ភ្នំពេញ ៖ លោក ផែង វណ្ណៈ ដែលជាមន្ត្រីនគរបាលនិងជាសកម្មជនបណ្តាញសង្គមហ្វេប៊ុកល្បីឈ្មោះម្នាក់ត្រូវបានគេមើលឃើញថា អាចនឹងជួបបញ្ហាប្រសិនបើហ៊ានបន្តសង្គ្រាមជាមួយធនាគារអេស៊ីលីដា រឿងឃុបឃឹតគ្នាបន្លំប្រាក់ពន្ធរដ្ឋរថយន្តប្រចាំឆ្នាំ។
ជាក់ស្តែងនៅថ្ងៃទី១៦ធ្នូឆ្នាំ២០១៦ធនាគារអេស៊ីលីដា ភីអិលស៊ី ដែលជាធនាគារធំមួយនៅប្រទេសកម្ពុជាបានចេញលិខិតបដិសេធមួយដោយចាត់ទុកថា ការបង្ហោះព័ត៌មាននៅលើគណនី Facebook ឈ្មោះផែងវណ្ណៈកាលពីថ្ងៃទី១៥ធ្នូថា«ធនាគារអេស៊ីលីឃុបឃិតគ្នាជាមួយម្ចាស់រថយន្តលួចបន្លំថវិការដ្ឋលើបញ្ហាបង់ពន្ធផ្លូវនិងការបន្តផ្សព្វផ្សាយរបស់សារព័ត៌មានក្នុងស្រុកមួយចំនួន» ។
សេចក្តីប្រកាស ចោទថា«ការផ្សព្វផ្សាយព័ត៌មានខាងលើនេះ គឺមិនបានសាកសួរព័ត៌មានឱ្យបានច្បាស់លាសជាមុន ពីធនាគារអេស៊ីលីដា ភីអិលស៊ី ឬស្ថាប័នពាក់ព័ន្ធ ទេ ដោយមានចេតនាបំពុលសង្គម និងធ្វើឱ្យប៉ះពាល់ដល់កិត្តិយសដ៏ធ្ងន់ធ្ងរដល់ ធនាគារ អេស៊ីលីដា ភីអិលស៊ី និងសេចក្តីថ្លៃថ្នូរបស់វិស័យហិរញ្ញវត្ថុទាំងមូលដែលជាឆ្អឹង ខ្នងដ៏រឹងមាំសម្រាប់ទ្រទ្រង់សេដ្ឋកិច្ចជាតិ ដែលបាននិងកំពុងសហការជាមួយរាជរដ្ឋាភិបាលក្នុងការបំពេញកិច្ចការជូនជាតិប្រកបដោយតម្លាភាព និងការជឿទុកចិត្ត ស្របតាមយុទ្ធសាស្ត្រចតុកោណរបស់រាជរដ្ឋាភិបាលកម្ពុជា ស្តីពីកំណែទម្រង់ការគ្រប់គ្រងហិរញ្ញវត្ថុសាធារណៈឱ្យមានប្រសិទ្ធភាពខ្ពស់»។
មិនអស់ចិត្ត លោក អ៊ិន ចាន់នី ដែលពីមុនជាប្រធានអង្គការអេស៊ីលីដា ដែលស៊ីប្រជាពលរដ្ឋក្រីក្រជាកូនបំណុល រហូតបច្ចុប្បន្នជាអគ្គនាយកធនាគារបានចេញមុខបញ្ជាក់បន្ថែមជាមួយកាសែតទៀតថា ធនាគារអេស៊ីលីដាមិនមែនជាអ្នកវ៉ៃពន្ធឡាននោះទេ ។ បន្ទាប់មកទៀត នៅថ្ងៃទី១៧ ធ្នូ ដែលជាថ្ងៃឈប់សំរាកអគ្គនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុដែលមានលោក គង់ វិបុល ជាអគ្គនាយក បានចេញសេចក្តីបំភ្លឺមួយទៀតជុំវិញការពារមន្ត្រីបង់ពន្ធនិងធនាគារអេស៊ីលីដាតែហាក់បីដូចជាទំលាក់កំហុសទៅខាងក្រសួងសាធារណៈការ ដែលជាអ្នកចេញស្លាកលេខទៅវិញ ។
