ខេត្តរតនគិរី ៖ នៅព្រឹកថ្ងៃទី០៥ ខែមករា ឆ្នាំ២០១៧ ឯកឧត្តម ទេសរដ្ឋមន្ត្រី លី ធុជ អគ្គលេខាធិការអាជ្ញាធរមីន ឯកឧត្តម វិល លៀម អាដេត អគ្គរដ្ឋទូតសហរដ្ឋអាមេរិក ប្រចាំនៅកម្ពុជា និងឯកឧត្តម ថង សាវុន អភិបាលខេត្តរតនគិរី បានអញ្ជើញចុះសួរសុខទុក្ខប្រជាពលរដ្ឋរស់នៅតំបន់មានសំណល់ជាតិផ្ទុះ និងពិនិត្យពីស្ថានភាពលើការបោសសំអាតសំណល់ជាតិផ្ទុះ ពីសម័យសង្គ្រាម នៅក្នុងភូមិសាស្ត្រឃុំត្រពាំងក្រហម ស្រុកកូនមុំ ។
យោងតាមរបាយការណ៍ឲ្យដឹងថា៖ គិតចាប់ពីឆ្នាំ២០១២ ដល់ឆ្នាំ២០១៦ មានផ្ទៃដីសរុបចំនួន១៥,៦២១.១៩៧ម² នៅក្នុងខេត្តរតនគិរី បានបោសសំអាតរួចរាល់ ក្នុងនោះមានប្រជាពលរដ្ឋចំនួន២៩៥ គ្រួសារបានទទួលផល និងបានកំទេចគ្រាប់បែកចង្កោមជាច្រើនប្រភេទចំនួន ១២,៧៨៥គ្រាប់ អំបែងគ្រាប់ទំលាក់ចំនួន ៣៥៦,៧៦៩ អំបែង ។
គិតចាប់ពីឆ្នាំ២០០៧ រហូតដល់បច្ចុប្បន្នមានប្រជាពលរដ្ឋក្រីក្រចំនួន ២៣ នាក់ បានស្លាប់ និងរបួសដោយសារសំណល់ជាតិផ្ទុះពីសម័យសង្គ្រាមដែលទម្លាក់ដោយសហរដ្ឋអាមេរិក និងមានប្រជាពលរដ្ឋជាច្រើនរាប់ពាន់នាក់ បានស្លាប់ចាប់តាំងពីឆ្នាំ១៩៧៩ ។
ឯកឧត្តម វិលលៀម អាដេត បានសន្យា បន្តសហការជាមួយរាជរដ្ឋាភិបាលកម្ពុជា នៅក្នុងការងារបោសសំអាតសំណល់ជាតិផ្ទុះឲ្យអស់ពីកម្ពុជានៅក្នុងឆ្នាំ២០២៥ ខាងមុខនេះ ៕
