ប្រទេសថៃ ៖ ស្ត្រីរងគ្រោះម្នាក់ ដែលគេស្គាល់ច្បាស់ថាមានសញ្ជាតិជាជនជាតិខ្មែរ ហើយបានស្វាមីជាជនជាតិថៃ ត្រូវបានគេប្រទះឃើញស្លាប់យ៉ាងអាណោចអាធ័ម នៅក្នុងទឹកអូរក្បែព្រំដែនកម្ពុជា ថៃ ប្រមាណជា២ថ្ងៃមកហើយ បន្ទាប់ពីស្ត្រីរងគ្រោះ ជាមួយនឹងស្វាមី ទើបនឹងត្រឡប់មកពីលេងម្តាយនៅក្នុងទឹកដីកម្ពុជារួចមក ។
តាមប្រភពដែលទទួលបានពីកន្លែងឃើញហេតុការណ៍ បានឱ្យដឹងថា កាលពីថ្ងៃទី១៥ ខែធ្នូ ឆ្នាំ២០១៦ វេលាម៉ោង ៧ និង ៥០ នាទីព្រឹក មានបុរសម្នាក់ឈ្មោះ ធីរៈសាក់ ធៀបប៉ាក់ធុំ អាយុ៣០ឆ្នាំរស់នៅក្នុងតំបន់ ភូណាំកៀង ក្នុងភូមិ៩ ឃុំប៉ារ៉ៃ ស្រុកអារញ្ញប្រាក់ថេត ខេត្តស្រះកែវ ប្រទេសថៃ បានចេញទៅមើលចំការដំឡូងរបស់ខ្លួន ហើយក៏ប្រទះឃើញមានសាកសព ស្ត្រីម្នាក់ស្លាប់អណ្តែតក្នុងទឹកអូរ ដោយមានភិនភាគ មិនមានស្លៀកខោពាក់អាវដៃវែងពណ៌ក្រហមអណ្តែតផ្កាប់មុខ ទើបលោករាយការណ៍ទៅសមត្ថកិច្ច នៅក្នុង តំបន់នោះដើម្បីចុះត្រួតពិនិត្យ ។ នៅក្នុងពេលនោះដែរ គឺមានមនុស្សមួយចំនួនបានស្គាល់ស្ត្រីរងគ្រោះយ៉ាងច្បាស់ថា នាងមានឈ្មោះ ដា អាយុ៤៧ឆ្នាំ រស់នៅក្នុងតំបន់ខាងលើ ដោយមានស្វាមីជាជនជាតិថៃ ឈ្មោះ សុំផន គុំសាវ៉ាត់ អាយុ៤៦ឆ្នាំ ដោយភ្លាមៗនោះដែរ ក្រុមតម្រួតបានត្រួតពិនិត្យទៅលើសពដើម្បីចង់ដឹងអំពីការស្លាប់ ប៉ុន្តែអ្វីៗនៅមិនទាន់រកឃើញស្លាកស្នាមនោះឡើយហើយក៏បាននាំបុរសដែលជាស្វាមីទៅសាកសួរនៅក្នុងស្ថានីយ៍តម្រួតអារញ្ញប្រាក់ថេត ។
ជាលទ្ធផល បុរសនោះបានរៀបរាប់ថា នៅមុននេះពីរថ្ងៃខ្លួនជាមួយនឹងភរិយា បាននាំគ្នា ឆ្លងដែនតាមច្រកប៉ោយប៉ែត ទៅលេងម្តាយរបស់នាងនៅក្នុងទឹកដីខ្មែរ ដោយបាននាំគ្នា ផឹកស្រាលេងជាមួយនឹងអ្នកភូមិថែមទៀត ។
លុះនៅពេលវិលត្រឡប់មកដល់ខាងថៃវិញខ្លួនក៏បានទិញស្រាផឹកបន្ថែម ទើបនាំគ្នាវិលត្រឡប់ទៅផ្ទះវិញ ប៉ុន្តែនៅតាមផ្លូវ ស្ត្រី ជាភរិយារបស់ខ្លួនបានសុំចុះទៅងូតទឹកលេងក្នុងអូរតាមផ្លូវ តែខ្លួនបានបដិសេធទើបនាងក៏បានចុះងូតតែម្នាក់ឯង រីឯខ្លួនបានធ្វើដំណើរទៅសម្រាកនៅផ្ទះយ៉ាងលង់លក់ដោយភាពស្រវឹងយ៉ាងខ្លាំងផងដែរ ប៉ុន្តែក្រោយពីដឹងខ្លួនគឺមិនឃើញវត្តមានភរិយារបស់ខ្លួនឡើយ ទើបមានការភ្ញាក់ផ្អើល និងតាមរកគ្រប់ទីកន្លែងនៅតែរកមិនឃើញ លុះនៅថ្ងៃនេះក្រោយពីសពបានអណ្តែតឡើងមកលើទឹកទើបដឹងថាប្រពន្ធរបស់ខ្លួនបានស្លាប់បាត់ទៅហើយ។
បច្ចុប្បន្ន ក្រុមតម្រួតនៅតែបន្តការសាកសួរបុរសដែលជាស្វាមី ព្រមទាំងបានបើកការស៊ើបអង្គេតទៅលើបញ្ហាដែលស្ត្រីខ្មែរបានស្លាប់យ៉ាងអាថ៌កំបាំងនេះ នៅក្នុងទឹកអូរនេះ យ៉ាង យកចិត្តទុកដាក់ជាទីបំផុត ព្រោះបើផ្អែកទៅលើសំដីរបស់អ្នកភូមិបាន បានសង្កត់ធ្ងន់ថា ស្ត្រីរងគ្រោះគឺជាមនុស្សចេះហែលទឹកយ៉ាងស្ទាត់ជំនាញ មិនសមនឹងស្លាប់នៅក្នុងទឹកបែបនេះសោះ៕