អគ្គនាយកដ្ឋានពន្ធដារបានបញ្ជាក់ថា ករណីនេះមិនមែនកើតឡើងដោយសារភ្នាក់ងារប្រមូល ប្រាក់ពន្ធ ឬមន្ត្រីពន្ធដារអនុវត្តការងារមិនបានត្រឹមត្រូវ ឬមានការឃុបឃិតគ្នាជាមួយធនាគារ អេស៊ីលីដា នោះឡើយ។
សេចក្តីបំភ្លឺរបស់អគ្គនាយកដ្ឋានពន្ធដារ បានរៀបរាប់ថា៖ «អគ្គនាយកដ្ឋានពន្ធដារវាយតម្លៃប្រាក់ពន្ធ ដោយផ្អែកលើឯកសារពាក់ព័ន្ធចេញដោយស្ថាប័នជំនាញ សម្រាប់ជាមូលដ្ឋានក្នុងការកំណត់ប្រាក់ពន្ធ។ ដូច្នេះករណីខុសឆ្គងបែបនេះ គឺមិនមែនកើតឡើងដោយសារភ្ញាក់ងារប្រមូលប្រាក់ពន្ធ ឬមន្ត្រីពន្ធដារអនុវត្តការងារ មិនបានត្រឹមត្រូវ ឬមានការឃុបឃិតជាមួយអ្នកជាប់ពន្ធ ដូចការលើកឡើងនោះទេ។ នេះដោយសារតែម្ចាស់រថយន្តម៉ាក TOYOTA HIACE ពាក់ស្លាក់លេខ សៀមរាប 2B-9906 រូបនោះ បានប្រកាសក្នុងលិខិតប្រកាសបង់ពន្ធថា ជាប្រភេទរថយន្តដឹកទំនិញធុនតូច Pick Up ទៅតាមប័ណ្ណសំគាល់យានយន្តដែលផ្តល់ដោយ មន្ទីរសាធារណការ និងដឹកជញ្ជូនខេត្តសៀមរាប»។
អគ្គនាយកដ្ឋានពន្ធដារ បានបញ្ជាក់ទៀតថា៖ «ភ្នាក់ងារប្រមូលប្រាក់ពន្ធ ដូចជាធនាគារ អេស៊ីលីដា ភិអិលស៊ី ជាដើម មិនមែនជាអង្គភាពកំណត់ពន្ធនោះទេ គឺអគ្គនាយកដ្ឋានពន្ធដារតែមួយគត់ ដែលជាអង្គភាពកំណត់ប្រាក់ពន្ធ ដោយឈរលើមូលដ្ឋានទិន្នន័យនៅលើប័ណ្ណសម្គាល់យានយន្តចេញដោយក្រសួងសាធារណការ និងដឹកជញ្ជូន»។
សូមបញ្ជាក់ថា ករណីឃុបឃឹតគ្នាបង់ពន្ធយានយន្តមិនប្រក្រតីដែលបង្កឡើងដោយធនាគារអេស៊ីលីដានៅសៀមរៀបនេះ បណ្តាញសារពតិមានបានដកស្រង់ប្រភពពីហ្វេសប៊ុកលោកផែងវណ្ណៈមកផ្សាយថា ៖ យោងតាមភស្តុតាងជាក់ស្ដែងដែលគេថតបង្ហោះ នៅតាមហ្វេសប៊ុកនោះបានអោយដឹងថា រថយន្តចំនួន២គ្រឿង ម៉ាកដូចគ្នាពណ៌ដូចគ្នា កម្លាំងម៉ាស៊ីន ចំនួន ទំហ៊ំស៊ីឡាំងដូចគ្នា និយាយរួមគឺដូចគ្នាទាំងអស់ ខុសតែឆ្នាំផលិតប៉ុណ្ណោះ ដោយមួយគ្រឿងផលិតនៅឆ្នាំ២០១៥ និងមួយគ្រឿងទៀតផលិតនៅឆ្នាំ២០១៦តែការបង់ពន្ធផ្លូវប្រចាំឆ្នាំនៅធនាគារអេស៊ីលីដាខុសគ្នាដល់ទៅ៤០ម៉ឺនរៀល។
