ក្រចេះ ៖ សមត្ថកិច្ចចម្រុះបានបើកប្រតិបត្តិការឃាត់បានរថយន្តដឹកឈើល្មើសច្បាប់ចំនួន២គ្រឿងនៅក្រុងក្រចេះ ។ ប្រតិបត្តិកានេះចូលរួមសហការរួមមានកម្លាំងប៉ុលីសក្រុង កម្លាំងអាវុធហត្ថក្រុងក្រចេះ កម្លាំងអាវុធហត្ថស្រុកចិត្របុរី និងផ្នែករដ្ឋបាលព្រៃឈើក្រចេះ ជាមួយសង្កាត់រដ្ឋបាលព្រៃឈើថ្មគ្រែ ធ្វើឡើងនៅចំនុចមុខសាលាសង្កាត់ក្រចេះ ក្រុងក្រចេះ ខេត្តក្រចេះ កាលពីវេលាម៉ោងជាង១០យប់ ថ្ងៃទី២៦ ខែធ្នូ ឆ្នាំ២០១៦។
សមត្ថកិច្ចបានបញ្ជាក់ឲ្យដឹងថា រថយន្ដទាំង២គ្រឿងនេះដឹកឈើចេញពីព្រំប្រទល់ខេត្តស្ទឹងត្រែង ដែលក្រុមឈ្មួញបំរុងដឹកយកទៅលក់បន្ដនៅខេត្តត្បូងឃ្មុំ តែមិនបានសំរេចត្រូវអស់ល័ក្ខណ៍ ជាប់អន្ទាក់សមត្ថិកិច្ចចម្រុះ តែមិនបានឃាត់ខ្លួនម្ចាស់ឈើ និងអ្នកបើកបររថយន្ដនោះទេ ព្រោះម្ចាស់បានរត់បាត់ស្រមោលដោយមិនស្គាល់អត្តសញ្ញាណទេ ៕
លោក ម៉ី វុទ្ធី នាយសង្កាត់រដ្ឋបាលព្រៃឈើថ្មក្រែ បានឲ្យដឹងថា រថយន្ដចំនួន២គ្រឿងដែលសមត្ថកិច្ចឃាត់នោះផ្ទុកឈើអាប្រភេទលេខ២ មានចំនួនជាង៦មែត្រគូប ហើយត្រូវកម្លាំងរដ្ឋបាលព្រៃឈើយកទៅរក្សាទុកនៅស្ថានីបណ្ដុះកូនឈើខ្សា ដើម្បីកសាងសំនុំរឿងចាត់ការបន្តទៅតាមច្បាប់រដ្ឋបាលព្រៃឈើ៕