ខេត្តរតនគិរី ៖ គំនរឈើជាច្រើនគំនូកដែលឈ្មួញមិនស្គាល់អត្តសញ្ញណប្រមែប្រមូល មកកៀងគរ ទុកលាក់ត្រង់ចំណុច ខាងក្រោយ ផ្ទះមួយខ្នង ឈ្មោះ ចែ នី ស្ថិតនៅក្នុងភូមិ អូរល្វាក់ ឃុំជ័យឧត្តម ស្រុកលំផាត់ខេត្តរតនគិរី ។
ទីស្នាក់ការដែនជំរកសត្វព្រៃលំផាត់អូរល្វាក់ មានមន្ត្រីបរិស្ថានពីររូបកំពុងគ្រប់គ្រងត្រូវបានស្គាល់:ទីមួយ: ឈ្មោះ ធឹម ចិត្រ មានឋានៈប្រធានស្នាក់ការបរិស្ថានអូរល្វាក់ ទីពីរ:ឈ្មោះ យុន សុខ ឡេង ជាប្រធានក្រុមដើរល្បាត ។ ចំងាយពីទីស្នាក់ទៅគំនរឈើ ប្រមាណជាង1000ម៉ែត្រប៉ុណ្ណោះ ឃើញទីតាំងគំនរឈើ នេះតែម្តង ។
ស្ថិតនៅតាមបណ្តោយផ្លូវជាតិលេខ76 (ខេត្តរតនគិរី មណ្ឌលគិរី) តាមប្រភពពីប្រជាពលរដ្ឋដែលឆ្លងកាត់ទៅមកតាមផ្លូវបានអោយក្រុមសារព័តិមានដឹងជារឿយៗយូរមកហើយថា ៖ ទីតាំងស្តុកឈើប្រណីតខាងលើនេះ មានពីរកន្លែង (ផ្ទះចំនួនពីរខ្នងក្បែរគ្នា)គឺ ផ្ទះទីមួយ ៖ ត្រូវបានស្គាល់ឈ្មោះ តាតី ជាអតីត មន្ត្រីបរិស្ថាន ដែលបច្ចុប្បន្នចូលនិវត្តន៍ ហើយផ្ទះទីពីរឈ្មោះ ចែ នី នេះតែម្តង ។ (មួយខែ៣០ថ្ងៃ) ពួកគាត់តែងប្រទះឃើញរថយន្តសាំយ៉ុងចាស់ៗពណ៌លឿង ពណ៌ស ជាច្រើនគ្រឿង ចេញពីក្រុងបានលុង ឆ្ពោះទៅទីតាំងទាំងពីរនេះ ដើម្បីដឹកជញ្ជូនយកឈើមកក្រុងបានលុង ទាំងកណ្តាលថ្ងៃចែសតែម្តងដោយគ្មានញញើតខ្លាចក្រែង និងសមត្ថកិច្ចជំនាញពាក់ព័ន្ធណាមួយនោះឡើយ ។
មានប្រភពមួយផ្សេងបានខ្សឹបប្រាប់អោយដឹងទៀតថា ៖ ឈ្មោះ ថា ភេទប្រុស (ឈ្មួញដុះស្លែ) ជាអ្នកប្រមែប្រមូលឈើប្រណិតគ្រប់ទីកន្លែងមកស្តុកទុក នៃទីតាំងខាងលើ នេះ ដើម្បីរងចាំចែកចាយទៅក្រុម រថយន្តសាំយ៉ុងទាំងនោះ និងមួយចំនួនដឹកតាមរថយន្តផងខ្លួនខ្លះ រំដោះចេញទាំងយប់ទាំងថ្ងៃយ៉ាងរលូន។ ឈ្មួញដុះស្លែម្នាក់នេះ បានរៀបចំកញ្ចប់ពង្រាយសមត្ថកិច្ចពាក់ព័ន្ធតាមដងផ្លូវ គ្មានចន្លោះណាមួយនោះឡើយ ។ ទើបការប្រកបមុខរបរ ទិញលក់និងដឹកជញ្ជូនបទល្មើសព្រៃឈើបានយ៉ាងរលូន គ្មានឧបសគ្គរារាំងដូច្នេះ ។
ពាក់ព័ន្ធករណីខាងលើ លោក ធឹម ចិត្រ ប្រធានស្នាក់ការបរិស្ថានអូរល្វាក់បានបំភ្លឺតាមទូរស័ព្ទអោយក្រុមការងារយើងដឹងកាលពីល្ងាចថ្ងៃទី13 ខែមករា ឆ្នាំ ២០១៧ ទាំងសំដីមិនសមរម្យថា អោយអ្នកសារព័តិមានសុំដីការពីសាលាដំបូងខេត្ត ទើបគេនឹងធ្វើការបង្ក្រាបគំនរឈើខាងលើនេះ ហើយក៍បិទទូរស័ព្ទទៅ ៕
