វគ្គបញ្ចប់ការបំប៉នគ្រូបង្រៀនកម្រិតមូលដ្ឋាន ជំនាន់ទី៧ វេនទី២ នៃគរុកោសល្យភូមិភាគខេត្តបាត់ដបង ត្រូវបានរៀបចំពិធីបិទ កាលពី ថ្ងៃទី ១៥ ខែកញ្ញា ឆ្នាំ២០១៤ ក្រោមអធិបតីភាពលោក បណ្ឌិត ជាប ចន្ទ័សោភណ័ អភិបាលរងខេត្តបាត់ដំបង។
ក្នុងរបាយការណ៍របស់លោក សុខ ហ៊ីង នាយកមជ្ឈមណ្ឌលគរុកោសល្យភូមិភាគខេត្តបាត់ដំបង បានឱ្យដឹងថា មជ្ឈមណ្ឌលគរុកោសល្យ ភូមិភាគខេត្តបាត់ដំបង មានភារៈកិច្ចបណ្តុះបណ្តាល គរុសិស្សគ្រូបង្រៀនកម្រិតមូលដ្ឋាន (12+2) បង្រៀននៅអនុវិទ្យាល័យ និងបំប៉នសិក្ខាកាម ជាគ្រូ បឋមសិក្សា ១ដែលមានសញ្ញាប័ត្រមធ្យម សិក្សាទុរយភូមិ ឱ្យក្លាយជាគ្រូបង្រៀនកម្រិតមូលដ្ឋាន បង្រៀននៅអនុវិទ្យាល័យ។គរុសិស្ស និងសិក្ខាកាមទាំងអស់ មកពីខេត្តបាត់ដំបង ពោធិ៍សាត់ បន្ទាតមានជ័យ សៀមរាប និង ខេត្តប៉ៃលិន។ ចំពោះគរុសិស្សមជ្ឈមណ្ឌលគរុកោសល្យ ភូមិភាគខេត្តបាត់ដំបង បណ្តុះបណ្តាលបានចំនួន ២៥ ជំនាន់ដែលមានករុសិស្សសរុប ៧៨២៩ នាក់ក្នុងនោះស្រីចំនួន ៣៤១០ នាក់ ដែលមាន
រយៈពេល ២ ឆ្នាំ ។
ចំពោះសិក្ខាកាម យើងបានបំប៉នចំនួន៨ជំនាន់ ដែលមានសិក្ខាកាមសរុប ៣០៦៩នាក់ ស្រី ១២៥១ នាក់។ សិក្ខាកាម បានទទួលការបំប៉នរយៈពេល ២ វេន ក្នុងមួយវេនៗមានរយៈពេល ៦សប្តាហ៍ ហើយបំប៉នក្នុងពេលវិស្សមកាលធំ ចាប់ពីថ្ងៃទី ១ ខែសីហា ដល់ថ្ងៃ ទី ១៥ ខែកញ្ញា។ ដោយឡែកក្នុងឆ្នាំ២០១៤នេហ យើងបំប៉នសិក្ខាកាមជំនាន់ទី ៧ ២ វេន ជំនាន់ទី៨ វេនទី១ ចាប់ពីថ្ងៃទី ១ ខែសីហា ដល់ ១៥ ខែកញ្ញា ឆ្នាំ២០១៤ ដែលមានសិក្ខាកាមសរុប ៦៥១នាក់ ស្រី ២៩៩នាក់។
ក្នុងប្រសាសន៍សំណេះសំណាលលោកបណ្ឌិត ជាប ចន្ទ័សោភណ័ បានបញ្ជាក់ពីគោលដៅអប់រំជាតិរបស់យើង គឺមានគោលបំណង កសាង មនុស្សឱ្យមានលក្ខណៈពេញលេញ គឺជាមនុស្សដែលមានចំណេះដឹង ចំណេះធ្វើ និងមានសីលធម៌ល្អ ចេះរស់នៅក្នុងសង្គមដោយសុខុដុមរមនា ជាមួយគ្នា។
ការអភិវឌ្ឍន៍ប្រទេសជាតិមិនអាចធ្វើក្នុងរយៈពេលមួយពព្រិចភ្នែកបានឡើយ គឺទាមទារឱ្យយើងមានពេលវេលា និងធនធានគ្រប់ គ្រាន់ រួមនិងការចូលរួម របស់ប្រជាពលរដ្ឋផងដែរ។ ការប្រឡងបញ្ចប់វគ្គបំប៉ន ទទួលបានលទ្ទផលគួរជាទីពេញចិត្តនាពេលនេះ ក៏អាស្រ័យទៅលើ ការយកចិត្តទុកដាក់ក្នុងវិស័យបណ្តុះបណ្តាលធនធានមនុស្ស និងអាស្រ័យទៅលើមនសិការវីជ្ជាជីវៈខ្ពស់ របស់យើងទាំងអស់គ្នាផងដែរ។ គរុកោសល្យភូមិភាគខេត្តបាត់ដំបងនេះ ក៏មានការឧបត្ថម្ភគាំទ្រ និងការលើកទឹកចិត្តជាច្រើន ពីសម្តេចអគ្គមហាសេនាបតីតេជោ ហ៊ុនសែន ក៏ដូចជាលើអាជ្ងាធរ មាតាបិតា គរុសិស្ស និងសិក្ខាកាមគ្រប់ជំនាន់ផងដែរ ៕
