ខេត្តក្រចេះ ៖ មានប្រសាសន៍លើកឡើងក្នុងពិធីបំពាក់ឋានន្តរស័ក្តិ និងប្រកាសតែងតាំងតួនាទី ភារកិច្ច ដល់នាយនគរបាលនៃស្នងការនគរបាលខេត្តក្រចេះ កាលពីព្រឹកថ្ងៃទី១៤ ខែធ្នូ ឆ្នាំ២០១៦ លោកឧត្តមសេនីយ៍ត្រី លន់ សុផាត ស្នងការនគរបាលខេត្ត បានជម្រុញដល់អធិការក្រុងស្រុកទាំង៦ ឲ្យពង្រឹងប្រជាការពារ និងបន្តជម្រុញពន្លឿនការធ្វើអត្តសញ្ញាណប័ណ្ណជូនប្រជាពលរដ្ឋ ។
លោកឧត្តមសេនីយ៍ លន់ សុផាត បានដាក់ផែនការ ជម្រុញឲ្យនគរបាលអធិការដ្ឋាន និងប៉ុស្តិ៍រដ្ឋបាល សហការជាមួយនឹងប្រជាការពារភូមិ/ឃុំ សិក្សាវាយតម្លៃតំបន់ងាយរងគ្រោះ ចំណុចគោលដៅ ដាក់វេនប្រចាំការ និងការចុះល្បាតជាដើម ដើម្បីបង្កើតតំបន់គោលដៅងាយមានវិធានការការពារសន្តិសុខឲ្យបានល្អប្រសើរដល់ការរស់នៅរបស់បងប្អូនប្រជាពលរដ្ឋ ឲ្យពួកគាត់មានទំនុកចិត្ត ជឿជាក់ មកលើនគរបាល ។
លោកឧត្តមសេនីយ៍ ស្នងការខេត្ត បានមានប្រសាសន៍ជម្រុញឲ្យមន្ត្រីអត្តសញ្ញាណកម្មក្រុង/ស្រុកទាំងអស់ ត្រូវធ្វើយ៉ាងណាពន្លឿនការចុះធ្វើអត្តសញ្ញាណប័ណ្ណជូនប្រជាពលរដ្ឋឲ្យបានគ្រប់គ្នា និងឆាប់រហ័ស ជាពិសេសការចុះផ្សព្វផ្សាយ និងបំផុសស្មារតីប្រជាពលរដ្ឋឲ្យយល់ដឹងច្បាស់អំពីអត្ថប្រយោន៍នៃអត្តសញ្ញាណប័ណ្ណ ដើម្បីឲ្យពួកគាត់ចូលរួមធ្វើបានគ្រប់គ្នា ។ ម្យ៉ាងវិញទៀត ត្រូវបន្តចុះផ្សព្វផ្សាយនូវគោលនយោបាយភូមិឃុំមានសុវត្ថិភាពដល់បងប្អូនប្រជាពលរដ្ឋឲ្យពួកគាត់កាន់តែយល់ដឹងច្បាស់ តាមរយៈកិច្ចប្រជុំ វេទិការសាធារណៈ និងពិធីជួបសំណេះសំណាលជាដើម ។
ជាមួយគ្នានេះ លោកក៏បានក្រើនរំលឹកដល់បណ្តានគរបាលគ្រប់ស្រុកក្រុង ធ្វើយ៉ាងណាបន្តយុទ្ធនាការ បង្ក្រាបបទល្មើសគ្រឿងញៀន អោយខានតែបាន ដើម្បីរក្សាសន្តិសុខសណ្តាប់ធ្នាប់ជូនពលរដ្ឋ ព្រោះការបង្ក្រាបបទល្មើសគ្រឿងញៀន អាចកាត់បន្ថយបទល្មើសជាច្រើនដូចជា ចោរលួច ឆក់ ប្លន់ផងដែរ ៕
