ក្រចេះ ៖ ប្រជាពលរដ្ឋរស់នៅតាមដងទន្លេមេគង្គ ស្ថិតក្នុងអន្តែងដូនសង្កាត់ក្រគរ ក្រុងក្រចេះ ខេត្តក្រចេះ កំពុងព្រួយបារម្ភយ៉ាងខ្លាំង ពីការបាក់ច្រាំងទន្លេ ដែលមានទីតាំងបូមខ្សាច់នៅមិនឆ្ងាយពីលំនៅដ្ឋានរបស់ពួកគាត់ ។ ការព្រួយបារម្ភពីការបាក់ច្រាំងទន្លេ គឺបង្កពីការធ្វើអាជីវកម្មបូមខ្សាច់ផ្ទាល់ ខ្លួនរបស់ លោក រស់ ចិន្តា ដែលមិនអនុវត្តតាមស្តង់ដាលក្ខណៈបច្ចេកទេស ដែលច្បាប់កំណត់ឲ្យ ហើយអាជីវកម្មបូមខ្សាច់នោះមានទីតាំងស្ថិតក្នុងភូមិអន្តែងដូនសង្កាត់ក្រគរក្រុងក្រចេះខេត្តក្រចេះ។
ប្រជាពលរដ្ឋរស់នូវតាមដងទន្លេមេគង្គខេត្តក្រចេះ បានប្រាប់ឲ្យកាលពីព្រឹកថ្ងៃទី០៥ ខែមករា ឆ្នាំ២០១៧ ឲ្យដឹងថា អាជីវកម្មបូមខ្សាច់ដែលបង្កឲ្យព្រួយបារម្ភភ័យខ្លាច ទៅនឹងការបាក់ស្រុតច្រាំងទន្លេជាបន្តបន្ទាប់នោះមានម្ចាស់ឈ្មោះ លោក រស់ ចិន្តា ដោយម្ចាស់អាជីវកម្មមួយរូបនេះអនុវត្តផ្ទុយពីលក្ខណៈបច្ចេកទេស ដែលច្បាប់កំណត់ឲ្យជាយូរឆ្នាំមកហើយ ។
ចំពោះមន្ត្រីជំនាញវិញ គាត់អត់ខ្វល់ខ្វាយពីផលប៉ះពាល់ការបាក់ច្រាំងទន្លេ ដល់ទីលំនៅដ្ឋានរបស់ពលរដ្ឋឡើយ ក្នុងនោះ ពួកគាត់បានដាក់ការសង្ស័យដល់មន្ត្រីមួយចំនួនបានឃុបឃិតជាមួយម្ចាស់អាជីវកម្មបូមខ្សាច់ខុសលក្ខណះបច្ចេកទេសនឹងខុសទីតាំងដែលច្បាប់បានកំណត់ឲ្យ ។ ហើយកន្លងមក មិនដែលឃើញក្រុមមន្ត្រីជំនាញ និងសមត្ថកិច្ចដែលពាក់ព័ន្ធចុះមកត្រួតពិនិត្យម្តងណាឡើយ។
ប្រជាពលរដ្ឋបានបន្តឲ្យដឹងទៀតថា នៅកន្លែងធ្វើអាជីវកម្មបូមខ្សាច់ខុសស្តង់ដារបស់លោក រស់ ចិន្តាមានម៉ាស៊ីនក្បាល បូមនឹងទុយោមានមុខកាត់ធំជាច្រើនដើមៗ កំពុងធ្វើសកម្មភាពបូមខ្សាច់ចេញ ពីក្នុងទន្លេយកមករក្សាគរទុកលើច្រាំងក្បែរមាត់ទន្លេ ដើម្បីចែកចាយបន្តទៅតាមបណ្តាស្រុកផ្សេងៗ ។
ក្នុងទីតាំងអាជីវកម្មបូមខ្សាច់ខាងលើ គេសង្កេតឃើញមានស្នាមរូងខ្សាច់ជ្រៅៗដូចស្រះគេជីកអាចន៏ដីយ៉ាងដូច្នេះ។
ចំនែកប្រជាពលរដ្ឋរស់នូវក្រចេះជាប់មាត់ទន្លេមរគង្គបានសំដែងពីការព្រួយបារម្ភពីការបាក់ច្រាំងទន្លេដោយសារការធ្វើអាជីវកម្មបូមខ្សាច់របសលោក រស់ ចិន្តា ហៅតាចាខ្វៃ ។
លោកបានបន្តទៀតថា ប្រសិនបើអាជ្ញាធរនឹងមន្ត្រីជំនាញមិនបានចុះទៅសិក្សាឲ្យបានច្បាស់លាស់ទេ វានឹងធ្វើឲ្យបាក់ស្រុតដល់ផ្ទះប្រជាពលរដ្ឋជាបន្តបន្ទាប់ ។ ជាក់ស្តែងនៅតាមដងទន្លេមេគង្គ ស្ថិតក្នុងស្រុកឆ្លូងខេត្តក្រចេះ ថ្មីៗនេះ មានការបាក់ស្រុតច្រាំងទន្លេធ្វើឲ្យប៉ះពាល់លំនៅដ្ឋានប្រជាពលរដ្ឋជាង៣០ខ្នងស្ថិតក្នុងភូមិឈើទាលភ្លោះឃុំព្រែកសាម៉ាន់ស្រុកឆ្លូងខេត្តក្រចេះ។
បើតាមការបញ្ចាក់ពីលោក រ័ត្ន ម៉ូលីដា ប្រធានមន្ទីធនធានទឹកខេត្តក្រចេះកន្លងមក លោកធ្លាប់បង្ហើបឲ្យដឹងថា រាល់ការធ្វើអាជីវកម្មបូមខ្សាច់ ដែលមានទីតាំងនូវសង្កាត់ក្រុងក្រចេះច្បាប់មិនអនុញាតឲ្យបូមចេញពីត្រើយទន្លេឡើយព្រោះបង្កឲចរន្តទឹកហូរបុកបាក់ស្រុតដីច្រាំងទន្លេក្នុងក្រុងក្រចេះ។
ទាក់ទិនការធ្វើអាជីវកម្មបូមខ្សាច់ខុសពីច្បាប់កំណត់ឲ្យនោះ ខ្ញុំមិនអាចសុំកាបំភ្លឺពីលោក សុខ គីរីរត្ន័ ប្រធានមន្ទីរ៉ែខេត្តក្រចេះ បាននៅឡើយទេចំនែកលោក រស់ ចិន្តា ហៅតាចាខ្វៃ ជាម្ចាស់អាជីវកម្មបូមខ្សាច់ ក៏មិនអាចសុំការបំភ្លឺបានទេ នៅរសៀលថ្ងៃទី០៥ ខែមករា ឆ្នាំ២០១៧ នេះ តែក៏នៅរង់ចាំទទួលការបញ្ជាក់ច្បាស់ការនឹងផ្សាយជូននាពេលក្រោយ ៕