ខេត្តស្ទឹងត្រែង ៖ រថយន្តប្រភេទយីឌុបផ្លូវប្រាំពីរគ្រឿង ក្នុងចំណោមបីគ្រឿងដែលគេដឹងថា ជារបស់ក្រុមហ៊ុនពេជ្រ ឬទ្ធីសី ដែលផ្ទុកឈើពេញចេញពីដែនដីខេត្តរតនគិរី ឆ្លងកាត់ខេត្តស្ទឹងត្រែង ក្នុងបំណងនាំឆ្ពោះទៅកាន់ទីផ្សារប្រទេសវៀតណាម តាមទឹកដីខេត្តក្រចេះត្រូវ បានសមត្តកិច្ចឃាត់ទុកកាលពីម៉ោងជិតពាក់កណ្តាលអាធ្រាត្រ នាថ្ងៃ១៦ធ្នូ ចុងសប្តាហ៍មុននេះ នៅចំណុចជញ្ជីងថ្លឹងរថយន្តអូរពងមាន់ ស្ថិតក្នុងភូមិរាជានុកូល សង្កាត់ស្ទឹងត្រែង ក្រុងស្ទឹងត្រែង ខេត្តស្ទឹងត្រែង និងនាំយកមកត្រួតពិនិត្យ ក្រោមការសង្ស័យថា រថយន្តទាំងនោះបានបង្កប់ឈើប្រណិត លើសម៉ែត្រគូប និងគ្មានច្បាប់អនុញ្ញាតក្នុងការដឹកជញ្ជូនឈើ ។ មន្ត្រីព្រៃឈើឲ្យដឹងថា៖ រថយន្តដឹកឈើចេញពីខេត្តរតនគិរី ទាំងអស់មានចំនួន៣គ្រឿង ១គ្រឿងមិនបានឃាត់ទេ ព្រោះមានច្បាប់អនុញ្ញាតត្រឹមត្រូវ តែពីរគ្រឿងទៀតត្រូវបានឃាត់ នាំមកកាន់ស្នាក់ការបណ្តុះកូនឈើអូរពងមាន់ ដើម្បីត្រួតពិនិត្យ។
រថយន្តទាំងពីរគ្រឿងដែលរងការឃាត់នេះ ជាប្រភេទ ( Hyundai ) ១-ពាក់ស្លាក់លេខកំពង់ចាម3A- 3399 និងទី២-ពាក់ស្លាកលេខកំពង់ចាម 3A-3761 រថយន្តទាំង២គ្រឿងនេះ ដឹកឈើសុក្រំ ឈើប្រភេទលេខ១ ដោយដឹកជញ្ជូនចេញពីខេត្តរតនគីរី ឆ្ពោះទៅកាន់ទីផ្សារប្រទេសវៀតណាម បានឆ្លងកាត់ខេត្តស្ទឹងត្រែង បន្តចូលទៅខេត្តក្រចេះ។
លោកថា ការឃាត់រថយន្តដឹកឈើនេះ គឺបានធ្វើឡើងក្រោមការសង្ស័យថា គ្មានច្បាប់ ដឹកលើសចំនួនម៉ែត្រគូប ដែលបានកំណត់តែត្រឹម១៨ម៉ែត្រគូបនោះ និងអាចបង្កប់ឈើប្រ ណិតពីរក្រោម។ រថយន្តដែលត្រូវឃាត់ត្រួតពិនិត្យនេះ ដោយសារខុសស្លាកលេខក្នុងប៉េសេ ដោយបានកំណត់ឲ្យប្រើប្រាស់ស្លាកលេខ ភ្នំពេញ3A-3761និង ភ្នំពេញ3A-3399 ហើយរថយន្តដែលដឹកឈើនៅពេលនេះ គឺពាក់ស្លាកលេខកំពង់ចាមទៅវិញ។
រថយន្តដឹកឈើទាំងនេះ ជារបស់ក្រុមហ៊ុនពេជ្រ ឬទ្ធីសី និងមានឧកញ៉ាសី ជាម្ចាស់ ហើយឈើទាំងនេះ គឺគេបានប្រមូលទិញដោយខុសច្បាប់ពីប្រជាពលរដ្ឋដែលចូលកាប់នៅក្នុងតំបន់នោះ ដឹកចូលក្រុមហ៊ុន និងបាននាំចេញធ្វើជំនួញក្រៅប្រទេសក្រោមរូបភាពការវិនយោគ?។ ចំពោះឈើដែលផ្ទុកក្នុងរថយន្ត១គ្រឿង បើតាមការប៉ាន់ប្រមាណ មានក្រោមពី៣០ម៉ែត្រគូបត្រីគុណនោះទេ ឯច្បាប់ដែលអនុញ្ញាតឲ្យដឹកជញ្ជូននោះ ក្នុង១រថយន្ត មានតែត្រឹម១៨ម៉ែត្រគូបត្រីគុណប៉ុណ្ណោះ។ទោះបីយ៉ាងណាគេសង្ស័យថាឧកញ៉ាសីនេះនឹងមិនបណ្តោយឲ្យមេព្រៃចាប់រឹបអូសឈើដែលមាតម្លៃខ្ទង់ម៉ឺនដុល្លារអាមេរិកទទេៗនោះទេគេច្បាស់ជារកវីធីដោះស្រាយក្រោមតុជាមិនខាន។
ជាក់ស្តែងចាប់តាំងពីថ្ងៃឃាត់រថយន្តនោះ រហូតមកទល់នឹងថ្ងៃ១៩ធ្នូនេះ សមត្ថកិច្ចជំនាញនៅមិនទាន់ឲ្យដឹងថា រថយន្តទាំងពីរគ្រឿងរបស់លោកឧកញ៉ាសី ដែលជាអ្នកប្រមូលទិញឈើពីប្រជាពលរដ្ឋ នៅរតនគិរី និងខេត្តស្ទឹងត្រែងខុសច្បាប់នោះ មានបង្កប់ឈើប្រណិត និងដឹកលើសច្បាប់កំណត់នោះប៉ុន្មាននោះទេ? ។ជាងនេះទៅទៀត មន្ត្រីព្រៃឈើប្រចាំដែនដីខេត្តស្ទឹងត្រែង ម្នាក់ៗសុទ្ធតែពិបាកទំនាក់ទំនង ដោយសារទូរស័ព្ទចូលទៅគ្មានអ្នកទទួល ៕
