ខេត្តរតនគិរី ៖ បើទោះជារាជរដ្ឋាភិបាលបង្កើតគណកម្មការថា្នក់ជាតិ បង្ក្រាប ទប់ស្កាត់ការកាប់បំផ្លាញព្រៃឈើយ៉ាងណាក៏ដោយ ការកាប់បំផ្លាញព្រៃឈើនិងឈូសឆាយ កាប់ទន្ទ្រានយកដីធ្វើកម្មសិទ្ធនៅតំបន់ហាមឃាត់មួយចំនួន នៅតែមានក្រុមឈ្មួញធ្វើ ដដែលជាដដែល។
ជាក់ស្តែងដីព្រៃនៅតាមបណ្ដោយមាត់អូរតាងលើ នៅខាងលើអូរចិន្តៃ ស្ថិតក្នុងភូមិ តាកុកព្នង ឃុំបរខាំ ស្រុកអូរយ៉ាដាវ ខេត្តរតនគិរី កាលពីថ្ងៃទី១២ ខែមករា ឆ្នាំ២០១៧ គេឃើញ ផ្ទៃដីរាប់រយហិតា មានទិដ្ឋភាពជាសណ្ឋានឈូសឆាយពង្រៀប ព្រៃ និងផ្ទៃដី ក្នុងគោលបំណងយកធ្វើជាកម្មសិទ្ធ។ នៅចំណុចនោះដែរ គេសង្កេតឃើញ មានកម្មករជាច្រើន ធ្វើជម្រកស្នាក់នៅបណ្ណោះអាសន្ត នៅតាមមាត់អូរ និងមានការសាងសង់លំនៅដ្ឋាន រួមជាមួយនិងមធ្យោបាយរថយន្តនិងម៉ូតូ សម្រាប់បំរើការក្នុងទីតាំងនោះផងដែរ។
សកម្មភាពមមាញឹកល្មើសច្បាប់ខាងលើនេះ លោក ឡេង យុគ នាយរដ្ឋបាលព្រៃឈើផ្នែកបរកែវនិយាយផ្ទេរការទទួលខុសត្រូវថា៖ ចំណុចខាងលើនេះ ក្រោមការគ្រប់គ្រងរបស់បរិស្ថាន ដែលគេហៅថា តំបន់អភិរក្សកីឡាប្រម៉ាញ់ ហើយបើចង់ដឹងច្បាស់សុំសួរទៅខាងបរិស្ថានទៅ។ លោក ផុន ខេមរិន្ទ ប្រធានមន្ទីរបរិស្ថាន អ្នកសាព័ត៌មានយើង មិនអាចសុំការបំភ្លឺណាមួយបានទេ ដោយទូរស័ព្ទចូលមិនមានអ្នកទទួល បើទោះជាអ្នកសារព័ត៌មានយើង ព្យាយាមសុំជួបនៅមន្ទីរ បរិស្ថានខេត្តក៏ខាងរដ្ឋបាល ប្រាប់ថា លោកមិននៅដែរ។
អភិបាលរងខេត្តរតនគិរី លោក យឹម ផែន ទទួលបន្ទុកព្រៃឈើថា លោកមិនបានដឹងទេ ពីព្រោះលោកមកភ្នំពេញប៉ុន្មានថ្ងៃហើយ បើចង់ដឹងឲ្យបានច្បាស់ សុំសួរទៅអាជ្ញាធរស្រុក ពីព្រោះគេនៅជិតជាង????។ ដោយឡែកលោក ម៉ា វិចិត្រ អភិបាលស្រុកអូរយ៉ាដាវ បានឲ្យដឹងថា បញ្ហាខាងលើនេះ លោកមិនបានដឹង ដោយ ខាងភូមិ ឃុំ មិនបានរាយការណ៍ ករណីខាងលើ ល្ងាចនេះលោកនិងកោះប្រជុំ បង្កើតគណកម្មការថ្នាក់ស្រុក ដើម្បីចុះទៅត្រួតពិនត្យ នៅព្រឹកថ្ងៃទី១៤ ខែមករា ឆ្នាំ២០១៧ នេះ។
គួរបញ្ជាក់ថា តំបន់ព្រៃធម្មជាតិដ៏ស្រស់ត្រកាល ដែលគួរឲ្យសោកស្ដាយ នៅណុចខាងលើ គេសង្កេតឃើញថា កំពុងរងនូវការ កាប់បំផ្លាញយ៉ាងរង្គៀល ជាច្រើនកន្លែង ដែលការណ៍នេះ បានធ្វើឲ្យគេមានការព្រួយបារម្មណ៍កាន់តែខ្លាំងឡើងៗ ថាអាចនិងមាន សកម្មភាពឈូសឆាយ និងកាប់បំផ្លាញព្រៃឈើកាន់តែធ្ងន់ធ្ងរ៕
