ក្រចេះ ៖ នគរបាលស្រុកចិត្របុរី ឃាត់ខ្លួនជនសង្ស័យ ១ នាក់ ជាប់ពាក់ព័ន្ធករណីឃាតកម្មប្រើហិង្សា ទៅលើប្រពន្ធខ្លួនឯង រហូតដល់ស្លាប់ ។ ហេតុការណ៍នេះ កើតឡើងនៅវេលាមោង៣និង៤៥នាទី រសៀលថ្ងៃទី១២ ខែធ្នូ ឆ្នាំ២០១៦ នៅភូមិសេរីភាព ឃុំដា ស្រុកចិត្របុរី ខេត្តក្រចេះ។
នគរបាលស្រុកចិត្របុរីបានឲ្យដឹងថា ជនសង្ស័យឈ្មោះ ឃឹម ញ៉យ ភេទប្រុសអាយុ៤៥ឆ្នាំ បានស្រវឹងស្រា រករឿងប្រពន្ធ រហូតដល់ប្រើហឹង្សា ដោយយកចបកាប់វាយខាងផ្លែទៅលើជនរងគ្រោះត្រូវចំច្អឹងជំនីខាងឆ្វេង និងដើមដៃខាងឆ្វេង បណ្ដាលឲ្យស្លាប់នៅកន្លែងកើតហេតុ ក្រោមផ្ទះរបស់ខ្លួនយ៉ាងអណោចអធមបំផុត ។
ជនរងគ្រោះឈ្មោះ តឹក សារុំ ភេទស្រីអាយុ៤៣ឆ្នាំ ត្រូវជាប្រពន្ធ័ជនសង្ស័យស្លាប់ចោលកូន ៦ នាក់យ៉ាងវេទនា ហើយអ្នកទាំងពីររស់នៅភូមិឃុំកើតហេតុខាងលើ ។
នគរបាលបានបន្តទៀតថា ជនសង្ស័យជាជនប្រមឹកស្រវឹងអួទីណួរាលថ្ងៃ ហើយក្រោយពីវាយប្រពន្ធ រួចត្រូវបានប្រជាពលរដ្ឋរាយការណ៍ទៅប៉ុស្ដិន៍រដ្ឋបាល ហើយកម្លាំងនគរបាលចុះឃាត់តែម្ដង ។
បច្ចប្បន្ន ជនសង្ស័យឃាត់ខ្លួនបណ្ដោះអាសន្ន ដើម្បីសួរនាំនៅអធិការដ្ឋាននគរបាលស្រុកចិត្របុរី ដើម្បីកសាងសំណុំរឿងតាមនិតិវិធី ៕
