ក្រចេះ៖ កាលពីថ្ងៃទី២៣ ខែធ្នូ ឆ្នាំ២០១៦ ខណ្ឌរដ្ឋបាលជលផល សហការជាមួយអាជ្ញារស្រុក ចុះបង្ក្រាបឧបករណ៍នេសាទខុសច្បាប់ជាច្រើនប្រភេទ នឹងចាក់លែងកូនត្រីចូលក្នុងបឹងធម្មជាតិ នៅចំនុចបឹងប្រា បឹងកូនចាប និងបឹងទរ ឋិតនៅភូមិឈើទាលភ្លោះ ឃុំព្រែកសាម៉ាន់ ស្រុកឆ្លូង ខេត្តក្រចេះ ។ ការចុះបង្ក្រាបខាកលើនេះ គឺធ្វើឡើងដោយមានយកចិត្តទុកដាក់ និងក្រោមការចង្អុលបង្ហាញពីឯកឧត្តម សរ ចំរុង អភិបាលខេត្តក្រចេះ និងលោក សៀន គិន នាយខណ្ឌ ជលផលក្រចេះ ដោយសហការជាមួយគណៈបញ្ជាកាការឯកភាពស្រុកឆ្លូង ដឹកនាំដោយលោក ម៉ុក ពន្លក នាយរងខណ្ឌ ព្រមទាំងសហគមន៍នេសាទ បានចុះប្រតិបត្តិការចាប់បង្ក្រាប ។
លោក ម៉ុក ពន្លក នាយរងខណ្ឌ បានអោយដឹងថា ក្នុងប្រតិបត្តិការនេះ កម្លាំងសមត្ថកិច្ចចម្រុះបានធ្វើការរុះរើ និងបំផ្លាញចោលនូវវត្ថុតាងនៃបទល្មើស មួយចំនួនរួមមាន របាំងស្បៃមុង ចំនួន ២២ខ្សែ ប្រវែង៣១០០ម៉ែត្រ, លូស្បៃមុងចំនួន ២២មាត់លូ, បង្គោលចម្រឹងកូនឈើឬស្សី ចំនួនជាង ៣១០ដើម និងបានចាក់លែងត្រីចម្រុះចំនួន ៥០គីឡូក្រាម ចូលក្នុងបឹងធម្មជាតិ ។
លោក នាយរងខណ្ឌ បានបញ្ជាក់ថា កិច្ចសហការរវាងមន្ត្រីជំនាញ និងអាជ្ញាធរស្រុក ចុះបង្ក្រាបបទល្មើសនេសាទ នៅពេលនោះ គឺមានសារៈប្រយោជន៍ ២យ៉ាង ដែលជាគោលបំណងចង់បានរបស់ប្រជាពលរដ្ឋរស់នៅក្នុងតំបន់នោះ ទី១៖ លុបបំបាត់ចោលនូវឧបករណ៍នេសាទល្មើសច្បាប់ដូចជាស្បៃមុង និងសាច់អួនក្រលាញឹកដែលវាបាន បំផ្លិចបំផ្លាញធនធានជលផលយ៉ាងធ្ងន់ធ្ងរ ។ ម្យ៉ាងវិញទៀត គឺអាចធ្វើឲ្យហ្វូងធំតូចចរាចរ ចេញទៅទន្លេបានស្រួលផង។ ទី២៖ ឆ្លើយតបបានទាន់ពេលវេលានូវតម្រូវការរបស់ប្រជាពលរដ្ឋក្នុងការ បង្កបង្កើនផលកសិកម្ម ពិសេសការធ្វើស្រែប្រាំង និងដាំបន្លែបង្កាផ្សេងៗ ព្រោះតែទឹករនាមអាចហូរទៅទន្លេបានលឿន មិនបណ្តាលឲ្យចាល់ឡើយ ។
លោក បញ្ជាក់បន្ថែមថា កិច្ចការទាំងអស់ខាងលើ គឺមានសារសំខាន់ខ្លាំងណាស់ ដូច្នេះលោកបានជំរុញអោយមន្ត្រីជំនាញក្រោមឱវាទទាំងអស់ត្រូវតែបង្កើនកិច្ចសហការអោយបានល្អជាមួយអាជ្ញាធរដែនដីគ្រប់ថ្នាក់ ជាពិសេសគណៈបញ្ជាការឯកភាពស្រុក សហគមន៍មូលដ្ឋាន និងប្រជាពលរដ្ឋ ដើម្បីចូលរួមថែរក្សា ការពារ អភិរក្សធនធានជលផលអោយនៅស្ថិតស្ថេរគង់វង្សសម្រាប់ពេលបច្ចុប្បន្ន និងថ្ងៃអនាគត គឺដើម្បីបំពេញតម្រូវការជាម្ហូបអាហារប្រចាំថ្ងៃសម្រាប់ប្រជាជនកម្ពុជាយើង តាមរយៈការនេសាទដោយប្រើប្រាស់ឧបករណ៍នេសាទគ្រួសារ ។
គូសបញ្ជាក់ថា កាលពីដើមចុងខែវិច្ឆិកា កន្លងទៅ មន្ត្រីជំនាញជលផល បានសហការជាមួយអាជ្ញាធរស្រុក ឃុំ និងកងកម្លាំងប្រដាប់អាវុធទាំងបីប្រភេទ ព្រមទាំងសហគមន៍នេសាទ ចុះធ្វើការបង្ក្រាបម្តងរួចមកហើយ ព្រមទាំងបានដុតបំផ្លាញ់ចោលនូវឧបកណ៍នេសាទល្មើសច្បាប់ជាច្រើនគ្រឿង និងបានចាក់លែងកូនត្រីជាច្រើនគីឡូ ប៉ុន្តែប្រជាពលរដ្ឋមួយចំនួនតូច នៅតែបន្តធ្វើសកម្មភាពនេសាទដោយប្រើឧបករណ៍ខុសច្បាប់ ។
លោក ម៉ុក ពន្លក បានអំពាវនាវដល់អាជ្ញាធរ សមត្ថកិច្ច និងប្រជាពលរដ្ឋទាំងអស់ ឲ្យមានស្មារតីភ្ញាក់រលឹក និងចូលរួមអភិរក្សពូជមច្ឆាជាតិឡើងវិញ ដើម្បីឲ្យនៅគង់វង្សរហូតដល់ក្មេងជំនាន់ក្រោយ ។ ហើយលោក ក៏បានផ្ដាជ្ញាចិត្ត នឹងសហការបន្តជាមួយអាជ្ញអាធរមូលដ្ឋានស្រុក សមត្ថកិច្ច ចុះបង្ក្រាបឧបកណ៍ល្មើសនេសាទដូចភ្លៀងរលឹក និងមានប្រសិទ្ធភាព ៕