ខេត្តរតនគិរី ៖ ឈើសុក្រំមុខ 12 × ៤០ ឬ ៦០×២,២ ម៉ែត្រចំនួន៧២ដុំ ត្រូវបានបង្ក្រាប ដោយព្រះរាជអជ្ញារងលោក ជា សុភ័ក្ត្រ កាលពីថ្ងៃទី២៩ខែ ធ្នូ ឆ្នាំ២០១៦ ស្ថិតនៅក្នុងចំការកៅស៊ូ ភូមិបាលែ ឃុំ ម៉ាលិច ស្រុក អណ្តូងមាស ខេត្តរតនគិរី ដែលមានជនល្មើស ឈ្មោះ ពៅ កូនចែមុំ និងតាហុង ដែលឈ្មោះពៅ នេះអះអាងថា ខ្លួនបច្ចុប្បន្នរស់នៅភូមិកើតហេតុខាងលើ និងមានស្រុកកំណើតនៅរាជធានីភ្នំពេញ ។ ហើយជនល្មើសមានចេតនារារាំងការចុះអនុវត្តនីតិវិធីរបស់តុលាការតែមិនបានសម្រេច។
ក្នុងប្រតិបត្តិការនៃការចុះបង្ក្រាបបទល្មើសខាងលើនេះ មានការចូលរួមដោយកំលាំងជំនាញរដ្ឋ បាលព្រៃឈើផ្នែកបរកែវ កំលាំងនគបាលប្រឆាំងបទល្មើសសេដ្ឋកិច្ចខេត្ត ដឹកនាំផ្ទាល់ដោយព្រះរាជអាជ្ញារង អមសាលាដំបូងខេត្តរតនគិរី លោក ជា សុភ័ក្ត្រ ។
ក្នុងរយៈពេលនៃការបង្ក្រាបបទល្មើសខាងលើ គេសង្កេតឃើញថា ម្ចាស់ឈើសុក្រំ ខាងលើមានចេតនាបង្អាក់ចំពោះការកំពុងអនុវត្តនីតិវិធីបង្ក្រាបបទល្មើស ជាក់ស្តែងរបស់កងកំលាំង ដោយគេអង្កេតឃើញថា ជនប្រព្រឹត្តបទល្មើសបានCALL ទៅឆ្វេកឆ្វាច ទៅអ្នកមានអំណាចក្នុងស្រុក និងខេត្តពិសេសជនប្រព្រឹត្តល្មើសម្នាក់នេះបាននិយាយក្តែងៗ និងថា គេ CALL ទៅអភិបាលខេត្តសិន ។ មិនតែប៉ុណ្ណោះ បុគ្គលជាជនល្មើសបានតវ៉ាផ្លូវច្បាប់ជាមួយព្រះរាជអជ្ញា ព្រមទាំងបានប្រើសំដីយកឈ្មោះថ្នាក់ដឹកកំពូលខេត្តមកជជែក ចំពោះមុខលោកលោកព្រះរាជអជ្ញានិងកំលាំងជំនាញ រួមទាំងក្រុមអ្នកសារព័ត៌មានយ៉ាងច្រើន។
តែការអន្តរាគមន៍ស្វែងរកជំនួយពីជនល្មើសទៅកាន់មន្ត្រីធំៗក្នុងខេត្តមានអភិបាលខេត្តជាដើមនោះ មិនបានសម្រេចដូចបំណងរបស់ខ្លួននោះឡើយ ខណៈលោក ជា សុភ័ក្ត្រ ព្រះរាជអជ្ញារងសាលាដំបូងខេត្តបានប្រើឆន្ទានុសិទ្ធិ តាមគតិយុត្តិច្បាប់ បង្ក្រាបបទល្មើសជាក់ស្តែង ទាល់តែបានសម្រេចយ៉ាងជោគជ័យ បើទោះបីបទល្មើសជាក់ស្តែងខាងលើ មានមន្ត្រីខាងណាខាងណីជាអ្នកមានអំណាចធ្វើការរារាំងដោយប្រយោលយ៉ាងច្រើនក៍ដោយចុះ ។
ថ្វីត្បិតតែម្ចាស់ឈើដែលជាជនល្មើសរក្សាទុកឈើសុក្រំគ្មានច្បាប់អនុញាតដោយល្មើសច្បាប់មិនត្រូវបានឃាត់ខ្លួនភ្លាមៗនៅនិងកន្លែងកើតហេតុមែន ប៉ុន្តែសមត្ថកិច្ចនិងតុលាការ ធ្វើតាមនីតិវិធីតាមផ្លូវច្បាប់នៅពេលក្រោយក៍មិនដឹង ព្រោះជាសិទ្ធិផ្លូវច្បាប់របស់អំណាចតុលាការ? ។
តែសូមបញ្ជាក់ថា ខណៈដែលលោកព្រះរាជអជ្ញាដឹកនាំកំលាំងជំនាញរដ្ឋបាលព្រៃឈើ ដែល កំលាំងប្រដាប់អាវុធផ្សេងទៀតមិនទាន់បានមកទាន់ ខណៈនោះ ជនប្រព្រឹតបទល្មើសបានគេចខ្លួនបាត់អាចសង្ស័យថា មានអ្នកការពារជាមន្ត្រីៗដែលជនល្មើសបានស្នើសុំអន្តរាគមន៍នោះពន្យល់ផ្លូវច្បាប់បានមុនបន្តិចកុំអីត្រូវបានវាយខ្នោះបាត់ទៅហើយ។
លោក ឡេង យុគ នាយផ្នែករដ្ឋបាលព្រៃឈើបរកែវ បានបញ្ជាក់ប្រាប់ក្រុមអ្នកយកព័ត៌មាននៅកន្លែងកំពុងបង្ក្រាបថា ឈើល្មើសច្បាប់ទាំងនេះ ត្រូវដឹកតាមរថយន្តជួលទៅរក្សាទុកនៅផ្នែករដ្ឋបាលព្រៃឈើបរកែរដើម្បីចាត់ការបន្តតាមនីតិវិធី ៕
