ក្រចេះ ៖ លោក ហង្ស ចាន់ឌី អភិបាលស្រុកចិត្របុរីបានបញ្ជាក់ឲ្យដឹងនៅល្ងាចថ្ងៃទី២១ខែធ្នូឆ្នាំ២០១៦នេះថា ករណីទំនាស់ដីធ្លីរបស់ពលរដ្ឋចំនួន១១គ្រួសារ ដែលរស់នៅ ភូមិសំបុក ឃុំសំបុក ស្រុកចិត្របុរី ដែលកាន់កាប់ដីរដ្ឋនៅភូមិថ្មក្រែលើឃុំថ្មក្រែ ស្រុកចិត្របុរី ខេត្តក្រចេះនោះ លោកបានលើកឡើងថា ចំពោះពលរដ្ឋចំនួន១១គ្រួសារនោះ អាជ្ញាធរបានចុះដោះស្រាយជូនពួកគាត់ជាង១០លើក ដោយអាជ្ញាធរខ្វៀលដីជូនពួកគាត់ចំនួនជាង២០ហិកតា ដោយ៩គ្រួសារយល់ព្រមផ្ដិតមេដៃ សល់តែ២គ្រួសារតែប៉ុណ្ណោះមិនព្រមផ្ដិតមេដៃ ។ ក្រោយមកនៅសល់ដីចំនួនជាង៤០ហិកតា អាជ្ញាធរផ្ដល់ដីនោះឲ្យទៅដល់ពលរដ្ឋរស់នៅភូមិថ្មក្រែតាមដងទន្លេដោយរងគ្រោះដោយបាក់ច្រាំងទន្លេ ។ ក្រោយមកអាជ្ញាធរចុះឈូកឆាយលើផ្ទៃដីចំនួនជាង៤០ហិកតា អោយទៅពលរដ្ឋចំនួន៧៥គ្រួសារនោះ តែពួកគាត់ទាំង១១គ្រួសារនោះ ដោយលោកស្រីឃុតមុំជាសកម្មជនកណបក្សសង្គ្រោះជាតិកៀងគរគ្នាមករារាំង មិនអោយឈូសឆាយដីទាំងនោះ ។ អាជ្ញាធរបានប្រើកម្លាំងចុះទៅហាមឃាត់ និងសម្របសម្រួល់ពួកគាត់ដោយមានសមភាពចូលរួមអភិបាលរងខេត្ត ប្រធានមន្ទីរដែនដី អាជ្ញាធរស្រុកចិត្របុរី និងកងកម្លាំងទាំងបីប្រភេទ។
លោកអភិបាលស្រុកបន្ដទៀតថា លោកបានសួរទៅលោកស្រី ឃុត មុំថា បងស្រីជាអ្នកញុះញុងប្រជាពលរដ្ឋមកតវ៉ា ស្រាប់តែគាត់ខឹងចាប់ហែកអាវខ្លួនកណ្ដាលហ្វូង ក្រោយមកលេចលឺថា គាត់ចាប់ហែកអាវរបស់បងស្រីនោះទៅវិញ ។
លោក ហង្ស ចាន់ឌី អភិបាលស្រុកចិត្របុរីបានបញ្ជាក់បន្ថែមទៀតថា ពលរដ្ឋចំនួន១១គ្រួសារនោះ មានអ្នកនយោបាយលាបពណ៌ នៅពីក្រោយខ្នងរបស់គាត់ ទើបពួកគាត់ធ្វើការបះបោរឲ្យចលាចល ។ ហើយលោកធ្វើការបដិសេធចំពោះការចុះផ្សាយរបស់ទូរទស្សន៍ MSJ TV ថា លោកដណ្តើមទូរស័ព្ទពីស្ត្រី ដោយលូកយកក្នុងខោលីអូរបស់ស្ត្រីនោះ និងចាប់ហែកអាវមិនមានករណីបែបនេះ។ លោកសុំណូមពរដល់អគ្គនាយកទូរទស្សន៍ MSJTV មេត្តាផ្សាយបកស្រាយឡើងវិញ ដោយកុំជឿពលរដ្ឋតែម្ខាងដោយមិនបានសួររូបលោក ៕
