ព្រឹកថ្ងៃទី២៦ ខែកញ្ញា លេខាធិការដ្ឋានខេត្ត រៀបចំការបោះឆ្នោតបានរៀបចំ ធ្វើការណែនាំផ្សព្វផ្សាយពីការពិនិត្យបញ្ជី និងចុះឈ្មោះ បោះឆ្នោតឆ្នាំ២០១៤ដល់ក្រុមប្រឹក្សាស្រុក ក្រុង ស្មៀន ឃុំ សង្កាត់ ទូទាំងខេត្ត អង្គការពាក់ព័ន្ធ និងគណបក្សនយោបាយនៅសាលាខេត្តបាត់ដំបង។
លោក វន ពន ប្រធានគណកម្មាធិការខេត្តរៀបចំការបោះឆ្នោតបានឱ្យដឹងថា យោងជំពូកទី៦ នៃ ច,ប,ត,រ តម្រូវឱ្យ គ,ជ,ប ចាត់ចែង ការរៀបចំពិនិត្យបញ្ជីឈ្មោះ និងចុះឈ្មោះបោះឆ្នោត និងការផ្ត់ល់សុពលភាពលើបញ្ជីបោះឆ្នោត ចាប់ពីថ្ងៃទី ០១ ខែតុលា ដល់ទី៣១ ខែធ្នូ ជារៀង រាល់ឆ្នាំ។ការពិនិត្យបញ្ជីឈ្មោះ និងចុះឈ្មោះបោះឆ្នោតឆ្នាំ២០១៤ នៅតាមឃុំ សង្កាត់ ត្រូវចាប់ផ្តើមពីថ្ងៃទី ០១ ខែតុលា ដល់ថ្ងៃទី២០ ខែតុលា ឆ្នាំ២០១៤ ប្រជាពលរដ្ឋខ្មែរ ត្រូវទៅការិយាល័យចុះឈ្មោះបោះឆ្នោត ដែលមានទីតាំងនៅសាលា ឃុំ សង្កាត់ ឬ សុំចុះឈ្មោះបោះឆ្នោត។
ការពិនិត្យបញ្ជីឈ្មោះ និងចុះឈ្មោះបោះឆ្នោតឆ្នាំ២០១៤ គឺជាឱកាសដ៏សមស្រប ដើម្បីសំអាតបញ្ជីបោះឆ្នោតកែតម្រូវឈ្មោះ និងទិន្នន័យ អ្នកបោះឆ្នោត និងចុះឈ្មោះ អ្នកបោះឆ្នោតថ្មី ដើម្បីបង្កើតបញ្ជីបោះឆ្នោតផ្លូវការប្រចាំឆ្នាំ ឱ្យកាន់តែមានបច្ចុប្បន្នភាព និងសក្រិតភាព។ សៀវភៅ ណែនាំនេះ គឺជាសេចក្តីពន្យល់ អំពីបច្ចេកទេស បទប្បញ្ញត្តិ និងគោលការលើចំណុចសំខាន់ៗ នៃការពិនិត្យបញ្ជីឈ្មោះ និងចុះឈ្មោះបោះឆ្នោត ឆ្នាំ២០១៤ សម្រាប់មន្ត្រីបោះឆ្នោត ពិសេស មន្ត្រីចុះឈ្មោះបោះឆ្នោតក្រុមប្រឹក្សា ឃុំ សង្កាត់ ស្មៀន ឃុំ សង្កាត់ទាំងអស់ក្នុងការរៀនសូត្រ ស្វែងយល់ និងការអនុវត្តតួនាទី និងភារកិច្ចរបស់ខ្លួនតាមនិតិវិធី ឱ្យបានត្រឹមត្រូវទាន់ពេលវេលា និងប្រកបដោយស្មារតីទទួលខុសត្រូវខ្ពស់។ សៀវភៅណែនាំ នេះ ក៏ជាជំនួយដ៏សំខាន់ សម្រាប់គណបក្សនយោបាយ អង្គការមិនមែនរដ្ឋាភិបាល សង្កេតការបោះឆ្នោត និងស្ថាប័ណ្ណពាក់ព័ន្ធទាំងអស់ ដើម្បីសិក្សា ស្វែងយល់ និងរួមសហការអនុវត្ត តាមតួនាទីរបស់ខ្លួនក្នុងការពិនិត្យបញ្ជីឈ្មោះ និងចុះឈ្មោះបោះឆ្នោតដើម្បីប្រព្រឹត្តទៅស្របតាមច្បាប់ និង ប្រកប់ដោយភាពសេរី ត្រឹមត្រូវយុត្តិធម៌ និងតម្លាភាព ៕