ខេត្តមណ្ឌលគិរី ៖ ក្រោយពីករណីរថយន្តប៉ាកុងដឹកឈើ២គ្រឿង រួមទាំងមនុស្ស៥នាក់ត្រូវបានកម្លាំងយោធានៃវរៈព្រំដែនគោក១០៣ ដឹកនាំបង្ក្រាបផ្ទាល់ដោយព្រះរាជអាជ្ញាអមសាលាដំបូងខេត្តមណ្ឌលគិរី កាលពីវេលាម៉ោងជាង៨យប់ថ្ងៃទី១ ខែមករា មក មានសេចក្តីរាយការណ៍ថា ឡានឈើនិងមនុស្ស ត្រូវគេរៀបចំធ្វើការផ្លាស់ប្តូរត ដើម្បីបង្វែរសំណុំរឿង ពេលដែលរថយន្តប៉ាកុងដឹកឈើនោះ ត្រូវនាំ យកមកផ្ញើនឹងអធិការដ្ឋាននគរបាលស្រុកកោះញ៉ែក ហើយត្រូវបានអធិការដោះលែងមនុស្សប្រាំនាក់ និងប្ដូរថយន្ដប៉ាកុងពីគ្រឿងនោះផង។
ប្រភពសមត្ថកិច្ចបង្ហើបឲ្យដឹងច្បាស់ថា បានជាមានការផ្លាស់ប្ដូររថយន្ដប៉ាកុង២គ្រឿង និងដោះលែងមនុស្ស៥នាក់នោះ គឺម្ចាស់រថយន្ដដឹកឈើខាងលើជាមន្ត្រីប៉ូលិសសេដ្ឋកិច្ចម្នាក់មានឈ្មោះ ភី។ សមត្ថកិច្ចបន្តថា សូមកុំបញ្ចេញឈ្មោះខ្ញុំ ឈ្មោះ ភី នោះគឺគេមានខ្នងបង្អែកធំណាស់ ក្នុងខេត្តមណ្ឌលគិរី សូម្បីតែឋានៈអធិការពេលចាប់ឈើដឹងច្បាស់ហើយថា ធ្វើនេះខុសច្បាប់ក៏នៅតែធ្វើដែរ។
មានការកត់សម្គាល់ថា៖ក្នុងការចុះហត្ថលេខាទទួលប្រគល់វត្ថុតាងពីមន្ត្រីយោធាវរៈព្រំដែន ១០៣ ដែលបានប្រគល់វត្ថុតាងឲ្យនោះ លោក ខ្លូត សុឃា អធិការមិនចុះហត្ថលេខាទទួលទេ លោកអធិការបែរជាបញ្ជាឲ្យ ឈ្មោះ យ៉ម ហ៊ុនអេង ជារងទៅចុះហត្ថលេខាទទួលប្រគល់ចំពោះទាំងអធិការនៅនឹងមុខ។ តែរហូតមកដល់ពេលនេះលោក យ៉ម ហ៊ុនអេង កំពុងតែជ្រួលច្របល់ ទាំងដឹងថា ខ្លួនបានចុះហត្ថលេខាមិនត្រឹមត្រូវ ចំណែកលោក ភី ជាប៉ូលិសសេដ្ឋកិច្ច រូបនោះដែលគេថា ជាម្ចាស់ រថយន្ដដឹកឈើខាងលើនោះ ភ្នាក់ងារយើងកំពុងស្វែងរកការបំភ្លឺ៕