បន្ទាយមានជ័យ៖ គ្លីនិកមួយនៅក្រុងប៉ោយប៉ែតយីហោ សែនសុខសាន្ត ដែលមានទីតាំងជាប់ដងផ្លូវជាតិលេខ០៥ស្ថិតក្នុងភូមិគីឡូម៉ែតលេខ៤ សង្កាត់ផ្សារកណ្តាល ក្រុងប៉ោយប៉ែតខេត្តបន្ទាយមានជ័យត្រូវក្រុមគ្រួសារជនរងគ្រោះប្តឹងសមត្ថកិច្ចនគរបាលនៃអធិការដ្ឋានក្រុងប៉ោយប៉ែតក្រោយពីម្ចាស់គ្លីនិកខាងលើបានព្យាបាលអ្នកជម្ងឺបណ្តាលឱ្យមនុស្សស្លាប់
កាលពីថ្ងៃទី១៧ខែធ្នូ២០១៦កន្លងទៅនេះ ។
ជនរងគ្រោះដែលបានស្លាប់បាត់បង់ជីវិតនោះមានឈ្មោះម៉ា សុធា អាយុ២៤ឆ្នាំមានទីលំនៅភូមិកូនដំរីសង្កាត់និមិត្ត ក្រុងប៉ោយប៉ែតមុខរបរលក់ដូរនៅអាងអូរខៃដនក្នុងភូមិកូនដំរី ។ សេចក្តីរាយការណ៍ពីសាច់ញាតិបានឲ្យដឹងថា៖ថាជនរងគ្រោះត្រូវបានពស់ចឹក កាលពីវេលាម៉ោងជាង២រសៀលថ្ងៃទី១៧ ខែធ្នូ ឆ្នាំ២០១៦ ហើយ ត្រូវសាច់ញាតិដឹកទៅសង្គ្រោះនៅគ្លីនិកខាងលើ ។
ពេលទៅដល់ភ្លាមម្ចាស់គ្លីនិកបានដាក់ សេរ៉ូមអស់ចំនួនពីរកំប្លោកដែរតែមិនអាចទប់មិនឲ្យឱ្យពឺសពស់ ជ្រាបដល់បេះដូងជនរងគ្រោះក៏ស្លាប់នៅក្នុងគ្លីនិកនោះតែម្តងទៅ នៅវេលាម៉ោងប្រហែល១០នាទីយប់ថ្ងៃដដែល ។
ពាក់ពន្ធ័និងករណីខាងលើលោកឈុំ ម៉ុងឆេង ម្ចាស់គ្លីនិកដែលធ្វើឱ្យមនុស្សស្លាប់ នៅព្រឹកថ្ងៃទី១៨នេះ អង្គភាពសារព័ត៌មានយើងមិនអាចទាក់ទងសុំការបំភ្លឺបាននូវឡើយទេ ខណខលចូលហើយមានមនុស្សស្រីទទួលជំនួស ។
ករណីនេះ លោកព្រហ្ម ពិសិដ្ឋ អធិការរងនគរបាលក្រុងប៉ោយប៉ែតទទួលផ្នែកព្រហ្មទណ្ឌ បានឲ្យដឹងថា ករណីជនរងគ្រោះស្លាប់ក្នុងគ្លីនិកនោះ សាច់ញាតិជនរងគ្រោះពិតជាបានដាក់ពាក្យបណ្តឹងមកលោកមែន ហើយលោកក៏បានសាកសួរបឋមហើយដែរ ។
យោងតាមសេចក្តីណែនាំរបស់ក្រសួងសុខាភិបាលដែលបានចេញកាលពីថ្មីៗនេះថា ចំពោះអ្នកជម្ងឺពស់ចឹកទាំងឡាយណាគ្រប់គ្លីនិកឯកជន មិនមានសិទ្ធិព្យាបាលទេគឺ ត្រូវបញ្ជូន អ្នកជម្ងឺទៅមន្ទីរដ្ឋដើម្បីសង្គ្រោះបន្ទាន់ ។
ប៉ុន្តែប្រហែល លោក ឈុំ ម៉ុងឆេង ចង់បានលុយពីអ្នកជម្ងឺខ្លាំងពេកក៏សំរេចចិត្ត ហ៊ានព្យាបាលជម្ងឺពស់ចឹក ទាំងប្រថុយប្រថានបំពានលើច្បាប់របស់ក្រសួងសុខាភិបាល បណ្តាលឱ្យមនុស្សស្លាប់ ទាំងវ័យក្មេង ស្លាប់ចោលក្រុមគ្រួសារយ៉ាងអណោចអធ័មជាទីបំផុត ។