ភ្នំពេញ៖ នៅថ្ងៃទី០៩ ខែធ្នូ ឆ្នាំ២០១៦នេះ រាជរដ្ឋាភិបាលកម្ពុជា បានចេញសេចក្តីសម្រេចមួយ ស្តីពីការបង្កើតគណៈកម្មការ ទប់ស្កាត់ និងបង្ក្រាបបទល្មើសធនធានធម្មជាតិមានសមាសភាពមុខអាដែលៗតែលើកនេះពង្រីកទូទាំងប្រទេសខុសពីលើកមុនសេចក្តីសម្រេចចុះថ្ងៃទី១៥មករាឆ្នាំ២០១៦គឺត្រឹមតែខេត្តភូមិភាគឥសាន្ត។
គណៈកម្មការថ្មីរួម មានលោកនាយឧត្តមសេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងរាជអាវុធហត្ថ លើផ្ទៃប្រទេសជាប្រធាន និង លោក ហ៊ូ សាគុណ អគ្គស្នងការរងនគរបាលជាតិ និងជាប្រធាននាយកដ្ឋានកណ្តាលនគរបាលព្រំដែន ជាអនុប្រធាន ព្រមទាំងមានសមាជិកមកពីក្រសួងបរិស្ថាន ក្រសួងកសិកម្មរុក្ខាប្រមាញ និងនេសាទ រួមទាំងអភិបាលរាជធានី-ខេត្តផងដែរ។
គណៈកម្មការនេះមានភារកិច្ចដូចជា ៖ ទី១.ចុះទប់ស្កាត់ និងបង្ក្រាបបទល្មើសធនធានធម្មជាតិ ដូចជា ការកាប់ព្រៃឈើ ការដឹកឈើ និងការនាំចេញ ឈើខុសច្បាប់ ការចាប់សត្វព្រៃ និងការនាំចេញសត្វព្រៃខុសច្បាប់ ការកាប់រានទន្ទ្រានយកដីរដ្ឋ ព្រមទាំងការរុករករ៉ែដោយរ៉ែដោយខុសច្បាប់នៅទូទាំងប្រទេស។ ទី២. អង្កេត និងស្រាវជ្រាវរកអ្នកប្រព្រឹត្ត និងអ្នកពាក់ព័ន្ធ និងសកម្មភាពនៃបទល្មើសធនធានធម្មជាតិ។ ទី៣. ចាប់ជនល្មើស និងវត្ថុតាងនៃបទល្មើសធនធានធម្មជាតិ ហើយរៀបចំកសាងសំណុំរឿងបញ្ជូនទៅតុលាការតាមនីតិវិធី។ ទី៥.ត្រូវសហការជាមួយភាគីវៀតណាម ថៃ និងឡាវ ដើម្បីបង្ការទប់ស្កាត់ និងបង្ក្រាបបទល្មើសធនធានធម្មជាតិ ឱ្យមានប្រសិទ្ធភាពក្នុងករណីចាំបាច់ ជាដើម។ គណកម្មការនេះត្រូវធ្វើរបាយការណ៍ជូនរាជរដ្ឋាភិបាល អំពីលទ្ធផល។
មានការកត់សម្គាល់ថាគណៈកម្មការ ទប់ស្កាត់ និងបង្ក្រាបបទល្មើសធនធានធម្មជាតិមានសមាសភាពមុខអាដែលៗ ដែលកាលពីការអនុវត្តន៍ការងារបង្ក្រាបកាលពីដើមឆ្នាំ២០១៦រកឃើញឈើប្រណីតប្រមាណ៧ម៉ឺនម៉ែត្រគូបតែ មនុស្សដែលប្រព្រឹត្តឧក្រឹដ្ឋកម្មព្រៃឈើជាង៧ម៉ឺនម៉ែតគូបនេះណាម្នាក់ត្រូវបានផ្តន្ទាទោសបានឡើយ។ប្រការនេះធ្វើឲ្យមានការងឿងឆ្ងល់ថាតើគណៈកម្មការ ទប់ស្កាត់ និងបង្ក្រាបបទល្មើសធនធានធម្មជាតិដែលបង្កើតកាលពីថ្ងៃ១៥មករាឆ្នាំ២០១៦គ្មានសមត្តភាពឬក៏ឃុបឃឹតជាមួយពួកឈ្មួញដែលជាឧក្រឹដ្ឋជនបំផ្លាញព្រៃឈើ? ៕
