កំពង់ឆ្នាំង ៖ កាលពីវេលារសៀលថ្ងៃទី២៣ មករា២០១៧នេះ ប្រជាពលរដ្ឋ នៅភូមិចុងកោះ សង្កាត់ផ្សារឆ្នាំង ក្រុងខេត្តកំពង់ឆ្នាំងចំនួន២១០ គ្រួសារស្មើនឹង ២៥២នាក់ បានលើកគ្នាមកតវា នៅមុខអធិការដ្ឋាននគបាល ក្រុងកំពង់ឆ្នាំង ក្នុងគោលបំណង សុំឲ្យ អាជ្ញាធរខេត្ត ជួយដោះស្រាយ ឲ្យបានត្រឹមត្រូវ ក្នុងការបន្លាស់ទីមកកាន់ទីតាំងថ្មី ដោយសារទីតាំងចាស់នៅតាមច្រាំងទន្លេរផ្សាក្រោមដែលពលរដ្ឋរស់កន្លងមក អាជ្ញាធរខេត្តត្រូវយកធ្វើការអភិវឌ្ឍន៍ តំបន់នោះអោយក្លាយជាតំបន់ទេសចរណ៍ ។
ពលរដ្ឋបាលើកឡើងបញ្ជាក់ថា ការផ្លាស់ប្តូរលំនៅដ្ឋាននេះ អាជ្ញាធរក្រុងខេត្ត មិនគួរអោយពួកគាត់ទៅទិញដីថ្មីដើម្បីសាងសង់លំនៅដ្ឋានថ្មីនោះទេព្រោះអាជ្ញាធរ បានដកហូតយកដីរបស់ពួកគាត់យកទៅធ្វើការអភិវឌ្ឍន៍តំបន់ទេសចរណ៍ហើយនោះ គួរណាតែផ្ដល់ដីអោយពួកគាត់បានសាងសង់លំនៅដ្ឋានរស់នៅអោយបានសមរម្យវិញ(ដោះដូរ) ម្យ៉ាងទៀតអាជ្ញាធរ បានសន្យាជួយចេញថ្លៃរុះរើផ្ទះ តាមទំហំផ្ទះធំនិងតូច ចាប់ពី៤០០ ដុល្លារ រហូតដល់១៣០០ ដុល្លារ ចំពោះដីដែលប្រជាពលរដ្ឋត្រូវទៅរស់នៅថ្មីនោះអាជ្ញារបានតម្រូវអោយប្រជាពលរដ្ឋ គឺត្រូវទិញដោយបានអោយប្រជាពលរដ្ឋបង់រំលោះ រយៈពេល៣ឆ្នាំ ក្នុងតម្លៃ៣៤០០ដុល្លារ ក្នុង១ប្លង់ផ្ទះល្វែង(៥ម៉ គុណ២០ម៉)ហើយកន្លែងថ្មីនេះមានចំងាយ១២០០ម៉ែត្រពីច្រាំងទន្លេរដែលជាទីតាំងចាស់។
ពលរដ្ឋបញ្ជាក់ផងដែរថាក្នុងការផ្លាស់ប្តូរលំនៅដ្ឋានទៅកាន់ទីតាំងថ្មីនេះ ប្រជាពលរដ្ឋមានការសប្បាយចិត្ត ដោយទទួលបានដីសាងសង់លំនៅដ្ឋានថ្មី ដែលមិនប្រឈមនិងគ្រោះថ្នាក់ ប៉ុន្តែពួកគាត់មិនមានលុយទិញដីបង់រំលោះនោះឡើយ ដូច្នេះហើយបានជាប្រជាពលរដ្ឋទាំងនោះ សំណូមពរចំពោះសម្តេច តេជោ ហ៊ុន សែននិងសម្ដេចកិត្តិព្រឹតបណ្ឌិតជួយអន្តរាគមន៍ឬជួយឧបត្ថមនូវ ថវិការសម្រាប់ទិញដីបង់រំលោះនោះ ប្រជាពលរដ្ឋទាំងនោះមិនប្រឆាំងនិងការអភិវឌ្ឍន៍របស់ខេត្តទេ តែសូមឲ្យជួយដោះស្រាយឲ្យបានត្រឹមត្រូវ ៕