ភស្តុតាងឯកសារដែលលោក ផែង វណ្ណៈ ថតបង្ហោះនៅតាមហ្វេសប៊ុកបានឲ្យដឹងថា រថយន្តម៉ាក Toyota Hiace ប្រភេទរថយន្តដឹកអ្នកដំណើរ១២កៅអីមួយគ្រឿង ផលិតនៅឆ្នាំ២០១៥ ពាក់ស្លាកលេខសៀមរាប 2b 2899 ត្រូវបានគេកំណត់ថា ជាប្រភេទរថយន្តដឹកអ្នកដំណើរធុនតូច ត្រូវបង់ពន្ធផ្លូវប្រចាំឆ្នាំចំនួន៦០០.០០០រៀល ខណៈរថយន្តដូចគ្នាមួយគ្រឿងទៀតផលិតនៅឆ្នាំ២០១៦ ពាក់ស្លាកលេខសៀមរាប 2B 9906ត្រូវបានគេកំណត់ថាជាប្រភេទរថយន្តដឹកទំនិញធុនតូចដែរត្រូវត្រូវបានម្ចាស់រថយន្តឈ្មោះ គួយ ណាលីន ឃុបឃិតគ្នាជាមួយមន្ត្រីធនាគារ អេស៊ីលីដា បង់ពន្ធត្រឹមតែ ២០០០០០ រៀល ប៉ុណ្ណោះអោយខុសប្រាក់បង់ពន្ធរហូតដល់ទៅ៤០០.០០០រៀលឯណោះ នេះគេនៅមិនទាន់គិតដល់ការ បង់ពន្ធនាំចូលដែលអាចខុសគ្នាថែមទៀតផង ព្រោះសំរាប់រថយន្តដឹកទំនិញ គេត្រូវគិតពន្ធនាំចូលទៅតាមចំនួនតោន និងរថយន្តដឹកអ្នកដំណើរ គេត្រូវគិតពន្ធនាំចូលទៅតាមចំនួនកៅអី ហើយរថយន្តដឹកអ្នកដំណើរអាចជាប់ពន្ធខ្ពស់ជាងរថយន្តដឹកទំនិញទៀតផង។
តាមប្រភពច្បាស់ការណ៍បានអោយដឹងថា ម្ចាស់រថយន្តខាងលើនេះជាភរិយាមន្ត្រីជាន់ខ្ពស់ខេត្តសៀមរាប និងជាម្ចាស់សណ្ឋាគារមួយផង ។ ពតិមានដែលធ្វើឲ្យរញ្ជួយធនាគារអេស៊ីលីដានិងអគ្គនាយកពន្ធដារហូតដល់គម្រាមលោក ផែង វណ្ណៈ នេះដើម្បីឲ្យមានតម្លាភាព និងយុត្តិធម៌ សមត្ថកិច្ចពាក់ព័ន្ធគួរតែបើកធ្វើការសើបអង្កេតលើករណីនេះថាតើកំហុសបណ្ដាលមកពីខាងណាពិតប្រាកដ? កំហុសគយនៅមាត់ច្រកនាំចូល ឬក៏កំហុសខាងមន្ទីរសាធារណការដែលជាអ្នកចេញស្លាកលេខ? ឬបុគ្គលឹកធនាគារអេស៊ីលីដា?។
ករណីយ៍នេះ លោក ផែង វណ្ណៈ ដែលបានប្រកាសតាមសារអេឡិចត្រូនិកថានឹងប្តឹងទៅអង្គភាពប្រឆាំងនិងអំពើរពុករលួយនោះ គេជឿ ថាប្រកដជាមិនហ៊ានធ្វើឡើយ ព្រោះវាជារឿងរសើប និងប៉ះខ្សែធូមៗចឹងនោះ៕
