ក្រចេះ ៖ ពលរដ្ឋឃុំជ្រោយបន្ទាយ ផ្អើលភ្លុកទឹកភ្លុកដីនាំគ្នាចោមរោមមុខប៉ុស្ដិ៍ នគរបាលរដ្ឋបាលជ្រោយបន្ទាយ គ្រាដែលក្រុមចោរលួចម៉ូតូពីរនាក់ ត្រូវកម្លាំងនគរបាលប៉ុស្ដិ៍ចាប់ខ្លួន ។
លោកអនុសេនីយ៍ទោ អេង ហឿន មេប៉ុស្តិ៍ជ្រោយបន្ទាយ បានឲ្យដឹងថា ករណីចុះបង្ក្រាបក្រុមចោរលួចម៉ូតូនេះ ធ្វើឡើងបន្ទាប់ពីសមត្ថកិច្ចប្រទះឃើញក្រុមចោរ ២នាក់ កំពុងជិៈម៉ូតូមុខសញ្ញាដែលបាត់ ក៏ដេញតាមចាប់ប្រផាក់ប្រភេញតែម្តង ពេលនោះក្រុមចោរក៏ផ្ដួលម៉ូតូរត់គេចខ្លួនបាត់ ។
លោកបានបន្តថា ដោយមានការយកចិត្តទុកបញ្ជារ ផ្ទាល់ពីលោកឧត្តមសេនីយ៍ស្នងការខេត្ត លន់ សាផាត និងលោកអធិការស្រុកព្រែកប្រសព្វ កម្លាំងសមត្ថកិច្ចប៉ុស្ដិ៍នគរបាលបាលរដ្ឋបាលជ្រោយបន្ទាយ សហការជាមួយកម្លាំងអាវុធហត្ថ ស្នាក់ការ ៧០៦ និងកម្លាំងយោធា ប្រចាំការនៅជ្រោយបន្ទាយ រួមជាមួយបងប្អូនប្រជាពលរដ្ឋ បានប្រតិបត្តិការណ៍ ចាប់ចោរលួចម៉ូតូបានចំនួន ២នាក់ ដល់ទីតាំងកន្លែងលាក់ខ្លួន និងស្ដុកទុកវត្ថុតាង ព្រមទាំងឆែកឆេររកឃើញវត្ថុតាង ម៉ូតូ ចំនួន ៦គ្រឿង និងឧបកណ៍សម្រាប់ធ្វើសកម្មភាពលួចមួយចំនួន នៅចំណុច បុសផ្អាវ ឃុំជ្រោយបន្ទាយ ស្រុកព្រែកប្រសព្វ ខេត្តក្រចេះ ។
ជនសង្ស័យម្នាក់ ឈ្មោះ នល់ ម៉េង ស្រុង អាយុ ៤៤ឆ្នាំ និងបក្ខពួកម្នាក់ទៀតឈ្មោះ លី លេខ អាយុ ៣៧ឆ្នាំ ជនសង្ស័យទាំងនាក់ មានទីលំនៅភូមិតាអុង ឃុំតាអុង ស្រុកចំការលើ ខេត្តកំពង់ចាមជាមួយគ្នា ។
លោកបន្តឲ្យដឹងទៀតថា សមត្ថកិច្ច បានប្រើរយៈពេលជិត៥ម៉ោង ពីម៉ោង១០:៤៥នាទីព្រឹកថ្ងៃទី១៧ ខែមករា ឆ្នាំ២០១៧ រហូតដល់វេលាម៉ោង ៣:៥០នាទីល្ងាចថ្ងៃដដែល ទើបឈានដល់ការចាប់ខ្លួនជនសងស្ស័យទាំងពីរនាក់ខាងលើ ។ បច្ចុប្បន្ន ជនសង្ស័យទាំងពីរនាក់ ត្រូវបានឃុំខ្លួនបណ្ដោះអាសន្ន នៅប៉ុស្ដិ៍នគរបាលរដ្ឋបាល ជ្រោយបន្ទាយ ដើម្បីកសាងសំនុំរឿង បញ្ជូនខ្លួនបន្តទៅកាន់ស្នងការនគរបាលខេត្ត ចាត់ការបន្តតាមនីតិវិធីច្បាប់ ។
ប្រភពពីប្រជាពលរដ្ឋ បានឲ្យដឹងថា កន្លងមកប្រជាពលរដ្ឋនៅក្នុងឃុំជ្រោយបន្ទាយ តែងតែបាត់ទ្រព្យរបស់ជាញឹកញ៉ាប់ ដូចជា សត្វគោ ក្របី និងម៉ូតូជាដើម ។ ហើយពេលនេះ សមត្ថកិច្ចនគរបាលប៉ុស្ដិ៍រដ្ឋបាលជ្រោយបន្ទាយ បង្ក្រាបចាប់បានចោរលួចម៉ូតូ ២នាក់នេះ ពួកគាត់ពិតជាមានចិត្តសប្បាយរីករាយសាទរយ៉ាងខ្លាំង ហើយប្រជាពលរដ្ឋ ក៏សុំណូមពរឲ្យសមត្ថកិច្ចបន្តជួយការពារ ស្វែងរកមុខសញ្ញាក្រុមចោរ និងបង្ក្រាបជាបន្ត ដើម្បីយកមកផ្ដន្ទាទោសទៅតាមផ្លូវច្បាប់ ៕
