តកម្មវិធីត្រៀមបំរុង និង ឆ្លើយតបគ្រោះភ័យ នៃគ្រោះមហន្តរាយក្នុងខេត្តមានៈ ជំនន់ទឹកទន្លេសាប ជំនន់ទឹកភ្លៀង គ្រោះរាំងស្ងួត ខ្យល់ព្យុះ និងអគ្គីភ័យ។ ផែនការត្រៀមបំរុង និងឆ្លើយតបគ្រោះភ័យ នៃគ្រោះមហន្តរាយនេះមានគោលបំណងលើកកំពស់ប្រសិទ្ធិភាព នៃកិច្ចអន្តរាគមន៍ ដើម្បីឆ្លើយតបទៅនឹងសេចក្តី ត្រូវការចាំបាច់របស់ប្រជាជនដែលប្រឈម និងគ្រោះថ្នាក់ ប៉ះពាល់ដល់ទ្រព្យសម្បត្តិ សត្វព្វាហនៈ ជីវិតមនុស្សសេដ្ឋកិច្ចសង្គម ហេដ្ឋារចនាសង្គម និងបរិស្ថានជាដើម។
ឯកឧត្តមសង្ឃឹមថាឆ្លងតាមវគ្គបណ្តុះបណ្តាលនេះ យើងនិងទទួលបាននូវចំណេះដឹងកាន់តែស៊ីជម្រៅ ស្តីពីការកសាង ផែនការត្រៀមបំរុង និងឆ្លើយតបគ្រោះភ័យ នៃគ្រោះមហន្តរាយក្រុង ស្រុក ហើយរួមចំណែកផ្តល់ព័តមានគ្រប់ជ្រុងជ្រោយ ជូនលេខាធិការដ្ឋានគ្រប់គ្រង គ្រោះមហន្តរាយខេត្ត ដើម្បីរៀបចំកសាងផែនការបំរុង និងឆ្លើយតបគ្រោះភ័យ នៃគ្រោះមហន្តរាយ ខេត្ត ដាក់ជូនថ្នាក់ដឹកនាំខេត្ត ពិនិត្យអនុម័ត និងប្រកាសឱ្យប្រើប្រាស់ជាផ្លូវការ បានទាន់ពេលវេលា ៕